hum un ko chhin kar lae hain kitne dawedaron se

By

hum un ko chhin kar lae hain kitne dawedaron se
shafaq se chandni-raaton se phulon se sitaron se
hamare zakhm-e-dil dagh-e-jigar kuchh milte-julte hain
gulon se gul-rukhon se mahwashon se mah-paron se
zamane mein kabhi bhi qismaten badla nahin kartin
umidon se bharoson se dilason se sahaaron se
sune koi to ab bhi raushni aawaz deti hai
guphaon se pahadon se bayabanon se ghaaron se
barabar ek pyasi ruh ki aawaz aati hai
kuon se pan-ghaton se naddiyon se aabshaaron se
kabhi patthar ke dil ai 'kaif' pighle hain na pighlenge
munajaton se fariyaadon se chikhon se pukaron se

etakaf mein zahid munh chhupae baiTha hai

By

etakaf mein zahid munh chhupae baitha hai
ghaaliban zamane se mat khae baitha hai
wae-ashiq-e-nadan kaenat ye teri
ek shikasta shishe ko dil banae baitha hai
taliban-e-did un ke dhup dhup phirte hain
ghair un ke kuche mein sae sae baitha hai
is taraf bhi ai sahab iltifat-e-yak-mizhgan
ek gharib mahfil mein sar jhukae baitha hai
dur-bash ai gulchin wa hai dida-e-nargis
aaj har gul-e-nazuk khar khae baitha hai
kyun suna nahin deta faisla muqaddar ka
nama-bar mere aage khat chhupae baitha hai
subh ki hawa un se sirf itna kah dena
koi shama ki ab tak lau badhae baitha hai