ye baaten jhuTi baaten hain

By

ye baaten jhuti baaten hain ye logon ne phailai hain
tum 'insha'-ji ka nam na lo kya 'insha'-ji saudai hain
hain lakhon rog zamane mein kyun ishq hai ruswa be-chaara
hain aur bhi wajhen wahshat ki insan ko rakhtin dukhiyara
han be-kal be-kal rahta hai ho pit mein jis ne ji haara
par sham se le kar subh talak yun kaun phirega aawara
ye baaten jhuti baaten ye logon ne phailain hain
tum 'insha'-ji ka nam na lo kya 'insha'-ji saudai hain
ye baat ajib sunate ho wo duniya se be-as hue
ek nam suna aur ghash khaya ek zikr pe aap udas hue
wo ilm mein aflatun sune wo sher mein tulsidas hue
wo tis baras ke hote hain wo b-a ma pas hue
ye baaten jhuti baaten hain ye logon ne phailai hain
tum 'insha'-ji ka nam na lo kya 'insha'-ji saudai hain
gar ishq kiya hai tab kya hai kyun shad nahin aabaad nahin
jo jaan liye bin tal na sake ye aisi bhi uftad nahin
ye baat to tum bhi manoge wo 'qais' nahin farhad nahin
kya hijr ka daru mushkil hai kya wasl ke nuskhe yaad nahin
ye baaten jhuti baaten hain ye logon ne phailai hain
tum 'insha'-ji ka nam na lo kya 'insha'-ji saudai hain
wo ladki achchhi ladki hai tum nam na lo hum jaan gae
wo jis ke lambe gesu hain pahchan gae pahchan gae
han sath hamare 'insha' bhi is ghar mein the mehman gae
par us se to kuchh baat na ki anjaan rahe anjaan gae
ye baaten jhuti baaten hain ye logon ne phailai hain
tum 'insha'-ji ka nam na lo kya 'insha'-ji saudai hain
jo hum se kaho hum karte hain kya 'insha' ko samjhana hai
us ladki se bhi kah lenge go ab kuchh aur zamana hai
ya chhoden ya takmil karen ye ishq hai ya afsana hai
ye kaisa gorakh-dhanda hai ye kaisa tana-bana hai
ye baaten kaisi baaten hain jo logon ne phailai hain
tum 'insha'-ji ka nam na lo kya 'insha'-ji saudai hain

sab maya hai

By

sab maya hai, sab dhalti phirti chhaya hai
is ishq mein hum ne jo khoya jo paya hai
jo tum ne kaha hai, 'faiz' ne jo farmaya hai
sab maya hai
han gahe gahe did ki daulat hath aai
ya ek wo lazzat nam hai jis ka ruswai
bas is ke siwa to jo bhi sawab kamaya hai
sab maya hai
ek nam to baqi rahta hai, gar jaan nahin
jab dekh liya is saude mein nuqsan nahin
tab shama pe dene jaan patinga aaya hai
sab maya hai
malum hamein sab qais miyan ka qissa bhi
sab ek se hain, ye ranjha bhi ye 'insha' bhi
farhad bhi jo ek nahr si khod ke laya hai
sab maya hai
kyun dard ke name likhte likhte raat karo
jis sat samundar par ki nar ki baat karo
us nar se koi ek ne dhoka khaya hai?
sabab maya hai
jis gori par hum ek ghazal har sham likhen
tum jaante ho hum kyunkar us ka nam likhen
dil us ki bhi chaukhat chum ke wapas aaya hai
sab maya hai
wo ladki bhi jo chand-nagar ki rani thi
wo jis ki alhad aankhon mein hairani thi
aaj us ne bhi paigham yahi bhijwaya hai
sab maya hai
jo log abhi tak nam wafa ka lete hain
wo jaan ke dhoke khate, dhoke dete hain
han thok-baja kar hum ne hukm lagaya hai
sab maya hai
jab dekh liya har shakhs yahan harjai hai
is shahr se dur ek kutiya hum ne banai hai
aur us kutiya ke mathe par likhwaya hai
sab maya hai

