dasht-e-be-samt mein rukna bhi safar aisa tha

dasht-e-be-samt mein rukna bhi safar aisa tha
zindagi bhagte guzri mujhe dar aisa tha
sanp lipte hue shakhon se samar zahr-bhare
jis ke sae mein lagi aankh shajar aisa tha
raat bhar aag barasti hai hawa jalti hai
sochta hun mere khwabon ka nagar aisa tha
aks-e-ummid bhi milta na tha sahraon mein
aankh tarsi thi sarabon ko safar aisa tha
dhundhta hun use nindon se tahi raaton mein
hae wo shakhs ki jo khwab-e-sahar aisa tha
ab ki lauta hun 'bukhari' to hun begana sa
mera is shahr se jaana to khabar aisa tha

bhar aain aankhen kisi bhuli yaad se sham ke manzar mein

bhar aain aankhen kisi bhuli yaad se sham ke manzar mein
do bunden meri hotin tere be-ant samundar mein
jo sairab karen teri sabza-gahen umr ke pani se
thodi si hariyali hoti un ke zard muqaddar mein
jin aankhon se rangon wali barish ka ek wada tha
wo aankhen to mitti ho gain subh-o-sham ke chakkar mein
aaj bhi dhup ke sajjade pe namaz-e-mashaqqat main ne padhi
aaj bhi malik dozakh rakh di tu ne mere bistar mein
kabhi kabhi is khoj mein dil ke darwaze tak jata hun
kis ne mujh se chhup kar meri umr guzari is ghar mein

be-KHabar mujhse mere dil mein hamesha hansta

be-khabar mujh se mere dil mein hamesha hansta
phul nargis ka surahi mein akela hansta
chalte chalte kahin ruk jati ye duniya ek pal
chand hansta ye hawa hansti ye sahra hansta
jaane kis soch mein aata hai guzar jata hai
roz ek roz meri umr mein hansta hansta
phad-phadate hue khwabon ke kabutar udte
der tak phir mere kamre mein andhera hansta
main ne tanhai mein jo us ko mukhatab kar ke
ki hain baaten unhen sunta to wo kitna hansta