phir iztirab-e-shauq mein gham se mafar kahan

phir iztirab-e-shauq mein gham se mafar kahan
wo husn-e-iltifat wo husn-e-nazar kahan
tariki-e-hayat se ghabra gaya hai ji
dekhen shab-e-firaq ki phir ho sahar kahan
tere baghair mahfil-e-dil bhi udas hai
ai husn-e-na-shanas tujhe ye khabar kahan
ab tak samajh raha tha jise teri rahguzar
tha ek fareb-e-shauq teri rahguzar kahan
arsa hua ki bazm-e-tamanna ujad chuki
pahli si ab wo raunaq-e-sham-o-sahar kahan
jalwon ki tab la na saki dil ki aankh bhi
phir dekhe kis tarah koi tab-e-nazar kahan
ek chashm-e-lutf ka hai teri muntazir 'kalim'
warna jabin-e-shauq kahan sang-e-dar kahan

na ho jo unki tabiat wafa-shiar nahin

na ho jo un ki tabiat wafa-shiar nahin
hamein to talkhi-e-dauran bhi nagawar nahin
ye zarf zarf ki baaten hain is ka kya shikwa
hai shukr aap ki nazron mein sharmsar nahin
hamin ne khun se sincha hai ghuncha-o-gul ko
bahaar kahte hain jis ko wo ye bahaar nahin
nazar nazar hai fasana nafas nafas shikwa
hujum-e-yas mein sharminda-e-bahaar nahin
khizan-rasida bahaaron ka zikr kya ho 'kalim'
hamein to kuchh bhi mohabbat mein sazgar nahin

kisi ki jab se jafaon ka silsila na raha

kisi ki jab se jafaon ka silsila na raha
dil-e-hazin mein mohabbat ka hausla na raha
dayar-e-husn mein milti nahin hai jins-e-wafa
dil-e-gharib ka ab un se wasta na raha
hawa-e-yas ne sham-e-umid gul kar di
kisi se ab koi shikwa bhi barmala na raha
meri nazar ka taqaza bhala wo kya samjhen
ki husn-o-ishq mein pahla sa rabta na raha
ujad gaya hai kuchh is tarah ab dayar-e-wafa
kahin bhi meri tamanna ka naqsh-e-pa na raha
khudi na ho saki minnat-kash-e-nashat-e-wafa
hamara hath kabhi mail-e-dua na raha
'kalim' kaun musibat mein kis ka hota hai
dayar-e-dost mein koi bhi aashna na raha