ek rida-e-sabz ki KHwahish bahut mahngi paDi

By

ek rida-e-sabz ki khwahish bahut mahngi padi
waqt padne par hamein barish bahut mahngi padi
hath kya tape ki poron se dhuan uthne laga
sard rut mein garmi-e-atish bahut mahngi padi
mom ki sidhi pe chadh kar chhu rahe the aaftab
phul se chehron ko ye koshish bahut mahngi padi
khar-e-qismat kya nikale hath zakhmi kar liye
nakhun-e-tadbir ki kawish bahut mahngi padi
is amal ne to kahin ka bhi na rakkha dosto
khud ko chahe jaane ki khwahish bahut mahngi padi
zikr-e-qahat-e-rang se pahle hi tale pad gae
har lab-e-taswir ko jumbish bahut mahngi padi
tund-khu maujon ne 'sajid' chand sahil kha liye
bahr-e-shab mein amn ki koshish bahut mahngi padi

sang-dil hun is qadar aankhen bhigo sakta nahin

By

sang-dil hun is qadar aankhen bhigo sakta nahin
main ki pathrili zamin mein phul bo sakta nahin
lag chuke hain damanon par jitne ruswai ke dagh
in ko aansu kya samundar tak bhi dho sakta nahin
ek do dukh hon to phir un se karun ji-bhar ke pyar
sab ko sine se laga lun ye to ho sakta nahin
teri barbaadi pe ab aansu bahaun kis liye
main to khud apni tabahi par bhi ro sakta nahin
jis ne samjha ho hamesha dosti ko karobar
dosto wo to kisi ka dost ho sakta nahin
khwahishon ki nazr kar dun kis liye anmol ashk
kachche dhagon mein koi moti piro sakta nahin
main tere dar ka bhikari tu mere dar ka faqir
aadmi is daur mein khuddar ho sakta nahin
mujh ko itna bhi nahin hai surkh-ru hone ka shauq
be-sabab taza lahu ki fasl bo sakta nahin
yaad ke shoalon pe jalta hai agar mera badan
odh kar phulon ki chadar tu bhi so sakta nahin
hath jis se kuchh na aae us ki khwahish kyun karun
dudh ki manind main pani bilo sakta nahin

ek tabiat thi so wo bhi la-ubaali ho gai

By

ek tabiat thi so wo bhi la-ubaali ho gai
hae ye taswir bhi rangon se khali ho gai
padhte padhte thak gae sab log tahriren meri
likhte likhte shahr ki diwar kali ho gai
bagh ka sab se bada jo ped tha wo jhuk gaya
phal lage itne ki bojhal dali dali ho gai
ab tu darwaze se apne nam ki takhti utar
lafz nange ho gae shohrat bhi gali ho gai
khinch dala aankh ne sab aasmanon par hisar
ban chuke jab daere parkar khali ho gai
subh ko dekha to 'sajid' dil ke andar kuchh na tha
yaad ki basti bhi raaton-raat khali ho gai

us aaine mein dekhna hairat bhi aaegi

By

us aaine mein dekhna hairat bhi aaegi
ek roz mujh pe us ki tabiat bhi aaegi
qadghan laga na ashkon pe yaadon ke shahr mein
hoga agar tamasha to khilqat bhi aaegi
main aaina banunga tu patthar uthaega
ek din khuli sadak pe ye naubat bhi aaegi
mausam agar hai sard to phir aag tap le
chamkegi aankh khun mein hararat bhi aaegi
kuchh der aur shakh pe rahne de sabr kar
pakne de phal ko khane mein lazzat bhi aaegi
aankhen hain tere pas to phir sath-e-ab par
gahrai se ubhar ke ibarat bhi aaegi
niklen charagh hath mein le kar gharon se log
suraj ki rah mein manzil-e-zulmat bhi aaegi
ye jaanta to katta 'sajid' na sae ko
talwar par lahu ki tamazat bhi aaegi