wo shaKHs meri rasai se mawara bhi na tha

By

wo shakhs meri rasai se mawara bhi na tha
bashar bhi khair na hoga magar khuda bhi na tha
kaha shuur ne us waqt harf-e-qum mujh se
ki la-shuur jagane se jagta bhi na tha
ajab thi saat-e-aghaz-e-gulsitan-bandi
nawed-e-gul bhi na thi muzhda-e-saba bhi na tha
wo ibtida-e-safar ab bhi yaad aati hai
kisi mein meri rifaqat ka hausla bhi na tha
ghalat-numa-o-ghalat-bin hain baz aaine
is e'tiraaz ko naqqad manta bhi na tha
shahid-e-zauq-e-taghazzul tha kam-sukhan 'jafar'
ghazal ki baat na chalti to bolta bhi na tha

tariq-e-kohna pe ab nazm-e-gulistan na rahe

By

tariq-e-kohna pe ab nazm-e-gulistan na rahe
meri bahaar ko andesha-e-khizan na rahe
ye aarzu hai badal jae rasm-e-shahr-e-wafa
udas husn na ho ishq sar-garan na rahe
payam-e-wasl se dil bagh bagh ho jaen
labon pe shikwa-e-be-mehri-e-butan na rahe
tulu-e-mehr bade tuzk-o-ehtisham se ho
ufuq siyahi-e-shab se dhuan dhuan na rahe
samaaton pe musalsal ho naghmagi ka nuzul
nazar mein zisht-manazir ka karwan na rahe
masarraton ke pharere jahan mein lahraen
gham-o-alam ke liye gosha-e-aman na rahe
ba-ru-e-adl sabhi apna apna hissa len
aur ehtimal-e-ghalat bakhshi-e-mughan na rahe

kushad zehn-o-dil-o-gosh ki zarurat hai

By

kushad zehn-o-dil-o-gosh ki zarurat hai
ye zindagi hai yahan hosh ki zarurat hai
sunai degi yaqinan zamir ki aawaz
mukhatibin-e-subuk-gosh ki zarurat hai
ab ehtiyaj nahin sarw-qamaton ki mujhe
mujhe to ab kisi ham-dosh ki zarurat hai
kharosh-e-khum ka bharam kholna hai kya mushkil
bas ek rind-e-bala-nosh ki zarurat hai
nigar-e-subh ke aansu sametne ke liye
gulon ko wusat-e-aghosh ki zarurat hai
kahin faqat mutakallim sukut ki hajat
kahin takallum-e-khamosh ki zarurat hai

kitni saza mili hai mujhe arz-e-haal par

By

kitni saza mili hai mujhe arz-e-haal par
pahre lage hue hain meri bol-chaal par
kahte hain log joshish-e-fasl-e-bahaar hai
phulon ka jab mizaj na ho e'tidal par
tu apni siskiyon ko daba apne ashk ponchh
ai dost chhod de tu mujhe mere haal par
phir aaj ismaton ki jabin hai araq araq
tohmat lagi hai phir kisi mariyam-khisal par
mahsus barha ye hua hai ki zindagi
ek barf ki dali hai kaf-e-barshgal par

KHizan ke dosh pe hai fasl-e-gul ka raKHt abhi

By

khizan ke dosh pe hai fasl-e-gul ka rakht abhi
ki barg-o-bar se khali hai har darakht abhi
abhi ghamon se ibarat hai sar-nawisht-e-bashar
ki aasman pare hai zamin sakht abhi
samajh shua-e-burida na sirf jugnu ko
kiran kiran ka jigar hoga lakht lakht abhi
mata-e-jaan bhi use pesh kar chuka hun main
mere raqib ka lahja hai kyun karakht abhi
tamam raat raha mai-kada-nashin 'jafar'
gaya hai uth ke yahan se wo nek-bakht abhi

jaan-e-fikr-o-fan ab bhi ishq ki kahani hai

By

jaan-e-fikr-o-fan ab bhi ishq ki kahani hai
lafz hain nae lekin dastan purani hai
zindagi ke afsane ek se sahi lekin
jo meri kahani hai wo meri kahani hai
dekhta hai rah rah kar munh nigah walon ka
misra-e-gharib apna naqsha-e-be-zabani hai
iltifat farmaen ya taghaful apnaen
muddaa hasinon ka sirf jaan-sitani hai
pur-khata sahi 'jafar' be-wafa sahi 'jafar'
khair tum sahi haq par baat kya badhani hai