insha-ji hai nam unhi ka chaho to tum se milwaen

By

'insha'-ji hai nam unhi ka chaho to tum se milwaen
un ki ruh dahakta lawa hum to un ke pas na jaen
ye jo log banon mein phirte jogi bai-ragi kahlaen
un ke hath adab se chumen un ke aage sis nawaen
na ye lal jataen rakhen na ye ang bhabut ramaen
na ye geru-rang faqiri-chola pahan pahan itraen
basti se guzren to sare panghat ki alhad ablaen
in ki pyas bujhane ko khud umad-ghumad baadal ban jaen
nagri nagri ghumne walon mein un ki mashhur kathaen
waise baat karo to laj se un ki aankhen jhuk jhuk jaen
na un ki guddi mein tanba paisa na manke malaen
prem ka kasa dard ki bhiksha git ghazal do hai kawitaen

hamein tum pe guman-e-wahshat tha hum logon ko ruswa kiya tumne

By

hamein tum pe guman-e-wahshat tha hum logon ko ruswa kiya tum ne
abhi fasl gulon ki nahin guzri kyun daman-e-chaak siya tum ne
is shahr ke log bade hi sakhi bada man karen durweshon ka
par tum se to itne barham hain kya aan ke mang liya tum ne
kin rahon se ho kar aai ho kis gul ka sandesa lai ho
hum bagh mein khush khush baithe the kya kar diya aa ke saba tum ne
wo jo qais gharib the un ka junun sabhi kahte hain hum se raha hai fuzun
hamein dekh ke hans to diya tum ne kabhi dekhe hain ahl-e-wafa tum ne
gham-e-ishq mein kari dawa na dua ye hai rog kathin ye hai dard bura
hum karte jo apne se ho sakta kabhi hum se bhi kuchh na kaha tum ne
ab rah-raw-e-manda se kuchh na kaho han shad raho aabaad raho
badi der se yaad kiya tum ne badi dard se di hai sada tum ne
ek baat kahenge 'insha'-ji tumhein rekhta kahte umr hui
tum ek jahan ka ilm padhe koi 'mir' sa sher kaha tum ne

hum un se agar mil baiThe hain kya dosh hamara hota hai

By

hum un se agar mil baithe hain kya dosh hamara hota hai
kuchh apni jasarat hoti hai kuchh un ka ishaara hota hai
katne lagin raaten aankhon mein dekha nahin palkon par aksar
ya sham-e-ghariban ka jugnu ya subh ka tara hota hai
hum dil ko liye har des phire is jins ke gahak mil na sake
ai banjaro hum log chale hum ko to khasara hota hai
daftar se uthe kaife mein gae kuchh sher kahe kuchh coffee pi
puchho jo maash ka 'insha'-ji yun apna guzara hota hai

hum jangal ke jogi hum ko ek jagah aaram kahan

By

hum jangal ke jogi hum ko ek jagah aaram kahan
aaj yahan kal aur nagar mein subh kahan aur sham kahan
hum se bhi pit ki baat karo kuchh hum se bhi logo pyar karo
tum to pareshan ho bhi sakoge hum ko yahan pe dawam kahan
sanjh-samay kuchh tare nikle pal-bhar chamke dub gae
ambar ambar dhundh raha hai ab unhen mah-e-tamam kahan
dil pe jo bite sah lete hain apni zaban mein kah lete hain
'insha'-ji hum log kahan aur 'mir' ka rang-e-kalam kahan

dil si chiz ke gahak honge do ya ek hazar ke bich

By

dil si chiz ke gahak honge do ya ek hazar ke bich
'insha' ji kya mal liye baithe ho tum bazar ke bich
pina-pilana ain gunah hai ji ka lagana ain hawas
aap ki baaten sab sachchi hain lekin bhari bahaar ke bich
ai sakhiyo ai khush-nazro yak guna karam khairaat karo
nara-zanan kuchh log phiren hain subh se shahr-e-nigar ke bich
khar-o-khas-o-khashak to jaanen ek tujhi ko khabar na mile
ai gul-e-khubi hum to abas badnam hue gulzar ke bich
minnat-e-qasid kaun uthae shikwa-e-darban kaun kare
nama-e-shauq ghazal ki surat chhapne ko do akhbar ke bich

dil kis ke tasawwur mein jaane raaton ko pareshan hota hai

By

dil kis ke tasawwur mein jaane raaton ko pareshan hota hai
ye husn-e-talab ki baat nahin hota hai meri jaan hota hai
hum teri sikhai mantiq se apne ko to samjha lete hain
ek khar khatakta rahta hai sine mein jo pinhan hota hai
phir un ki gali mein pahunchega phir sahw ka sajda kar lega
is dil pe bharosa kaun kare har roz musalman hota hai
wo dard ki us ne chhin liya wo dard ki us ki bakhshish tha
tanhai ki raaton mein 'insha' ab bhi mera mehman hota hai