ye lamhat-e-nau mera kya le gae

ye lamhat-e-nau mera kya le gae
kuchh aansu gire the utha le gae
nadi nale qadren baha le gae
wafa le gae muddaa le gae
kise dhundte ho khadi naw par
sabhi fasle na-khuda le gae
ye kaise jhakole the pindar ke
mujhe pankh de kar uda le gae
chuna rahnuma un ko ye kya kiya
kahan se kahan naqsh-e-pa le gae
ghar aangan mein sone ka suraj kahan
kiran tak padosi chura le gae
labon par kahin 'kali-das' ab nahin
bade nam 'gupta-raza' le gae

qalam uThaun musalsal rawan-dawan likh dun

qalam uthaun musalsal rawan-dawan likh dun
koi padhe na pade main kahaniyan likh dun
jahan tak aaen tasawwur mein wadiyan likh dun
phir un pe nam tumhaara yahan wahan likh dun
jahan mile mujhe roti use likhun dharti
jahan pahunch na sakun us ko aasman likh dun
nikal chalun kahin husn-o-junun ke jangal mein
hiran ki aankh mein kajal ki doriyan likh dun
kahani khatm hui lekin is ka kya kije
jo lafz yaad ab aae unhen kahan likh dun
jo zehn mein hain huruf un ko kaam mein laun
jo dukh pade hi na hon un ki dastan likh dun
kuchh aisa patr likhun aap ko jo bha jae
mara hun aap ke gin apni khamiyan likh dun
ghazal to kah dun 'raza' ye bhi to ijazat ho
jise tu hindawi kahta tha wo zaban likh dun

mera dil ek sulagta sa kuan kyun

mera dil ek sulagta sa kuan kyun
yahan thahra hi karta hai dhuan kyun
wo thandi chhanw pedon ki wo jhonke
wahan kyun aap hain aur hum yahan kyun
koi malik koi mali nahin kya
chaman mein is tarah pagdandiyan kyun
ek aansu hi to tapka tha zamin par
wahin nikla tumhaara aastan kyun
tawana aarzu hum bhi tawana
wo dubli kanpti parchhaiyan kyun
jo lamhe ungliyon se chhin chuke hain
abhi tak kah rahe hain dastan kyun
khizan pal-bhar mein aaya chahti hai
diye jati hai khushbu loriyan kyun