uruj auron ko kuchh din hai ahrman ki tarah

uruj auron ko kuchh din hai ahrman ki tarah
farogh kis ko hai rindon ke bankpan ki tarah
mera khayal nahin hai to aur kya hoga
guzar gaya tere mathe se jo shikan ki tarah
ye sar-zamin-e-gul-o-lala so bhi jati hai
libaada barf ka odhe hue kafan ki tarah
kabhi to guzrunga is rahguzar se ho kar
khud apni tak mein baitha hun rahzan ki tarah
khizan ka khauf mujhe khae ja raha hai 'kamal'
chinar surkh na hon aatish-e-sukhan ki tarah

mera sar kab kisi darbar mein KHam hota hai

mera sar kab kisi darbar mein kham hota hai
kucha-e-yar mein lekin ye qadam hota hai
pursish-e-haal bhi itni ki main kuchh kah na sakun
is takalluf se karam ho to sitam hota hai
shaikh mai-khane mein karta hai iram ki baaten
isi mai-khane ka ek gosha iram hota hai
ek dil hai ki ujad jae to basta hi nahin
ek but-khana hai ujde to haram hota hai
rahbar ra-nawardi se pareshan hai 'kamal'
jis taraf jae mera naqsh-e-qadam hota hai