bazm se jab nigar uThta hai

By

bazm se jab nigar uthta hai
mere dil se ghubar uthta hai
main jo baitha hun to wo khush-qamat
dekh lo bar bar uthta hai
teri surat ko dekh kar meri jaan
khud-bakhud dil mein pyar uthta hai
us ki gul-gasht se rawish-ba-rawish
rang hi rang yar uthta hai
tere jate hi is kharabe se
shor-e-girya hazar uthta hai
kaun hai jis ko jaan aziz nahin
le tera jaan-nisar uthta hai
saf-ba-saf aa khade hue hain ghazal
dasht se khaksar uthta hai
hai ye tesha ki ek shoala sa
bar-sar-e-kohsar uthta hai
karb-e-tanhai hai wo shai ki khuda
aadmi ko pukar uthta hai
tu ne phir kasb-e-zar ka zikr kiya
kahin hum se ye bar uthta hai
lo wo majbur shahr-e-sahra se
aaj diwana-war uthta hai
apne yan to zamane walon ka
rose hi eatibar uthta hai
'jaun' uthta hai yun kaho yani
'mir'-o-'ghaalib' ka yar uthta hai

zikr-e-gul ho Khaar ki baaten karen

By

zikr-e-gul ho khar ki baaten karen
lazzat-o-azar ki baaten karen
hai masham-e-shauq mahrum-e-shamim
zulf-e-ambar-bar ki baaten karen
dur tak khali hai sahara-e-nazar
aahu-e-tatar ki baaten karen
aaj kuchh na-saz hai tab-e-khirad
nargis-e-bimar ki baaten karen
yusuf-e-kanan ka ho kuchh tazkira
misr ke bazar ki baaten karen
aao ai khufta-nasibo muflisho
daulat-e-bedar ki baaten karen
'jaun' aao karwan-dar-karwan
manzil-e-dushwar ki baaten karen

zikr bhi us se kya bhala mera

By

zikr bhi us se kya bhala mera
us se rishta hi kya raha mera
aaj mujh ko bahut bura kah kar
aap ne nam to liya mera
aakhiri baat tum se kahna hai
yaad rakhna na tum kaha mera
ab to kuchh bhi nahin hun main waise
kabhi wo bhi tha mubtala mera
wo bhi manzil talak pahunch jata
us ne dhunda nahin pata mera
tujh se mujh ko najat mil jae
to dua kar ki ho bhala mera
kya bataun bichhad gaya yaran
ek bilqis se saba mera

zaKHm-e-ummid bhar gaya kab ka

By

zakhm-e-ummid bhar gaya kab ka
qais to apne ghar gaya kab ka
ab to munh apna mat dikhao mujhe
naseho main sudhar gaya kab ka
aap ab puchhne ko aae hain
dil meri jaan mar gaya kab ka
aap ek aur nind le lije
qafila kuch kar gaya kab ka
mera fihrist se nikal do nam
main to khud se mukar gaya kab ka

yaad use intihai karte hain

By

yaad use intihai karte hain
so hum us ki burai karte hain
pasand aata hai dil se yusuf ko
wo jo yusuf ke bhai karte hain
hai badan khwab-e-wasl ka danggal
aao zor-azmai karte hain
us ko aur ghair ko khabar hi nahin
hum lagai bujhai karte hain
hum ajab hain ki us ki banhon mein
shikwa-e-narasai karte hain
haalat-e-wasl mein bhi hum donon
lamha lamha judai karte hain
aap jo meri jaan hain main dil hun
mujh se kaise judai karte hain
ba-wafa ek dusre se miyan
har-nafas bewafai karte hain
jo hain sarhad ke par se aae
wo bahut khud-satai karte hain
pal qayamat ke sud-khwar hain 'jaun'
ye abad ki kamai karte hain

wo kya kuchh na karne wale the

By

wo kya kuchh na karne wale the
bas koi dam mein marne wale the
the gile aur gard-e-baad ki sham
aur hum sab bikharne wale the
wo jo aata to us ki khushbu mein
aaj hum rang bharne wale the
sirf afsos hai ye tanz nahin
tum na sanwre sanwarne wale the
yun to marna hai ek bar magar
hum kai bar marne wale the