kabhi firaq kabhi lazzat-e-visal mein rakh

By

kabhi firaq kabhi lazzat-e-visal mein rakh
mujh e'tidal se aari ko e'tidal mein rakh
nacha raha hai mujhe ungliyon pe ishq tera
tamam umr isi raqs-e-be-misal mein rakh
dukhi ho dil to utarti hai shairi mujh par
tujhe ghazal ki qasam hai mujhe malal mein rakh
tu chahta hai agar kar-e-afatab karun
mera uruj meri saat-e-zawal mein rakh
tere baghair guzari hai zindagi main ne
tu is sitam ki talafi bhi mah-o-sal mein rakh
tu dil hai aur dhdakna teri ibaadat hai
so khud ko jism se bahar bhi tu dhamal mein rakh
shikam se ho ke guzarte hain qaul-o-feal mere
mujh aise shakhs ko nan-o-namak ke jal mein rakh
mere badan ko bhale is se aag lag jae
charagh-e-harf magar mere baal baal mein rakh
main is azab ke nashshe mein mubtala hun 'kabir'
parai aag utha kar meri sifal mein rakh

jo aam sa ek sawal puchha to kya kahenge

By

jo aam sa ek sawal puchha to kya kahenge
kisi ne hum se bhi haal puchha to kya kahenge
jo sar ke bal khak mein gade hain kisi ne un se
bulandiyon ka maal puchha to kya kahenge
zamane-bhar ko to hum ne khamosh kar diya hai
jo dil ne bhi ek sawal puchha to kya kahenge
jinhen hamare lahu ki lat hai kisi ne un se
khumar-e-rizq-e-halal puchha to kya kahenge
jise ghazal mein barat ke hum dad pa chuke hain
kisi ne us dukh ka haal puchha to kya kahenge
agar hum us ki khushi mein khush hain to doston ne
jawaz-e-hizn-o-malal puchha to kya kahenge
ye hum jo auron ke dukh ka theka liye hue hain
kisi ne is ka maal puchha to kya kahenge
jo apni jaanen bacha ke khush hain 'kabir' un se
kisi ne basti ka haal puchha to kya kahenge

jahan sansen nahin chaltin wahan kya chal raha hai

By

jahan sansen nahin chaltin wahan kya chal raha hai
bahisht-e-khak mein ai raftagan kya chal raha hai
purane dukh nae kapde pahan kar aa gae hain
ye apne shahr mein aazurdagan kya chal raha hai
ye jin ke ashk meri jaan ko aae hue hain
main un se puchh baitha tha miyan kya chal raha hai
hamara bhuk ne munh bhar diya hai galiyon se
tumhaare bad-nasibon ke yahan kya chal raha hai
hain ashkon ke nishane par musalsal dukh hamare
ye chaalen hum se andoh-e-jahan kya chal raha hai
nadamat se main apna munh chhupata phir raha hun
ye mere doston ke darmiyan kya chal raha hai
yahan har rose honton ke gine jate hain tanke
tumhaare shahr mein shoala-bayan kya chal raha hai
chala kar goliyan mujh par parindon ko batao
jahan pinjre nahin bante wahan kya chal raha hai
to phir qabu kiya hai hijr kis jadu se tum ne
udasi gar nahin afsurda-gan kya chal raha hai
hamare rahbaron ko jaan ke lale pade hain
tumhaare rahbaron mein gumrahan kya chal raha hai

ham-sae se talab karun pani ke baad kya

By

ham-sae se talab karun pani ke baad kya
rahta hai hosh naql-e-makani ke baad kya
ye kaisi tod phod hai shahr-e-wujud mein
aatank mach gaya hai jawani ke baad kya
pani ke panw katne pe tul gae ho tum
dariya mein bach rahega rawani ke baad kya
baaton ke sath munh se tapakne laga hai khun
mar jaunga main hijr-bayani ke baad kiya
un ko bataunga jinhen huron se ishq hai
dar-asl hoga aalam-e-fani ke baad kya
main dekhta hun aankh mein khwabon ki mayyaten
tum dekhte ho ashk-fishani ke baad kya
sheron pe zulm karte hain jo jaante nahin
karna hai kaam misra-e-sani ke baad kya
kyun lafz lafz khodte ho sher ko 'kabir'
shair nikalna hai maani ke baad kya