ye zikr aaine se subh-o-sham kis ka hai

ye zikr aaine se subh-o-sham kis ka hai
jo gungunate ho har-dam kalam kis ka hai
bhare hue hain sabhi sirf ek khali hai
agar ye mera nahin hai to jam kis ka hai
jo ahl-e-zarf hain pyase wahi hain mahfil mein
ye daur kis ka hai ye intizam kis ka hai
hamare nam pe kya kya nahin hua hai yahan
zara pata to chalao nizam kis ka hai
tumhaare raaz jo ifsha hue hain duniya par
nahin ye kaam tumhaara to kaam kis ka hai
nishan suragh na ho ye tumhaara tarz-e-khas
ye qatl-e-am magar tarz-e-am kis ka hai
'kamal' ne jo padha waqt-e-qatl maqtal mein
suna hua sa laga wo kalam kis ka hai

sharab-KHana tera aisa intiKHab nahin hai

sharab-khana tera aisa intikhab nahin hai
khawas pite hain sab ke liye sharab nahin hai
shikar zulm ka jo hain unhin pe hai har shiddat
wo jo hain zalim un par koi itab nahin hai
ye tera farz hai saqi mile sabhi ko barabar
hai tera mansab saqi koi khitab nahin hai
yahan to koi nahin aadmi sabhi hain farishte
mere alawa yahan par koi bhi kharab nahin hai
farogh-e-kaifiyat-e-baada se hua hai ye shadab
na padh ye chehra mera ye koi kitab nahin hai
sarab wahima nazron ke samne maujud
dhadak raha hai jo idrak mein sarab nahin hai

jin ankhDiyon mein na tha kuchh shararaton ke siwa

jin ankhdiyon mein na tha kuchh shararaton ke siwa
un ankhdiyon mein nahin kuchh bhi hasraton ke siwa
labon pe mauj-e-tabassum ka ahd bit gaya
labon pe aaj nahin kuchh shikayaton ke siwa
wo anjuman ka tasawwur kare to kaise kare
jise nasib na ho kuchh bhi khalwaton ke siwa
ek aaina hun junun-o-khirad ka aaina
meri nazar mein nahin kuchh bhi hairaton ke siwa
usi se puchh mere intizar ka aalam
jise na kuchh bhi mayassar ho fursaton ke siwa
gudaz-e-saghar-o-paimana kaun samjha hai
mere siwa mere dil ki nazakaton ke siwa
kami usi mein tamannaen jalwa-gar thin 'kamal'
kuchh aaj dil mein nahin hai jarahaton ke siwa

baadban

samundaron ki nil-gun faza-e-ab mein bhi raqs kar chuka hun bar-ha
mere liye koi ufuq ye aasman ki wusaten bhi ajnabi nahin
main in mein saikdon, hazaron zindagi ke git aatishin dhunon mein ga chuka
kisi ko dhund hi raha tha, kaun jaane kis ko dhundhta tha main
hazar bar dhundhta raha hun jis ko mausamon ke madd-o-jazr mein magar na pa saka
sitare dubne lage aur aandhiyon ki shiddaten habab ban ke rah gain
kisi ko dhund hi raha tha main sahar ki narm narm shabnamin fazaon mein
ki aap aa gain, aur aa ke chha gain samundar aur aasman ki be-karan khalaon mein
hazaron dastanen bahr-e-nilgun ki chashm-e-naz mein liye hue
hazaron mahr-o-mah ki tajalliyon ka jism aaina bana hua
main soch hi raha tha, lahren nabz-e-kaenat to nahin
ki ek lahr utthi jis ki barhami ke samne meri tamam quwwaten habab ban ke rah gain
kanar-e-ab ek pal main dekhte hi dekhte main phir pada hua tha ret par
mere badan ki ret ka har ek zarra ek aaina tha
aur jaane kitne aaftab jagmaga rahe the mere jism par
hazar main gunahgar hun to kya
ye mera jism khak-o-khun ka imtizaj hi sahi
hazar main gunah-gar hun to kya
ye zalzale ye aandhiyan ye barq o aatish o sharar mere mizaj hi sahi
magar sukun pa ke jab bhi shadman hua hun
gunguna utha hun muskura diya hun
mere is aahani mahal ke aastan pe aasman ki jannaten bhi sajda-rez ho gain
agar nahin hain nariyal ke sae sath-e-ab par to kya hua
magar bahut hi dur aa chuke hain sahilon ko chhod kar
uthao langar aur baadban khol do
hawaen tez hain to kya ye lahren shoala-rez hain to kya
uthao langar aur baadban khol do
main jaanta hun khub jaanta hun ek kaenat aur bhi hai
mawara-e-kaenat
baras raha hai amrit aasman se chandni ke rup mein
zamin zamin ki kaenat ke liye numu hai dhup mein
magar ye barg ye samar ye gulsitan baghair rang ke to kuchh nahin
sitare dubne lage to kya
ye lahren shoala-rez hain to kya
utho aur uth ke kashtiyon ke baadban khol do
ye kaun kahta hai ki lahron ka khuda koi nahin
ye lahren khub jaanti hain sahilon ka rasta