zor-e-bazu bhi hai aur samne naKHchir bhi hai

zor-e-bazu bhi hai aur samne nakhchir bhi hai
dekhna ye hai ki tarkash mein koi tir bhi hai
kis tarah ishq-e-majazi ko haqiqi kar lun
samne tu hai baghal mein teri taswir bhi hai
kuchh nahin hai tere hathon mein lakiron ke siwa
baat naseh ki hai lekin khat-e-taqdir bhi hai
chhedti hai mujhe aa aa ke meri aazadi
go main qaidi hun mere panw mein zanjir bhi hai
mere hone ka mere hosh ko ehsas nahin
warna jo qatra-e-khun hai wo sharar-gir bhi hai
ahl-e-dil ke liye aazar hai duniya ko mufid
aql ek hosh hai aur hosh ki tabir bhi hai
koi samjhe ki na samjhe tere ashaar 'kalim'
zor-e-'ghaalib' bhi hai aur dilkashi-e-'mir' bhi hai

ye mohabbat hai mohabbat sargirani ho to kya

ye mohabbat hai mohabbat sargirani ho to kya
shiddat-e-gham se jigar ka khun pani ho to kya
ruh ban kar meri rag rag mein sarayat kar gaya
aise dard-e-dil ki koi tarjumani ho to kya
sard ho sakta nahin sargarm insan ka lahu
hadisat-e-nau-ba-nau mein zindagani ho to kya
apna jina ek dhoka apna marna ek fareb
zindagi se zindagi ki tarjumani ho to kya
har tarah khush khush rahi hai mujh se meri zindagi
mehrbani ho to kya na-mehrbani ho to kya
gham natija hai khushi ki intiha ka ai 'kalim'
dil ki ek ek mauj mauj-e-shadmani ho to kya

teri taskin ka sabab kaun-o-makan hai ki nahin

teri taskin ka sabab kaun-o-makan hai ki nahin
ruh-parwar ye jahan-e-guzaran hai ki nahin
din ki zau-tabiyan tarik fazaen shab ki
pichhli raaton ke dhundalke se ayan hai ki nahin
nara-e-dar-o-rasan hadisa-e-kaun-o-makan
khufta-jaanon ke liye khwab-e-giran hai ki nahin
khud kham-o-pech tujhe rah ke batla denge
teri thokar mein tera sud-o-ziyan hai ki nahin
teri zulfen tera rukh teri jabin teri nazar
ye chaman aaina-dida-waran hai ki nahin
is nazar se wo mujhe dekhte rahte hain 'kalim'
garm khun garm nafas garm-e-fughan hai ki nahin

surur-o-kaif hai kuchh lazzat-e-baqa to nahin

surur-o-kaif hai kuchh lazzat-e-baqa to nahin
ye ibtida ki haqiqat hai intiha to nahin
sitare tir nigahon se dekhte kyun hain
mera junun koi mere liye bala to nahin
fareb khae na kyun kar kisi ka sada dil
zamana-saz nigahon se aashna to nahin
kahin giri to hai bijli zara nazar kije
kisi gharib ki palti hui dua to nahin
hazar bar khizan se bahaar takrai
chaman ka raaz magar aaj tak khula to nahin
mizaj-e-husn mukaddar hai kyun khuda jaane
is aaine mein koi baal aa gaya to nahin
hujum-e-naz mein jalwa-farebiyon ke siwa
'kalim' aur koi hadisa hua to nahin

mohabbat mein na jaan ko jaan na dil ko dil samajhte hain

mohabbat mein na jaan ko jaan na dil ko dil samajhte hain
use aasan banate hain jise mushkil samajhte hain
hum apni zindagani ki taghayyur-khez rahon ko
kabhi jada samajhte hain kabhi manzil samajhte hain
hamara maqsad-e-awwal hai jazb-e-shauq-o-sar-masti
yahi wo zindagi hai jis ko hum kaamil samajhte hain
tu apne dil ki kamzori ko samjha hai na samjhega
wahi mushkil mein hain mushkil ko jo mushkil samajhte hain
'kalim' ahl-e-takallum ki subuk baaton se kyun uljhen
hum apni zindagi ko sahl ya mushkil samajhte hain

kaun le gaya dil se soz-o-saz-e-ranai

kaun le gaya dil se soz-o-saz-e-ranai
subh se jhalakti hai aaj sham-e-tanhai
dahr ki fazaon mein kaun raqs karta hai
kaun kar raha hai yun aap apni ruswai
ek ek nafas mein tha kaif-o-wajd ka aalam
dil ki bhul baitha ab zauq-e-naghma-pairai
dar-o-gir-e-duniya ko ai 'kalim' kya kahne
bas ki is zamane mein khamushi hai goyai