wo rashk-e-mehr-o-qamar ghat par nahin aata

By

wo rashk-e-mehr-o-qamar ghat par nahin aata
kabhi andhere-ujale nazar nahin aata
ye kah do kucha-e-jaanan ke jaane walon se
udhar jo koi gaya phir idhar nahin aata
tilai-rang ye kya kya chale hain talwaren
kisi ke qabze mein wo kunj-e-zar nahin aata
wo na-tawan hun ki sunta nahin koi meri
wo zar hun ki kisi ko nazar nahin aata
meri taraf se ye ghaflat hai ham-safiron ko
chaman se ud ke kabhi ek par nahin aata
nahin nasib mein apni jo daulat-e-bedar
to khwab mein bhi mera swayamwar nahin aata
azab-e-naza hi qasid ka intizar mujhe
ajal hi aae agar nama-bar nahin aata
wo kaun log hain jin par huma hai saya-fagan
yahan to bum bhi baala-e-sar nahin aata
yahan wasila-e-rozi faqat hai yaad-e-khuda
ki hech-kara hain koi hunar nahin aata
bashar ko chahne anjam-e-kar ki kuchh fikr
jahan mein koi bar-e-digar nahin aata
sanam ko hath se jaane na dijiye ai 'bahr'
nikal ke musht-e-sadaf se guhar nahin aata

sina-kubi kar chuke gham kar chuke

By

sina-kubi kar chuke gham kar chuke
jite-ji hum apna matam kar chuke
dekhiye milte hain kis din yar se
id bhi kar len moharram kar chuke
dhyan un aankhon ka jaane ka nahin
ye hiran pale hue ram kar chuke
dil laga kar dukh uthae be-shumar
dam-shumari bhi koi dam kar chuke
ab kahan misl-e-anasir ittihad
chaar din wo rabt-e-baham kar chuke
ab to zulfon ko na rakkho fard fard
daftar-e-alam ko barham kar chuke
khak ab in aansuon ko rokiye
ye hamein ruswa-e-alam kar chuke
dida-o-dil ki badaulat ishq hain
roe barson muddaton gham kar chuke
wo hamein milta nahin kya kijiye
apni si to just-o-ju hum kar chuke
waizo jo chaho farmao hamein
baiat-e-pir-e-mughan hum kar chuke
'bahr' mustaghni hain fikr-e-sher se
gauhar-e-mani faraham kar chuke

saqi tere baghair hai mahfil se dil uchaT

By

saqi tere baghair hai mahfil se dil uchat
so jaise ji udas hai so dil se dil uchat
su-e-adam phire chale jate hain qafile
sab ham-safar hain zist hai manzil se dil uchat
jis rose se ki shauq-e-asiri hua mujhe
sayyaad hai shikar-e-anadil se dil uchat
thukrae bhi na aa ke lahad fatiha kuja
mar kar hua hun us but-e-qatil se dil uchat
juz marg kuchh nahin hai tap-e-hijr ka ilaj
hum naqsh chat kar hue aamil se dil uchat
kanton pe misl-e-qais kahan tak rawan-dawan
laila-e-jaan hai jism ki mahmil se dil uchat
dozakh mujhe bahisht ke badle qubul hai
aisa hun ek hur-shamail se dil uchat
jhankar se main chaar-qadam aage jaunga
zindan mein hua jo salasil se dil uchat
majnun ki chaal laila agar do-qadam chale
tabut dil-pasand ho mahmil se dil uchat
qatil hamare dil ko tadapta na chhod ja
ek dam ke waste na ho bismil se dil uchat
ai 'bahr' yar sath nahin jaiye kahan
gulshan se ji udas hai mahfil se dil uchat

