shane ka bahut KHun-e-jigar jae hai pyare

By

shane ka bahut khun-e-jigar jae hai pyare
tab zulf kahin ta-ba-kamar jae hai pyare
jis din koi gham mujh pe guzar jae hai pyare
chehra tera us rose nikhar jae hai pyare
ek ghar bhi salamat nahin ab shahr-e-wafa mein
to aag lagane ko kidhar jae hai pyare
rahne de jafaon ki kadi dhup mein mujh ko
sae mein to har shakhs thahar jae hai pyare
wo baat zara si jise kahte hain gham-e-dil
samjhane mein ek umr guzar jae hai pyare
har-chand koi nam nahin meri ghazal mein
teri hi taraf sab ki nazar jae pyare

ye sitam ki mahfil-e-naz hai kalim isko aur sajae ja

By

ye sitam ki mahfil-e-naz hai 'kalim' is ko aur sajae ja
wo dikhaen raqs-e-sitamgari tu ghazal ka saz bajae ja
jo akad ke shan se jae hai pyar se ye batae ja
ki bulandiyon ki hai aarzu tu dilon mein pahle samae ja
wo jo zakhm den so qubul hai tere waste wahi phul hai
yahi ahl-e-dil ka usul hai wo rulae jaen tu gae ja
tera sidha sa wo bayan hai teri tuti-phuti zaban hai
tere pas hain yahi thekre tu mahal inhin se banae ja
wo jafa-shiar o sitam-ada tu sukhan-taraaz o ghazal-sara
wo tamam kante ugaenge tu tamam phul khilae ja
koi lakh zohra-jabin hai jise chahen hum wo hasin hai
'kalim' us sarapa ghurur ko zara aaina to dikhae ja

jab saba aai idhar zikr-e-bahaar aa hi gaya

By

jab saba aai idhar zikr-e-bahaar aa hi gaya
yaad hum ko inqalab-e-rozgar aa hi gaya
kis liye ab jabr ki taklif farmate hain aap
banda-parwar main to zer-e-ikhtiyar aa hi gaya
lala-o-gul par jo guzri hai guzarne dijiye
aap ko to mehrban lutf-e-bahaar aa hi gaya
dahr mein rasm-e-wafa badnam ho kar hi rahi
hum bachate hi rahe daman ghubar aa hi gaya
hans ke bole ab tujhe zanjir ki hajat nahin
un ko meri bebasi ka e'tibar aa hi gaya
shikwa-sanji apni aadat mein nahin dakhil magar
dil dukha to lab pe harf-e-nagawar aa hi gaya

gharaz kisi se na ai dosto kabhu rakhiyo

By

gharaz kisi se na ai dosto kabhu rakhiyo
bas apne hath yahan apni abru rakhiyo
zamana sang sahi aaine si khu rakhiyo
jo dil mein rakhiyo wahi sab ke ru-ba-ru rakhiyo
na jaane kaun use tod phod kar rakh de
bahut sambhaal ke is bazm mein subu rakhiyo
uda na dijiye sab gham ki rang-raliyon mein
bacha ke dil ke piyale mein kuchh lahu rakhiyo
yahi bachaegi shamshir-e-waqt se 'ajiz'
hamari baat qarib-e-rag-e-gulu rakhiyo

ba-in qaid-e-KHamoshi bhi ghazal-KHwan hama-tan hum hain

By

ba-in qaid-e-khamoshi bhi ghazal-khwan hama-tan hum hain
na paband-e-zaban hum hain na majbur-e-sukhan hum hain
gulistan mein sharik-e-sohbat-e-ahl-e-chaman hum hain
bas itni baat par kyun qabil-e-dar-o-rasan hum hain
jawab-e-zulm deti ja rahi hai apni mazlumi
idhar talwar rangin hai udhar rangin-kafan hum hain
khizan se kab ki buniyaad-e-gulistan gir chuki hoti
magar ye khairiyat hai zer-e-diwar-e-chaman hum hain
nasheman phunk kar samjhen ki sab kuchh phunk dala hai
hijab-e-gul mein baithe bijliyon par khanda-zan hum hain
agarche bazm mein hum bhi hain lekin farq kitna hai
waqar-e-anjuman tum ho wabaal-e-anjuman hum hain