buland-o-past haqiqat se aashna na hua

buland-o-past haqiqat se aashna na hua
wo dil ki jis mein koi harf-e-muddaa na hua
wo zinda dil tha main sahta raha gham-e-duniya
usi mein jaan di lekin gurez-pa na hua
chala jo shab ka musafir to is ada se chala
ki jab ruka to dar-e-subh runuma na hua
tumhin batao ki is dil ka kya kiya jae
jo chot kha ke bhi choton se aashna na hua
sitare tod liye hum ne zuhd-o-taqwa ke
magar jo haqq-e-ibaadat tha wo ada na hua
chale chalo ki abhi subh ki siyahi hai
sahar qarib hai tara koi hua na hua
'kalim' dard-e-mohabbat samajh mein kyun aae
wahi to dard hai jo dard-e-la-dawa na hua

inqilab-e-dahr ruk ruk kar jawan banta gaya

inqilab-e-dahr ruk ruk kar jawan banta gaya
jo subuk-sar tha wahi sang-e-garan banta gaya
naghma-e-dil jab badha aah-o-fughan banta gaya
aasman ek aur zer-e-asman banta gaya
jaane kya bhar di hain us ne is chaman mein shokhiyan
jo bhi aaya wo chaman ka raaz-dan banta gaya
har-nafas ko apni manzil ka pata milta nahin
jo jahan thahraw hain ek karwan banta gaya
sard aahon ka tasarruf ho to soz-e-dil kahan
dil se jo shoala utha wo bhi dhuan banta gaya
be-sabab hota nahin jazbaat-e-dil ka walwala
jis ne samjha aai apna raaz-dan banta gaya
kuchh bahaaron mein khizan hai kuchh khizan mein hai bahaar
phul murjhae to ghuncha gulistan banta gaya
aadmi ki asliyat ko aadmi samjha nahin
ek qatra tha jo bahr-e-be-karan banta gaya
hum to baithe hi rahe apni asiri ko liye
banne wala kaam be-wahm-o-guman banta gaya
'mir'-o-'ghaalib' se badhe to hazrat-e-iqbaal tak
shaghl sher-o-shaeri ka jawedan banta gaya
dahr mein ye bhi to hain qanun-e-fitrat ke usul
jo nazar se gir gaya wo dilsitan banta gaya
barq ki sar-garmiyan tasnim phir bhi ai 'kalim'
bijliyan girti rahen aur aashiyan banta gaya