sair us sabza-e-ariz ki hai dushwar bahut

By

sair us sabza-e-ariz ki hai dushwar bahut
ai dil-e-abla-pa rah mein hain khar bahut
lo na lo dil mujhe bhati nahin takrar bahut
muft bikta hai mera mal kharidar bahut
khush raho yar agar hum se ho bezar bahut
dil agar apna salamat hai to dildar bahut
gham nahin go hum akele hain aur aghyar bahut
haq agar apni taraf hai to taraf-dar bahut
panw phailao na ab to mere pas aane mein
ediyan tum ne ragadwai hain ai yar bahut
kya karunga main bhala bagh ijare le kar
aashiyanon ko hain ek musht-e-khas-o-khar bahut
tan rindon pe na kar shaikh khuda-lagti bol
us ke altaf bahut hain ki gunahgar bahut
kya zamane mein mohabbat ka maraz phaila hai
achchhe do-chaar nazar aate hain bimar bahut
lambe lambe tere baalon ka mujhe sauda hai
tul khinga meri jaan ye aazar bahut
talkhi-e-marg ka hargiz mujhe andesha nahin
baithi munh par hai mere yar ki talwar bahut
bas tumhaari yahi khu sakht buri lagti hai
thodi taqsir pe ho jate ho bezar bahut
ghar mein us but ke rasai na hui par na hui
'bahr' ne putli bhi gadi pas-e-diwar bahut

sab hasinon mein wo pyara KHub hai

By

sab hasinon mein wo pyara khub hai
ek chehra jism sara khub hai
aise mukhde ki balaen lijiye
bhola bhola pyara pyara khub hai
meri mahfil mein kabhi aate nahin
ghair ke ghar mein guzara khub hai
donon aankhen qatil-e-ushshaq hain
lashkar-e-mizhgan saf-ara khub hai
charkh par tum ko chadha kar dekhiye
kaun sa taron mein tara khub hai
tum jo aae jism mein jaan aa gai
jaan mein paira tumhaara khub hai
pas apne ho agar taswir-e-yar
zindagani ka sahaara khub hai
kyun milen hum aap se chori-chhupe
baat jo hai aashkara khub hai
tu kaha main ne to aazurda hue
ghair ki gali gawara khub hai
chand se badhti hai aankhon ki ziya
khub-ruon ka nazara khub hai
doston se inhiraf achchha nahin
dushmanon se bhi mudara khub hai
mang baalon mein hi kya hai aab-dar
dub-marne ko ye dhaara khub hai
aabru jati rahegi aap ki
'bahr' ab us se kinara khub hai

raushan hazar chand hain shams-o-qamar se aap

By

raushan hazar chand hain shams-o-qamar se aap
ghaeb hain par nigah ki surat nazar se aap
aankhen bichhate phirte hain mushtaq rah mein
kya jaaniye guzarte hain kis rahguzar se aap
roe koi gharib to hansna na chahiye
waqif nahin kisi ke fughan-e-asar se aap
kante bhare hain khat mein jo chhute nahin ise
itna na hath khinchiye meri khabar se aap
rahgir kyun tadapte hain tashwish thi mujhe
ab khul gaya ki jhankte hain chaak-e-dar se aap
hammam ne to aur bhi chamka diya badan
goya naha ke nikle hain aab-e-guhar se aap
laenge rah par ye rukh-o-zulf ek din
dekhenge sham tak mera rasta sahar se aap
aankhon ki tarah rone lagen rauzan-e-makan
puchhen hamara haal jo diwar-o-dar se aap
mirrikh-pan mizaj mein aaza mein nazuki
tegh-e-shua bandhiye apni kamar se aap
ai zahidan-e-khushk ye ghairat ka hai maqam
aagah aaj tak nahin khaliq ke ghar se aap
zahir hai murgh-e-qibla-numa bhi gawah hai
kabe ki samt puchhte hain jaanwar se aap
kyunkar malak kahun ki malak khadim aap ke
hain wo bashar ki malti hain khairul-bashar se aap
jo baat aap ki hai mashiyyat khuda ki hai
be-shubah mukhtalat hain qaza-o-qadar se aap
phisla hai mere aansuon mein panw aap ka
bande ka sar utariye aaj apne sar se aap
ai 'bahr' rahm khaega wo rone par zarur
dho rakhiye apne munh ko zara chashm-e-tar se aap