gul-o-saman ki tarah dil mein hans rahe hain hum

By

gul-o-saman ki tarah dil mein hans rahe hain hum
ye aur baat ba-zahir bujhe bujhe hain hum
koi bhi wahima gumrah kar nahin sakta
tere khayal ki zanjir mein bandhe hain hum
kabhi to uljha kiye kaise kaise logon se
kabhi to aise hua khud se lad pade hain hum
nigar-khane mein taswir-e-khasta-tar ki tarah
kisi ke samne kab se saje hue hain hum
kiye hain auron pe tanqid-o-tabsare lekin
khud apna jaeza ab tak na le sake hain hum
hamesha aap ko samjha ki aap apne hain
hamesha aap ne samjha ki dusre hain hum
'kamal' hum se khushamad kisi ki ho na saki
is e'tibar se mashhur sar-phire hain hum

dasht-e-gham se guzar raha hun main

By

dasht-e-gham se guzar raha hun main
tirgi mein nikhar raha hun main
waqt ne qadr ki nahin warna
waqt ka ham-safar raha hun main
bikhra bikhra hun ek muddat se
rafta rafta sanwar raha hun main
khud-numai ki har bulandi se
zina zina utar raha hun main
shukr tera ki ai junun-e-safar
khud se bhi be-khabar raha hun main
nam mera 'kamal' hai lekin
umr bhar be-asar raha hun main