abhi kuchh din lagenge

By

abhi kuchh din lagenge
dil aise shahr ke pamal ho jaane ka manzar bhulne mein
abhi kuchh din lagenge
jahan-e-rang ke sare khas-o-khashak sab sarw-o-sanobar bhulne mein abhi kuchh din lagenge
thake haare hue khwabon ke sahil par kahin ummid ka chhota sa ek ghar
bante bante rah gaya hai
wo ek ghar bhulne mein abhi kuchh din lagenge
magar ab din bhi kitne rah gae hain
bas ek din dil ki lauh-e-muntazir par
aachanak
raat utregi
meri be-nur aankhon ke khazane mein chhupe har khwab ki takmil kar degi
mujhe bhi khwab mein tabdil kar degi
ek aisa khwab jas ka dekhna mumkin nahin tha
ek aisa khwab jis ke daman-e-sad-chaak mein koi mubarak koi raushan din nahin tha
abhi kuchh din lagenge

tajahul-arifana

By

jauhri ko kya malum kis tarah ki mitti mein kaise phul hote hain
kis tarah ke phulon mein
kaisi bas hoti hai
jauhri ko kya malum
jauhri to sari umar pattharon mein rahta hai
zar-garon mein rahta hai
jauhri ko kya malum
ye to bas wahi jaane
jis ne apni mitti se
apna ek ek paiman
ustuwar rakkha ho
jis ne harf-e-paiman ka e'tibar rakkha ho
jauhri ko kya malum kis tarah ki mitti mein kaise phul hote hain
kis tarah ke phulon mein kaisi bas hoti hai

saughat

By

gul-danon mein saje hue phulon ko main ne
raat apni aaghosh mein le kar itna bhincha
sare rang aur sari khushbu ang ang
mein basi hui hai
sari duniya nai hui hai
par mujh ko in sab rangon aur khushbuon se dar lagta hai
jin ka muqaddar tanhai ho
ya phir aisi ruswai ho jis ki aag mein baras baras ke
saje hue manzar jal jaen
ghar jal jaen

raushan dil walon ke nam

By

dil ki aankh se khair ke sare raushan manzar dekhne walo!
hadd-e-nazar tak phaili hui sab raushniyon sare rangon ko
hat se chhu kar dekhne walo!
basti basti gulshan gulshan hansti hui sari hariyali
sab shadabi dil ke andar dekhne walo!
dil ke nur khazanon ka ek ek charagh jalae rakhna
imkanon ke har kuche mein ummidon ki har munder par
mustaqbil ke har raste mein khwab ki jot jagae rakhna
jugnu suraj chand sitare
jab tak raushan hain ye sare
hum aawaz diye jaenge
tum aawaz milae rakhna

qissa ek basant ka

By

patangen lutne walon ko kya malum kis ke hath ka manjha khara tha aur kis ki
dor halki thi
unhen is se gharaz kya pench padte waqt kin hathon mein larza aa gaya tha
aur kis ki khench achchhi thi?
hawa kis ki taraf thi, kaun si pali ki bairi thi?
patangen lutne walon ko kya malum?
unhen to bas basant aate hi apni apni dangen le ke maidanon mein aana hai
gali-kuchon mein kanti marna hai patangen lutna hai lut ke jauhar dikhana hai
patangen lutne walon ko kya malum kis ke hath ka manjha khara tha
aur kis ki dor halki thi?