yaad aata hai to kya phirta hun ghabraya hua

yaad aata hai to kya phirta hun ghabraya hua
champai rang us ka aur jauban wo gadraya hua
baat hi awwal to wo karta nahin mujh se kabhi
aur jo bole hai kuchh munh se to sharmaya hua
ja ke phir aaun na jaun us gali mein daud daud
par karun kya main nahin phirta hai dal aaya hua
be-sabab jo mujh se hai wo shola-khu sargarm-e-jang
main to hairan hun ki ye kis ka hai bhadkaya hua
wo kare azm-e-safar to kijiye duniya se kuch
ye irada hum ne bhi dil mein hai thahraya hua
nok-e-mizhgan par dil-e-pazh-murda hai yun sar-nigun
shakh se jhuk aae hai jun phul murjhaya hua
jaun jaun kya lagaya hai miyan baithe raho
hun main apni zist se aage hi uktaya hua
teri duri se ye haalat ho gai apni ki aah
an-qarib-e-marg har ek apna ham-saya hua
kya kahen ab ishq kya kya hum se karta hai suluk
dil pe be-tabi ka ek pyaada hai bithlaya hua
hai qalaq se dil ki ye haalat meri ab tu ki main
chaar-su phirta hun apne ghar mein ghabraya hua
chupke chupke apne apne dil mein sab kahte hain log
kya bala wahshat hui hai is ko ya saya hua
hukm bar-e-majlis ab 'jurat' ko bhi ho jae ji
ye bichaara kab se darwaze pe hai aaya hua

jo roen dard-e-dil se tilmila kar

jo roen dard-e-dil se tilmila kar
to wo hansta hai kya kya khilkhila kar
yahi dekha ki uthwae gae bas
jo dekha tuk udhar ko aankh utha kar
bhala dekhen ye kin aankhon se kyun ji
kisi ko dekhna hum ko dikha kar
khada rahne na den wo ab ki jo shakhs
uthate the maze hum ko bitha kar
gaya wo dil bhi pahlu se ki jis ko
kabhi rote the chhati se laga kar
chali jati hai tu ai umr-e-rafta
ye hum ko kis musibat mein phansa kar
khat aaya wan se aisa jis se apna
nawishta khub samjhe hum padha kar
abhi ghar se nahin nikla wo tis par
chala ghar-bar ek aalam luta kar
diya dhadka use kuchh wasl mein hae
bigadi baat gardun ne bana kar
mohabbat in dino jo ghat gai wan
to kuchh pate nahin us pas ja kar
magar hum shauq ke ghalbe se har bar
khajil hote hain hath apna badha kar
nahin munh se nikalti us ke kuchh baat
kisi ne kya kaha 'jurat' se aa kar

tan mein dam rok main ba der rakha

tan mein dam rok main ba der rakha
aao ji kis ne tum ko gher rakha
hum gae wan to yan wo aaya wah
khub qismat ne her-pher rakha
kar gaya wo hi rah-e-ishq ko tai
yan qadam jis ne ho diler rakha
sab ko aajiz kiya falak ne par ek
aahu-e-dil pe gham ko sher rakha
ja ke baithe jo ku-e-yar mein hum
wan se bahar qadam na pher rakha
baad muddat wo dekh kar bola
kis ne yan khak ka ye dher rakha
shukr ai dard-e-ishq tu ne sada
zindagani se hum ko ser rakha
kaisa ghabra gaya wo kal hum ne
tuk jo raste mein us ko gher rakha
khair ho ya ilahi 'jurat' ne
aashiqi mein qadam ko pher rakha