tujh mein kab husn-e-bahaar-e-gul ki ranai na thi

By

tujh mein kab husn-e-bahaar-e-gul ki ranai na thi
kab tere jalwon ki ek duniya tamashai na thi
zindagi-bhar aarzu ka khun hi hota raha
lab pe lekin ek din bhi aah tak aai na thi
ye ghalat hai mera sajda wajh-e-ruswai hua
rashk-e-mehrab-e-haram kab teri angdai na thi
ishq hai ek aatish-e-dil-soz mein jalne ka nam
hum ko to roz-e-azal ye baat samjhai na thi
hum rahe hain manzilon hi manzilon mein umr-bhar
jaise qismat mein kisi pahlu shakebai na thi
ek chaman kya do-jahan ki aafaton se dur tha
ghuncha-e-nauras ke lab tak jab hansi aai na thi
kya kahun 'jauhar' jo mere jaan-o-dil par ban gai
maut ka paigham tha ek sham-e-tanhai na thi

sameT kar tere jalwon ki raushni maine

By

samet kar tere jalwon ki raushni main ne
dil-o-nigah ki duniya sanwar li main ne
mizaj-e-husn kisi taur se badal na saka
gawara samjha gham-e-na-gawar bhi main ne
tamam sakhtiyan rah-e-talab ki sahl huin
tumhaare nam ki tasbih jab padhi main ne
tumhaara ishq hua hai kai ghamon ka sabab
ki ek jahan ki kharidi hai dushmani main ne
nuqush-e-pa pe jabin ain be-khudi mein rahi
bhulae kab bhala aadab-e-ashiqi main ne
ye kaun de gaya mujh ko sukun-e-qalb-o-nazar
ye kis ka nam liya tha abhi abhi main ne
meri hayat-e-do-roza ka kya buri ki bhali
guzarni padi 'jauhar' guzar di main ne

sabr-o-sukun kahan hai tere intizar mein

By

sabr-o-sukun kahan hai tere intizar mein
dil ikhtiyar mein na nazar ikhtiyar mein
furqat ki baat tak bhi gawara na thi jise
tare wo gin raha hai shab-e-intizar mein
allah re ye baada-e-rangin ki shokhiyan
zahid ko pini pad gai ab ki bahaar mein
yaad-e-jamal-e-dost ke qurban jaiye
taskin pa raha hun dil-e-be-qarar mein
jab tum ho mere pas khizan bhi bahaar hai
tum hi nahin to kaise lage dil bahaar mein
'jauhar' wo aaj aae hain thame hue jigar
kitna asar hai nala-e-be-ikhtiyar mein

ruKH hi badal diya hai gham-e-rozgar ka

By

rukh hi badal diya hai gham-e-rozgar ka
ye hausla hai kis ke dil-e-be-qarar ka
ai baghban na phul ko chutki se yun masal
yaad aaega bahut hi zamana bahaar ka
ai mere ishq tu hi bata kya jawab dun
wo haal puchhte hain dil-e-be-qarar ka
hum ne tumhaare ishq mein wo dagh khae hain
sine ka dagh dagh hai daman bahaar ka
tera jamal-e-husn ki mera junun-e-ishq
afsane ko na bakhsh de unwan dar ka
dar par nigah hath gareban pe dam-ba-khud
main ek mujassama hun tere intizar ka
misl-e-kalim husn se chashmak nahin pasand
hum jaante hain jit mein pahlu hai haar ka
kab us ke naqsh-e-pa pe na meri jabin jhuki
'jauhar' raha hai mujh pe karam kirdgar ka

raste zist ke dushwar nazar aate hain

By

raste zist ke dushwar nazar aate hain
log ulfat se bhi bezar nazar aate hain
jis ko dekho wo kharidar hua hai un ka
har taraf misr ke bazar nazar aate hain
bal hai abru pe nazar tez khuda khair kare
aaj kuchh hashr ke aasar nazar aate hain
manzil-e-ishq ki rahen hain bahut hi dushwar
har qadam par nae aazar nazar aate hain
kya kahun ek tere jalwe ke muqabil ai dost
chashm-o-dil donon hi bekar nazar aate hain
yaad aa jate hain wo jab bhi hamein ai 'jauhar'
har taraf matla-e-anwar nazar aate hain

rahraw se sarokar na manzil ki KHabar hai

By

rahraw se sarokar na manzil ki khabar hai
diwana-e-ulfat hai ki sargarm-e-safar hai
wan chah nahin milti hai yan chain nahin hai
taskin-e-dil-e-zar idhar hai na udhar hai
zarre hain ki garmae hue nur ke tare
ek barq-e-tapan hai ki teri rahguzar hai
ek ek ada hosh-talab dushman-e-iman
wo yusuf-e-sani ba-khuda rashk-e-qamar hai
aa mere jahan mein meri duniya ki tamanna
ab meri muradon ka jahan zer-o-zabar hai
gum-gashta-e-manzil hun mohabbat mein kuchh aisa
bikhra hua shiraaza-e-taskin-e-nazar hai
'jauhar' ye gham-e-rah ye dushwari-e-manzil
kahta hai mera dil ki qayamat ka safar hai