raat phaili hai tere surmai aanchal ki tarah

By

raat phaili hai tere surmai aanchal ki tarah
chand nikla hai tujhe dhundne pagal ki tarah
khushk patton ki tarah log ude jate hain
shahr bhi ab to nazar aata hai jangal ki tarah
phir khayalon mein tere qurb ki khushbu jagi
phir barasne lagi aankhen meri baadal ki tarah
be-wafaon se wafa kar ke guzari hai hayat
main barasta raha viranon mein baadal ki tarah

raat ki zulfen bhigi bhigi aur aalam tanhai ka

By

raat ki zulfen bhigi bhigi aur aalam tanhai ka
kitne dard jaga deta hai ek jhonka purwai ka
udte lamhon ke daman mein teri yaad ki khushbu hai
pichhli raat ka chand hai ya hai aks teri angdai ka
kab se na jaane galiyon galiyon sae ki surat phirte hain
kis se dil ki baat karen hum shahr hai us har jai ka
ishq hamari barbaadi ko dil se duaen deta hai
hum se pahle itna raushan nam na tha ruswai ka
sher hamare sun kar aksar dil wale ro dete hain
hum bhi liye phirte hain dil mein dard kisi shahnai ka
tum ho 'kalim' ajab diwane baat anokhi karte ho
chah ka bhi arman hai dil mein khauf bhi hai ruswai ka

jab sar-e-sham koi yaad machal jati hai

By

jab sar-e-sham koi yaad machal jati hai
dil ke virane mein ek shama si jal jati hai
jab bhi aata hai kabhi tark-e-tamanna ka khayal
le ke ek mauj kahin dur nikal jati hai
ye hai mai-khana yahan waqt ka ehsas na kar
gardish-e-waqt yahan jam mein dhal jati hai
khwahish-e-zist gham-e-marg gham-e-sud-o-ziyan
zindagi chand khilaunon se bahal jati hai
jab wo hanste hue aate hain khayalon mein 'kalim'
sham-e-gham subh-e-masarrat mein badal jati hai

hai agarche shahr mein apni shanasai bahut

By

hai agarche shahr mein apni shanasai bahut
phir bhi rahta hai hamein ehsas-e-tanhai bahut
ab ye socha hai ki apni zat mein simte rahen
hum ne kar ke dekh li sab se shanasai bahut
munh chhupa kar aastin mein der tak rote rahe
raat dhalti chandni mein us ki yaad aai bahut
qatra qatra ashk-e-gham aankhon se aakhir bah gae
hum ne palkon ki unhen zanjir pahnai bahut
apna saya bhi juda lagta hai apni zat se
hum ne us se dil lagane ki saza pai bahut
ab to sail-e-dard tham jae sakun dil ko mile
zakhm-e-dil mein aa chuki hai ab to gahrai bahut
sham ke sayon ki surat phailte jate hain hum
lag rahi tang hum ko ghar ki angnai bahut
aaina ban ke wo surat samne jab aa gai
aks apna dekh kar mujh ko hansi aai bahut
wo sahar tarikiyon mein aaj bhi ru-posh hai
jis ke gham mein kho chuki aankhon ki binai bahut
main to jhonka tha asir-e-dam kya hota 'kalim'
us ne zulfon ki mujhe zanjir pahnai bahut