chashm-e-KHun-KHwar abru-e-KHamdar donon ek hain

chashm-e-khun-khwar abru-e-khamdar donon ek hain
hain juda lekin ba-waqt-e-kar donon ek hain
bais-e-aram ye ne mojib-e-azar wo
chashm-e-wahdat mein hi gul aur khar donon ek hain
iltiyam-e-zakhm-e-dil ke haq mein gar kije nigah
sabza-e-khat marham-e-zangar donon ek hain
haalat istighna ki jis ke hath aai hai yahan
us ke nazdik andak o bisyar donon ek hain
mere us ke go judai aa gai hai darmiyan
jis ghadi baham hue do-chaar donon ek hain
jo na mane us ko aashiq ho ke us pe dekh le
abru-e-khamdar aur talwar donon ek hain
kya kahun main is ko aankhon ne diye hain jo fareb
fann-e-makkari mein ye makkar donon ek hain
jo hai kaba wo hi but-khana hai shaikh o barhaman
is ki nahaq karte ho takrar donon ek hain
ye nahin kahne ka 'joshish' hoga jo sahib-e-dimagh
zulf-e-yar o nafa-e-tatar donon ek hain

chhoDiye kis tarah se mai-noshi

chhodiye kis tarah se mai-noshi
zor-e-alam rakhe hai be-hoshi
ek nazar us ko dekhne paen
go mayassar na ho ham-aghoshi
qaid karna kisi ko hai manzur
zulf karti hai tujh se sargoshi
hun main sar-gashta misl-e-reg-e-rawan
kya kahun apni khana-bardoshi
wasf mein us dahan ke ai 'joshish'
hum ne ki ikhtiyar khamoshi

nala-e-dil ki to kotahi nahin

nala-e-dil ki to kotahi nahin
par asar kuchh us ko hota hi nahin
kitna wo qatil hai be-khauf-o-khatar
tegh-e-khun-aluda dhota hi nahin
us gali mein jis tarah rota hun main
us tarah to koi rota hi nahin
khar-zar-e-ishq ko kya ho gaya
panw mein kante chubhota hi nahin
tark ki lazzat se waqif kaun hain
gar na hota jaan khota hi nahin
jaanta gar dil hai mazra yas ka
tukhm-e-ummid is mein bota hi nahin
jon sukhan aata hai silk-e-nazm mein
yun koi moti pirota hi nahin
khwab mein 'joshish' wo aae kis tarah
aashiq-e-be-tab sota hi nahin