pichhle-pahar ke sannaTe mein

By

pichhle pahr ke sannate mein
kis ki siski kis ka nala
kamre ki khamosh faza mein dar aaya hai
zor hawa ka tut chuka hai
khule dariche ki jali se
nannhi nannhi bunden chhan kar
sab konon mein phail gai hain
aur mere ashkon se
un ke hath ka takiya bhig gaya hai
kitni zalim
kitni gahri tariki hai
khula daricha thar-thar-thar-thar kanp raha hai
bhigi mitti saundhi khushbu chhod rahi hai
ude baadal
kale ambar ki jhilon mein dub gae hain
kis ke rukhsaron ki larzish dekh raha hun
kis ki zulfon ki shiknon se khel raha hun
chupke chupke lete lete soch raha hun
pichhle pahr ka sannata hai
kis ki siski kis ka nala
kamre ki khamosh faza mein dar aaya hai
ghane darakhton mein purwa ki siti gunji
do dikshon mein qaidi ruhen chikh rahi hain
konon mein dubke hue jhingar chillate hain
mehrabon se bhuton ke sar takraate hain
qile ke ek burj ke andar
ek pari (shilat ki rani)
khandaq ke an-dekhe pani ki gahrai
andeshe ke baalishton se map rahi hai
mazi ki dewdhi ki chilman
khule dariche ki jali se
chhan chhan aaen
rup ki jot hina ki lali kal ki yaaden
saundhi khushbu thandi bunden
kal ke basi aansu jin se
farda ke baalin ka parda bhig raha hai
sehr-zada mahbus hasina
sapnon ke shilat ki rani
aainon mein husn-e-shikasta dekh rahi hai
kitne chehre tute tute
pahchane an-pahchane se
aage pichhe aage pichhe bhag rahe hain
qile ke aaseb ki surat kis ki siski kis ka nala
kamre ki khamosh faza mein dar aaya hai
bichhde logo piyare logo
chahen bhi to nam tumhaare jaan sakenge?
kaise manen tum ko hamare
ji lene ki mar lene ki
khushi hui afsos hua hai
tum kya jaano
kis ke hath ka takiya
kis ke garm ashkon se bhig raha hai
khule dariche ki jali se chimti aankho
ek lamhe ke kaunde mein tum
kin kin ajnabi chizon ko pahchan sakogi
jiwan-khel mein haare logo
bichhde logo piyare logo
barkha ki lambi raaton mein
kamre ki khamosh faza mein
pichhle pahr ke sannate mein
rote rote jagne wale
hum logon ko so lene do
aur sawera ho lene do

phir sham hui

By

phailta phailta sham-e-gham ka dhuan
ek udasi ka tanta hua saeban
unche unche minaron ke sar pe rawan
dekh pahuncha hai aakhir kahan se kahan
jhankta surat-e-khail-e-awargan
ghurfa ghurfa bahr kakh-o-ku shahr mein
dafatan sail-e-zulmat ko chirta
jal utha dur basti ka pahla diya
panchhiyon ne bhi pachchhim ka rasta liya
khair jao azizo magar dekhna
ek jugnu bhi mishal si le ke chala
hai use bhi koi justuju shahr mein?
aasman par rawan surmai baadalo
han tumhin kya udo aur unche udo
bagh-e-alam ke taza shagufta gulu
be-niyazana mahka karo khush raho
lekin itna bhi socha, kabhi zalimo!
hum bhi hain aashiq-e-rang-o-bu shahr mein
koi dekhe ye majburiyan duriyan
ek hi shahr mein hum kahan tum kahan
doston ne bhi chhodi hain dil-dariyan
aaj waqf-e-gham-e-ulfat-e-raegan
hum jo phirte hain wahshat-zada sargiran
the kabhi sahib-e-abru shahr mein
log tanon se kya kya jatate nahin
aise rahi to manzil ko pate nahin
ji se ek dusre ko bhulate nahin
samne bhi magar aate jate nahin
aur jaen to aankhen milate nahin
hae kya kya nahin guftugu shahr mein
chand nikla hai daghon ki mishal liye
dur girja ke minaron ki ot se
aa meri jaan aa ek se do bhale
aaj phere karen kucha-e-yar ke
aur hai kaun dard-ashna baware!
ek main shahr mein, ek tu shahr mein

log puchhenge

By

log puchhenge kyun udas ho tum
aur jo dil mein aae so kahiyo!
'yunhi mahaul ki girani hai'
'din khizan ke zara udas se hain'
kitne bojhal hain sham ke sae
un ki babat khamosh hi rahiyo
nam un ka na darmiyan aae
nam un ka na darmiyan aae
un ki babat khamosh hi rahiyo
'kitne bojhal hain sham ke sae'
'din khizan ke zara udas se hain'
'yunhi mahaul ki girani hai'
aur jo dil mein aae sau kahiyo
log puchhenge kyun udas ho tum?

lab par nam kisi ka bhi ho

By

lab par nam kisi ka bhi ho, dil mein tera naqsha hai
ai taswir banane wali jab se tujh ko dekha hai
be-tere kya wahshat hum ko, tujh bin kaisa sabr o sukun
tu hi apna shahr hai jaani tu hi apna sahra hai
nile parbat udi dharti, chaaron kut mein tu hi tu
tujh se apne ji ki khalwat tujh se man ka mela hai
aaj to hum bikne ko aae, aaj hamare dam laga
yusuf to bazar-e-wafa mein, ek tike ko bikta hai
le jaani ab apne man ke pairahan ki girhen khol
le jaani ab aadhi shab hai, chaar taraf sannata hai
tufanon ki baat nahin hai, tufan aate jate hain
tu ek narm hawa ka jhonka, dil ke bagh mein thahra hai
ya tu aaj hamein apna le, ya tu aaj hamara ban
dekh ki waqt guzarta jae kaun abad tak jita hai
farda mahz fusun ka parda, hum to aaj ke bande hain
hijr o wasl, wafa aur dhoka sab kuchh aaj pe rakkha hai