ye kahna us se ai qasid jo mahw-e-KHud-parasti hai

ye kahna us se ai qasid jo mahw-e-khud-parasti hai
ki tere dekhne ko aankh muddat se tarasti hai
bane hain jab se wo saqi maze ki mai-parasti hai
idhar mai hai piyalon mein udhar aankhon mein masti hai
teri aankhon ke sadqe ek duniya un mein basti hai
fusun hai sehr hai eajaz hai shokhi hai masti hai
tabahi dil mein rahti hai kharabi dil mein basti hai
yahi aabaad basti hai yahi viran basti hai
nigahon se milata hun nigahen is tamanna mein
wo mere dil mein aa jae jo un aankhon mein masti hai
wo jins-e-dil ki qimat puchhte hain main bataun kya
yahi mahngi si mahngi hai yahi sasti si sasti hai
na sahba hai na saghar hai na mina hai na khum saqi
mujhe jo mast karti hai teri aankhon ki masti hai
azal se haq-parasti but-parasti sunte aate hain
magar ye aap ka mashrab nirala khud-parasti hai
jawani ne diye hain un ko la kar ham-nashin kya kya
ada mein naz chitwan mein haya aankhon mein masti hai
madar-e-zindagi thahra nafas ki aamad-o-shud par
hawa ke zor se raushan charagh-e-bazm-e-hasti hai
tamasha hai meri rindi ki saghar hath mein le kar
har ek se puchhta hun main kahin thodi si masti hai
firaq-e-ruh kyunkar ho gawara jism-e-insan ko
ujad kar phir nahin aabaad hoti ye wo basti hai
wo mai-kash hun ki aata hai jo lab par nam tauba ka
to mujh par josh mein aa kar ghata kya kya barasti hai
ajab shai jins-e-ulfat hai ki dil jae to hath aae
hamesha ek qimat hai na mahngi hai na sasti hai
jabhi tak aks qaem hai ki aaina muqabil ho
hamari ye haqiqat hai hamari itni hasti hai
yaqin jaano ki munh dekhi mohabbat hum nahin rakhte
wo aaina hai jo warafta-e-surat-parasti hai
bahut jhatke na de dast-e-junun jaib-o-gareban ko
rahe tujh ko lihaz is ka purana rakht-e-hasti hai
dil-e-ashiq mein hasrat bhi hai arman bhi tamanna bhi
wo jis basti mein rahte hain badi aabaad basti hai
fana awwal bhi thi aakhir bhi hona hai fana hum ko
karen kya do adam ke bich mein ek apni hasti hai
'jalil' ustad ka kahna suno bandho kamar tum bhi
ajab basti madina hai jahan rahmat barasti hai

ye jo sar niche kiye baiThe hain

ye jo sar niche kiye baithe hain
jaan kitnon ki liye baithe hain
jaan hum sabza-e-khat par de kar
zahr ke ghont piye baithe hain
dil ko hum dhundte hain chaar taraf
aur yahan aap liye baithe hain
waizo chhedo na rindon ko bahut
ye samajh lo ki piye baithe hain
goshe aanchal ke tere sine par
hae kya chiz liye baithe hain
dast-e-wahshat ko khabar kar de koi
hum gareban siye baithe hain
hae puchho na tasawwur ke maze
god mein tum ko liye baithe hain
aap ke naz uthane wale
jaan ko sabr kiye baithe hain
bal jabin par hai khuda khair kare
aaj wo tegh liye baithe hain
is tawaqqo pe ki len wo talwar
sar hatheli pe liye baithe hain
jaan de denge tumhaare dar par
hum ab uthne ke liye baithe hain
zikr kya jam-o-subu ka ki 'jalil'
ek mai-khana piye baithe hain

qasid aaya magar jawab nahin

qasid aaya magar jawab nahin
mere likhe ka bhi jawab nahin
khum to hai saqiya sharab nahin
aasman hai aur aaftab nahin
ban ke but sab wo kah guzarte hain
be-dahani tera jawab nahin
subh hote wo ghar gae apne
ab nikalne ka aaftab nahin
nur wo hai ki kuchh nahin khulta
hai tere rukh pe ya naqab nahin
tur ke zikr par chamak utthe
baat ki in buton ko tab nahin
garche duniya hai aaina-khana
mera sani tera jawab nahin
ban gaya hai naqab chehre ki
ki utarta kabhi itab nahin
rukh se afshan chhuda ke kahte hain
aaj taron mein mahtab nahin
chand ko raat kya chhupaegi
zulf rukh ke liye naqab nahin
chadh ke utrengi tewriyan sau bar
kuchh ye chadhta hua shabab nahin
kuchh nahin mere be-shumar gunah
wo agar barsar-e-hisab nahin
dhal ke kahta hai chaudhwin ka chand
ek shab se siwa shabab nahin
mai to dhal kar rahegi ai saqi
kuchh ye mashuq ka shabab nahin
mai-kada bhi bahisht hai lekin
muft milti yahan sharab nahin
sun ke ye parde se nikal aae
teri taswir ka jawab nahin
aah ko sun ke munh chhupate ho
ek jhonke ki bhi naqab nahin
khatm hoti nahin hawas dil ki
ek tufan hai shabab nahin
dil jale jab maza hai rone ka
mai hai pani agar kabab nahin
ishq mein hai 'jalil' la-sani
husn mein yar ka jawab nahin

mujhko to maraz hai be-KHudi ka

mujh ko to maraz hai be-khudi ka
zahid ko guman hai mai-kashi ka
har rang hai tere aage phika
mahtab hai phul chandni ka
chal jaega kaam kuchh kisi ka
munh mud na gaya agar chhuri ka
har waqt hain maut ki duaen
allah re lutf zindagi ka
aaina bana rahe ho dil ko
dil tut na jae aarsi ka
hum kahte the jude mein nahin phul
aakhir nikla wo dil kisi ka
kahiye abhi ek ada pe kat jaen
dam dekhte the faqat chhuri ka
mitti nahin dushmani kisi ki
rang us mein hai meri dosti ka
bose ko jagah mili labon par
ab rang jamega kya misi ka
pyare pyare the phul se honth
dhabba ye bura laga misi ka
ithla ithla ke un ko chalna
mit jae bala se dil kisi ka
pate hain jo mujh ko ji se bezar
kahte hain maza hai aashiqi ka
hon ek se sab hasin kyunkar
hai rang juda kali kali ka
pahle to the mahw-e-did musa
ab lete maza hain be-khudi ka
samjhe the na hum ko tum pe marna
ho jaega rog zindagi ka
shokhi mazmun ki le udi hai
aalam hai sher mein pari ka
khinchen jo wo tir dil bhi de sath
haq kuchh to ada ho dosti ka
nale bulbul ke the ki chhuriyan
dil tukde hua kali kali ka
uthne na diya kisi ke dar se
ehsan hai mujh pe laghari ka
phulon se kaho ki roti hai os
ab is se maza nahin hansi ka
kahte the na hum 'jalil' tum se
anjam bura hai dil-lagi ka