chand ke tamannai

By

shahr-e-dil ki galiyon mein
sham se bhatakte hain
chand ke tamannai
be-qarar saudai
dil-gudaz tariki
ruh-o-jaan ko dasti hai
ruh-o-jaan mein basti hai
shahr-e-dil ki galiyon mein
tak shab ki belon par
shabnamin sarishkon ki
be-qarar logon ne
be-shumar logon ne
yaadgar chhodi hai
itni baat thodi hai
sad hazar baaten thin
hila-e-shakebai
suraton ki zebai
qamaton ki ranai
in siyah raaton mein
ek bhi na yaad aai
ja-ba-ja bhatakte hain
kis ki rah takte hain
chand ke tamannai
ye nagar kabhi pahle
is qadar na viran tha
kahne wale kahte hain
qarya-e-nigaran tha
khair apne jine ka
ye bhi ek saman tha
aaj dil mein virani
abr ban ke ghir aai
aaj dil ko kya kahiye
ba-wafa na harjai
phir bhi log diwane
aa gae hain samjhane
apni wahshat-e-dil ke
bun liye hain afsane
khush-khayal duniya ne
garmiyan to jati hain
wo ruten bhi aatin hain
jab malul raaton mein
doston ki baaton mein
ji na chain paega
aur ub jaega
aahaton se gunjegi
shahr-e-dil ki pahnai
aur chand raaton mein
chandni ke shaidai
har bahane niklenge
aazmane niklenge
aarzu ki gahrai
dhundne ko ruswai
sard sard raaton ko
zard chand bakhshega
be-hisab tanhai
be-hijab tanhai
shahr-e-dil ki galiyon mein

insha-ji hai nam unhi ka chaho to tum se milwaen

By

'insha'-ji hai nam unhi ka chaho to tum se milwaen
un ki ruh dahakta lawa hum to un ke pas na jaen
ye jo log banon mein phirte jogi bai-ragi kahlaen
un ke hath adab se chumen un ke aage sis nawaen
na ye lal jataen rakhen na ye ang bhabut ramaen
na ye geru-rang faqiri-chola pahan pahan itraen
basti se guzren to sare panghat ki alhad ablaen
in ki pyas bujhane ko khud umad-ghumad baadal ban jaen
nagri nagri ghumne walon mein un ki mashhur kathaen
waise baat karo to laj se un ki aankhen jhuk jhuk jaen
na un ki guddi mein tanba paisa na manke malaen
prem ka kasa dard ki bhiksha git ghazal do hai kawitaen

ye sarae hai

By

ye sarae hai yahan kis ka thikana dhundo
yan to aate hain musafir so chale jate hain
han yahi nam tha kuchh aisa hi chehra-mohra
yaad padta hai ki aaya tha musafir koi
sune aangan mein phira karta tha tanha tanha
kitni gahri thi nigahon ki udasi us ki
log kahte the ki hoga koi aaseb-zada
hum ne aisi bhi koi baat na dekhi us mein
ye bhi himmat na hui pas bitha ke puchhen
dil ye kahta tha koi dard ka mara hoga
laut aaya hai jo aawaz na us ki pai
jaane kis dar pe kise ja ke pukara hoga
yan to har roz ki baaten hain ye jiten maten
ye bhi chahat ke kisi khel mein haara hoga
ek taswir kuchh aap se milti julti
ek tahrir thi par us ka to qissa chhoden
chand ghazlen thin ki likkhen kabhi likh kar katen
sher achchhe the jo sun lo to kaleja thamo
bas yahi mal musafir ka tha hum ne dekha
jaane kis rah mein kis shakhs ne luta us ko
guzra karte hain sulagte hue baqi ayyam
log jab aag lagate hain bujhate bhi bhi nahin
ajnabi pit ke maron se kasi ko kya kaam
bastiyon wale kabhi naz uthate bhi nahin
chhin lete hain kisi shakhs ke ji ka aaram
phir bulate bhi nahin pas bithate bhi nahin
ek din subh jo dekha to sarae mein na tha
jaane kis des gaya hai wo diwana dhundo!!
hum se puchho to na aaega wo jaane wala
tum to nahaq ko bhatakne ka bahana dhundo
yan to aaya jo musafir yun hi shab-bhar thahra
ye sarae hai yahan kis ka thikana dhundo

