aa fasl-e-gul hai gharq-e-tamanna tere liye

aa fasl-e-gul hai gharq-e-tamanna tere liye
duba hua hai rang mein sahra tere liye
sahil pe sarw-e-naz ko de zahmat-e-khiram
bal kha raha hai khak pe dariya tere liye
ifa-e-ahd kar ki hai muddat se be-qarar
ruh-e-wafa-e-wada-e-farda tere liye
shanon pe ab to kakul-e-shab-rang khol de
bikhri hui hai zulf-e-tamanna tere liye
uth chashm-e-jawedana-e-saghar-farosh uth
machli hui hai larzish-e-sahba tere liye
ai aaftab-e-jalwa-e-jaanan buland ho
khoya hua hai matla-e-duniya tere liye
mauj-e-shamim-e-sumbul-o-raihan ke darmiyan
wa hai musahibat ka daricha tere liye
aa aur dad de ki bain chahsm-e-haq-nigar
khae hue hun zist ka dhoka tere liye
sabze ka farsh abr ka khema gulon ka itr
gulshan mein ehtimam hai kya kya tere liye
tughyan-e-gul shabab pe bulbul kharosh mein
ek hashr sa hai bagh mein barpa tere liye
'josh' aur nang-e-khidmat-e-sultan o pas-e-hosh
ye bhi kiye hue hai gawara tere liye

aao kabe se uThen su-e-sanam-KHana chalen

aao kabe se uthen su-e-sanam-khana chalen
taba-e-faqr kahe sawlat-e-shahana chalen
kanp uthe bargah-e-sar-e-afaf-e-malakut
yun maasi ka lundhate hue paimana chalen
aao ai zamzama-sanjaan-e-sara parda-e-gul
ba-hawa-e-nafas-e-taza-e-jaanana chalen
girya-e-nim-shab o aah-e-sahar-gahi ko
chang o barbat pe nachate hue turkana chalen
ta na mahsus ho wamandagi-e-rah-e-daraaz
zulf-e-khuban ka sunate hue afsana chalen
phenk kar subha o sajjada o dastar o kulah
ba rabab o daf o tambura o paimana chalen
naghma o saghar o taus o ghazal ke hamrah
su-e-khum-khana pai-e-sajda-e-rindana chalen
khushk zarron pe machal jae shamim o tasnim
sabt karte hue yun laghzish-e-mastana chalen
daman-e-'josh' mein phir bhar ke mata-e-kaunain
khidmat-e-pir-e-mughan mein pai-e-nazrana chalen

aazada-manish rah duniya mein parwa-e-ummid-o-bim na kar

aazada-manish rah duniya mein parwa-e-ummid-o-bim na kar
jab tak na milen fitrat ke qadam kham dekh sar-e-taslim na kar
sine mein hai us ke soz agar shaitan ke qadam le aankhon par
begana-e-dard-e-dil hai agar jibril ki bhi tazim na kar
kitni hi shuaen abr mein hon khurshid-e-junun par iman la
kitne hi dalael raushan hon danish ko kabhi taslim na kar
sanchon mein barabar dhalta ja raftar-e-jahan se pher na munh
tansikh to kya is daftar mein jina hai to kuchh tarmim na kar
ai 'josh' hujum-e-kulfat mein fariyaad o fughan se kaam na le
ghat jaega is se dil ka asar ajza-e-tapish taqsim na kar