phul hanse aur shabnam roi aai saba muskai dhup

By

phul hanse aur shabnam roi aai saba muskai dhup
yaad ka suraj zehn mein chamka palkon par lahrai dhup
ganw ki dharti banjh hui hai panghat suna suna hai
pipal ke patton mein chhup kar dhundhti hai tanhai dhup
koi kiran bhi kaam na aai jiwan ke andhiyare mein
mere ghar ke bahar lekin leti rahi angdai dhup
hum to sudh-budh kho baithe the hasti ke virane mein
jaane kab zulfen lahrain jaane kab sanwlai dhup

nafas nafas mein hun ek bu-e-sad-gulab liye

By

nafas nafas mein hun ek bu-e-sad-gulab liye
main jagta hun nigahon mein tere khwab liye
hamare ahd ke logon ko kya hua yaro
wo ji rahe hain magar ret ka sarab liye
main bhul sakta nahin hasrat-e-nazar us ki
wo ek shakhs jo guzra hai iztirab liye
udas raat ki tarikiyon ne chheda hai
ab aa bhi jao nigahon mein mahtab liye
ye chilchilati hui dhup jal raha hai badan
guzar rahi hai yunhi hasrat-e-sahab liye

aish-o-gham zindagi ke phere hain

By

aish-o-gham zindagi ke phere hain
shab ki aaghosh mein sawere hain
mai-kade se wafa ki manzil tak
hum faqiron ke here-phere hain
mujh ko mat dekh yun hiqarat se
main ne rukh zindagi ke phere hain
un ki zulfon ki narm chhanw mein
zindagi ke hasin sawere hain
main hun meamar-e-zindagi ai 'kaif'
donon aalam ke husn mere hain