sarojini-naidu

By

aziz man meri hansmukh meri bahadur man
tamam jauhar-e-fitrat jaga diye tu ne
mohabbat apne chaman se gulon se kharon se
mohabbaton ke khazane luta diye tu ne
bana bana ke mitae gae nuqush-e-amal
tere baghair mukammal na ho saki taswir
wo khwab jhansi ki rani ko jis ne chaunkaya
tera gihad-e-musalsal usi ki hai tabir
use hayat ka sola singar kahte hain
teri jabin pe hain kuchh silwaten bhi tika bhi
nazar mein jazb-e-yaqin dil mein soz-e-azadi
dahakta phul bhi hai tu mahakta shoala bhi
zara zamin ko mehwar pe ghum lene de
samaj tujh se tera soz-o-saz mangegi
jamal sikhega khud-e'timadiyan tujh se
hayat-e-nau tere dil ka gudaz mangegi

zindagi

By

aaj andhera meri nas nas mein utar jaega
aankhen bujh jaengi bujh jaenge ehsas o shuur
aur ye sadiyon se jalta sa sulagta sa wajud
is se pahle ki sahar mathe pe shabnam chhidke
is se pahle ki meri beti ke wo phul se hath
garm rukhsar ko thandak bakhshen
is se pahle ki mere bete ka mazbut badan
tan-e-mafluj mein shakti bhar de
is se pahle ki meri biwi ke hont
mere honton ki tapish pi jaen
rakh ho jaega jalte jalte
aur phir rakh bikhar jaegi
zindagi kahne ko be-maya sahi
gham ka sarmaya sahi
main ne is ke liye kya kya na kiya
kabhi aasani se ek sans bhi yamraj ko apna na diya
aaj se pahle bahut pahle
isi aangan mein
dhup-bhare daman mein
main khada tha mere talwon se dhuan uthta tha
ek be-nam sa be-rang sa khauf
kachche ehsas pe chhaya tha ki jal jaunga
main pighal jaunga
aur pighal kar mera kamzor sa main
qatra qatra mere mathe se tapak jaega
ro raha tha magar ashkon ke baghair
chikhta tha magar aawaz na thi
maut lahraati thi sau shaklon mein
main ne har shakl ko ghabra ke khuda man liya
kat ke rakh diye sandal ke pur-asrar darakht
aur patthar se nikala shoala
aur raushan kiya apne se bada ek alaw
jaanwar zabh kiye itne ki khun ki lahren
panw se uth ke kamar tak aain
aur kamar se mere sar tak aain
som-ras main ne piya
raat din raqs kiya
nachte nachte talwe mere khun dene lage
mere aaza ki thakan
ban gai kanpte honton pe bhajan
haddiyan meri chatakhne lagin indhan ki tarah
mantar honton se tapakne lage roghan ki tarah
agni mata meri agni mata
sukhi lakdi ke ye bhaari kunde
jo teri bhent ko le aaya hun
un ko swikar kar aur aise dhadhak
ki machalte shoale khinch len josh mein
suraj ki sunahri zulfen
aag mein aag mile
jo amar kar de mujhe
aisa koi rag mile
agni man se bhi na jine ki sanad jab pai
zindagi ke nae imkan ne li angdai
aur kanon mein kahin dur se aawaz aai
buddham sharadam gachhami
dhammam sharadam gacchami
sangham sharadam gacchami
chaar abru ka safaya kar ke
be-sile wastr se dhanpa ye badan
ponchh ke patni ke mathe se damakti bindiya
sote bachchon ko bina pyar kiye
chal pada hath mein kashkol liye
chahta tha kahin bhiksha hi mein jiwan mil jae
jo kabhi band na ho dil ko wo dhadkan mil jae
mujh ko bhiksha mein magar zahr mila
hont tharrane lage jaise kare koi gila
jhuk ke suli se usi waqt kisi ne ye kaha
tere ek gal pe jis pal koi thappad mare
dusra gal bhi aage kar de
teri duniya mein bahut hinsa hai
us ke sine mein ahinsa bhar de
ki ye jine ka tariqa bhi hai andaz bhi hai
teri aawaz bhi hai meri aawaz bhi hai
main utha jis ko ahinsa ka sabaq sikhlane
mujh ko latka diya suli pe usi duniya ne
aa raha tha main kai kuchon se thokar kha kar
ek aawaz ne roka mujh ko
kisi minar se niche aa kar
allahu-akbar allahu-akbar
hua dil ko ye guman
ki ye pur-josh azan
maut se degi aman
phir to pahuncha main jahan
main ne dohrai kuchh aise ye azan
gunj utha sara jahan
allahu-akbar allahu-akbar
isi aawaz mein ek aur bhi gunja elan
kullo-man-alaiha-fan
ek taraf dhal gaya khurshid-e-jahan-tab ka sar
hua falij ka asar
phat gai nas koi shiryanon mein khun jam sa gaya
ho gaya zakhmi dimagh
aisa lagta tha ki bujh jaega jalta hai jo sadiyon se charagh
aaj andhera meri nas nas mein utar jaega
ye samundar jo badi der se tufani tha
aisa tadpa ki mere kamre ke andar aaya
aate aate wo mere waste amrit laya
aur lahra ke kaha
shiw ne ye bhejwaya hai lo piyo aur
aaj shiw ilm hai amrit hai amal
ab wo aasan hai jo dushwar tha kal
raat jo maut ka paigham liye aai thi
biwi bachchon ne mere
us ko khidki se pare phenk diya
aur jo wo zahr ka ek jam liye aai thi
us ne wo khud hi piya
subh utri jo samundar mein nahane ke liye
raat ki lash mili pani mein

