sab badalte ja rahe hain sar-ba-sar apni jagah

By

sab badalte ja rahe hain sar-ba-sar apni jagah
dasht ab apni jagah baqi na ghar apni jagah
main bhi nadim hun ki sab ke sath chal sakta nahin
aur sharminda hain mere ham-safar apni jagah
kyun simatti ja rahi hain khud-ba-khud aabaadiyan
chhodte kyun ja rahe hain baam-o-dar apni jagah
jo kuchh in aankhon ne dekha hai main us ka kya karun
shahr mein phaili hui jhuti khabar apni jagah
main 'jamal' apni jagah se is liye hatta nahin
wo ghadi aa jae shayad laut kar apni jagah

milna nahin to yaad use karna bhi chhoD de

By

milna nahin to yaad use karna bhi chhod de
diwar chhod di hai to saya bhi chhod de
ek aadmi se tark-e-marasim ke baad ab
kya us gali se koi guzarna bhi chhod de
aana ab us ne chhod diya hai agar to kya
dil be-sabab charagh jalana bhi chhod de
mazbut kashtiyon ko bachane ke waste
dariya mein ek naw shikasta bhi chhod de
allah ki zamin badi hai bahut 'jamal'
izzat nahin jahan wahan rahna bhi chhod de

jamal ab to yahi rah gaya pata us ka

By

'jamal' ab to yahi rah gaya pata us ka
bhali si shakl thi achchha sa nam tha us ka
phir ek saya dar-o-baam par utar aaya
dil-o-nigah mein phir zikr chhid gaya us ka
kise khabar thi ki ye din bhi dekhna hoga
ab e'tibar bhi dil ko nahin raha us ka
jo mere zikr par ab qahqahe lagata hai
bichhadte waqt koi haal dekhta us ka
mujhe tabah kiya aur sab ki nazron mein
wo be-qusur raha ye kamal tha us ka
so kis se kijiye zikr-e-nazakat-e-khad-o-khal
koi mila hi nahin surat-ashna us ka
jo saya saya shab-o-roz mere sath raha
gali gali mein pata puchhta phira us ka
'jamal' us ne to thani thi umr-bhar ke liye
ye chaar rose mein kya haal ho gaya us ka