pani miT kar bhi rah gaya pani

pani mit kar bhi rah gaya pani
hue kya baat kah gaya pani
kat gaya bund bund mein patthar
chot patthar ki sah gaya pani
khwab bhi barf ke gharaunde the
jab khuli aankh rah gaya pani
shor kitna kiya tha lahron ne
ek tufan mein bah gaha pani
zindagi nam hai rawani ka
jate jate ye kah gaya pani
hum nazaron ko dekhte hi rahe
pul ke niche se bah gaya pani

miTti qadron mein bhi paband-e-wafa hain hum log

mitti qadron mein bhi paband-e-wafa hain hum log
kisi chalte hue jogi ki sada hain hum log
manzilen paoge hum khak-nashinon ke tufail
hum ne mana ki nishan-e-kaf-e-pa hain hum log
ahl-e-mai-khana hamein dekh ke hanste hain to kya
pir-e-mai-khana ko malum hai kya hain hum log
zindagi qaid ki muddat hai to ye bhi sach hai
apne na-karda gunahon ki saza hain hum log
jo abhi waqt ke gumbad mein hai mahfuz ai 'kaif'
aur palat kar nahin aai wo sada hain hum log

kis ko ham-safar samjhen jo bhi sath chalte hain

kis ko ham-safar samjhen jo bhi sath chalte hain
aashna se lagte hain ajnabi nikalte hain
ai meri sharik-e-gham kash tu samajh sakti
kitne an-bahe aansu qahqahon mein dhalte hain
raat ki khamoshi mein jab koi nahin hota
dil se biti yaadon ke qafile nikalte hain
tah-ba-tah andheron tak raushni to phailegi
ek raat ki zid mein sau charagh chalte hain
manzilon ke dhoke mein sathiyo na ruk jaana
manzilon se aage bhi raste nikalte hain

aasmanon se na utrega sahifa koi

aasmanon se na utrega sahifa koi
ai zamin dhund le ab apna masiha koi
phir dar-e-dil pe kisi yaad ne dastak di hai
phir baha kar mujhe le jaega dariya koi
ye to mahfil na hui maqtal-e-ehsas hua
aaina de ke mujhe le gaya chehra koi
kitne viran hain yaadon ke dar-o-baam na puchh
bhul kar bhi idhar aaya na parinda koi
main is aaseb-zada shahr mein kis se puchhun
kyun mere pichhe laga rahta hai saya koi
mangta hai mere aamal ka har rose hisab
'kaif' jo mujh mein raha karta hai mujh sa koi