ye kaun aaya

By

'insha'-ji ye kaun aaya kis des ka basi hai
honton pe tabassum hai aankhon mein udasi hai
khwabon ke gulistan ki khush-bu-e-dil-ara hai
ya subh-e-tamanna ke mathe ka sitara hai
tarsi hui nazron ko ab aur na tarsa re
ai husn ke saudagar ai rup ke banjare
ramna dil-e-'insha' ka ab tera thikana ho
ab koi bhi surat ho ab koi bahana ho
khakistar-e-dil ko hai phir shola-ba-jaan hona
hairat ka jahan hona hasrat ka nishan hona
ai shakhs jo tu aakar yun dil mein samaya hai
tu dard ki darman hai to dhup ki saya hai?
nainan tere jadu hain gesu tere khushbu hain
baaten kisi jangal mein bhatka hua aahu hain
maqsud-e-wafa sun le kya saf hai sada hai
jine ki tamanna hai marne ka irada hai

ye bachcha kis ka bachcha hai

By

1
ye bachcha kaisa bachcha hai
ye bachcha kala kala sa
ye kala sa matiyala sa
ye bachcha bhuka bhuka sa
ye bachcha sukha sukha sa
ye bachcha kis ka bachcha hai
ye bachcha kaisa bachcha hai
jo ret pe tanha baitha hai
na is ke pet mein roti hai
na is ke tan par kapda hai
na is ke sar par topi hai
na is ke pair mein juta hai
na is ke pas khilaunon mein
koi bhaalu hai, koi ghoda hai
na is ka ji bahlane ko
koi lori hai, koi jhula hai
na is ki jeb mein dhela hai
na is ke hath mein paisa hai
na is ke ammi abbu hain
na is ki aapa khala hai
ye sare jag mein tanha hai
ye bachcha kaisa bachcha hai
2
ye sahra kaisa sahra hai
na is sahra mein baadal hai
na is sahra mein barkha hai
na is sahra mein baali hai
na is sahra mein khosha hai
na is sahra mein sabza hai
na is sahra mein saya hai
ye sahra bhuk ka sahra hai
ye sahra maut ka sahra hai
3
ye bachcha kaise baitha hai
ye bachcha kab se baitha hai
ye bachcha kya kuchh puchhta hai
ye bachcha kya kuchh kahta hai
ye duniya kaisi duniya hai
ye duniya kis ki duniya hai
4
is duniya ke kuchh tukdon mein
kahin phul khile kahin sabza hai
kahin baadal ghir ghir aate hain
kahin chashma hai kahin dariya hai
kahin unche mahl atariyan hain
kahin mahfil hai kahin mela hai
kahin kapdon ke bazar saje
ye resham hai ye diba hai
kahin ghalle ke ambar lage
sab gehun dhan muhayya hai
kahin daulat ke sanduq bhare
han tanba sona rupa hai
tum jo mango so hazir hai
tum jo chaho so milta hai
is bhuk ke dukh ki duniya mein
ye kaisa sukh ka sapna hai
wo kis dharti ke tukde hain
ye kis duniya ka hissa hai
5
hum jis aadam ke bete hain
ye us aadam ka beta hai
ye aadam ek hi aadam hai
ye gora hai ya kala hai
ye dharti ek hi dharti hai
ye duniya ek hi duniya hai
sab ek data ke bande hain
sab bandon ka ek data hai
kuchh purab pachchham farq nahin
is dharti par haq sab ka hai
6
ye tanha bachcha be-chaara
ye bachcha jo yahan baitha hai
is bachche ki kahin bhuk mite
(kya mushkil hai ho sakta hai)
is bachche ko kahin dudh mile
(han dudh yahan bahtera hai)
is bachche ka koi tan dhanke
(kya kapdon ka yahan toda hai)
is bachche ko koi god mein le
(insan jo ab tak zinda hai)
phir dekhe kaisa bachcha hai
ye kitna pyara bachcha hai
7
is jag mein sab kuchh rab ka hai
jo rab ka hai wo sab ka hai
sab apne hain koi ghair nahin
har chiz mein sab ka sajha hai
jo badhta hai jo ugta hai
wo dana hai ya mewa hai
jo kapda hai jo kambal hai
jo chandi hai jo sona hai
wo sara hai is bachche ka
jo tera hai jo mera hai
ye bachcha kis ka bachcha hai
ye bachcha sab ka bachcha hai!