wasiyyat

By

mere bete meri aankhen mere baad un ko de dena
jinhon ne ret mein sar gad rakkhe hain
aur aise mutmain hain jaise un ko
na koi dekhta hai aur na koi dekh sakta hai
magar ye waqt ki jasus nazren
jo pichha karti hain sab ka zamiron ke andhere tak
andhera nur par rahta hai ghaalib bas sawere tak
sawera hone wala hai
(2)
mere bete meri aankhen mere baad un ko de dena
kuchh andhe surma jo tir andhere mein chalate hain
sada dushman ka sina takte khud zakhm khate hain
laga kar jo watan ko daw par kursi bachate hain
bhuna kar khote sikke dharm ke jo pun kamate hain
jata do un ko aise thag kabhi pakde bhi jate hain
(3)
mere bete unhen thodi si khuddari bhi de dena
jo hakim qarz le ke is ko apni jit kahte hain
jahan rakhte hain sona rehn khud bhi rehn rahte hain
aur is ko bhi wo apni jit kahte hain
sharik-e-jurm hain ye sun ke jo khamosh rahte hain
qusur apna ye kya kam hai ki hum sab un ko sahte hain
(4)
mere bete mere baad un ko mera dil bhi de dena
ki jo shar rakhte hain sine mein apne dil nahin rakhte
hai un ki aastin mein wo bhi jo qatil nahin rakhte
jo chalte hain unhin raston pe jo manzil nahin rakhte
ye majnun apni nazron mein koi mahmil nahin rakhte
ye apne pas kuchh bhi fakhr ke qabil nahin rakhte
taras kha kar jinhen janta ne kursi par bithaya hai
wo khud se to na utthenge unhen tum hi utha dena
ghatai hai jinhon ne itni qimat apne sikke ki
ye zimma hai tumhaara un ki qimat tum ghata dena
jo wo phailaen daman ye wasiyyat yaad kar lena
unhen har chiz de dena par un ko wote mat dena

uljhanen

By

zaban ko tarjuman-e-gham banaun kis tarah 'kaifi'
main barg-e-gul se angare uthaun kis tarah 'kaifi'
samajh mein kis ki aae raaz mere hichkichane ka
andhere mein chala karta hai har nawak zamane ka
nigah-e-mast ki allah-re masum takiden
mujhe hai hukm saz-e-muflisi par gungunane ka
main saz-e-muflisi par gungunaun kis tarah 'kaifi'
hansi bhi meri nauha hai mera naghma bhi matam hai
junun bhi mujh se barham hai khirad bhi mujh se barham hai
sulagta shauq pighalte walwale jalti tamannaen
zamin meri jahannam hai falak mera jahannam hai
khayali jannaton mein baith jaun kis tarah 'kaifi'
ye tauq-e-bandagi wo phul si gardan maaz-allah
wo shahd-alud lab aur talkhi-e-shewan maaz-allah
kamal-e-husn aur ye inkisar-e-ishq are tauba
wo nazuk hath mera gosha-e-daman maaz-allah
jhatak kar gosha-e-daman chhudaun kis tarah 'kaifi'
nawed-e-subh sunta hi nahin rangin khwab us ka
ghira jata hai zulmat-rez kirnon mein shabab us ka
mujhe fursat nahin ranginiyon mein dub jaane ki
use deta ye dhoka e'tibar-e-intikhab us ka
haqiqat mast aaankhon ko dikhaun kis tarah 'kaifi'
fana mein huzn-dida zindagi zam hoti jati hai
thaki nabzon ki khasta zarb maddham hoti jati hai
ye armanon ka mausam ye meri girti hui sehhat
andheri raat aur lau shama ki kam hoti jati hai
shabistan-e-wafa ko jagmagaun kis tarah 'kaifi'
nirali jast karna hai nae raste pe chalna hai
nae shoalon mein tapna hai nae sanche mein dhalna hai
yahi do chaar sansen jo abhi mujh ko sambhaale hain
inhin do chaar sanson mein zamane ko badalna hai
inhen bhi sard giton mein ganwaun kis tarah 'kaifi'
pareshan qafile ne ab nishan manzil ka paya hai
dhundlakon ke udhar ek surkh tara jhilmilaya hai
chale hain hanpte insan nai duniya basane ko
bahut aise hain in mein jin ko khud main ne badhaya hai
main khud hi raste se laut aaun kis tarah 'kaifi'

tum

By

shaguftagi ka latafat ka shahkar ho tum
faqat bahaar nahin hasil-e-bahaar ho tum
jo ek phul mein hai qaid wo gulistan ho
jo ek kali mein hai pinhan wo lala-zar ho tum
halawaton ki tamanna, malahaton ki murad
ghurur kaliyon ka phulon ka inkisar ho tum
jise tarang mein fitrat ne gungunaya hai
wo bhairwin ho, wo dipak ho wo malhaar ho tum
tumhaare jism mein khwabida hain hazaron rag
nigah chhedti hai jis ko wo sitar ho tum
jise utha na saki justuju wo moti ho
jise na gundh saki aarzu wo haar ho tum
jise na bujh saka ishq wo paheli ho
jise samajh na saka pyar bhi wo pyar ho tum
khuda kare kisi daman mein jazb ho na saken
ye mere ashk-e-hasin jin se aashkar ho tum