zehn-o-dil par sawar rahti hai

By

zehn-o-dil par sawar rahti hai
shairi bhi usi ke jaisi hai
mat kaise ana ko deni hai
main ne tarkib soch rakkhi hai
azm jata hai le ke manzil tak
rah to sath sath chalti hai
main ne dekha hai waqt badle to
rang taswir bhi badalti hai
main ne mana ki der se hi sahi
khamushi apna kaam karti hai
mera taid karna lazim hai
baat un ki zaban se nikli hai
hum ko to sarhadon ne bant diya
us ka lahore meri dilli hai
be-khudi hai ajib shai 'adil'
ret mein machhliyan pakadti hai

mere kamre mein jo bikhri hui hai

By

mere kamre mein jo bikhri hui hai
ye virani kisi ki di hui hai
mujhe kal khwab mein sahra dikha tha
badan se khak si lipti hui hai
yaqinan hai usi ke tan ki khushbu
meri ghazlon mein jo mahki hui hai
adab wale adab se khelte hain
zaban-e-'mir' bhi kadwi hui hai
wo sachchai jise tum dhundhte ho
salib-o-dar par latki hui hai
kise kahte hain ghurbat jaanta hun
mere dalan mein kheli hui hai
sharafat ab haya iman-dari
kahan dhundhun kahan rakkhi hui hai
tu jis ki yaad mein duba hai 'adil'
wo kis ki soch mein khoi hui hai

junun ki aabiyari kar raha hun

By

junun ki aabiyari kar raha hun
main wahshat khud pe tari kar raha hun
chhupa kar zakhm apne qahqahon mein
ghamon ki parda-dari kar raha hun
ye duniya hai bhala kab mera maskan
yahan to shab-guzari kar raha hun
haqiqat mein ye ek banjar zamin thi
main jis par kasht-kari kar raha hun
zamin do-gaz nahin hai pas aur main
falak par dawe-dari kar raha hun
badan khud ho raha hai mera zakhmi
main kis par sang-bari kar raha hun
inhi amraaz mein khud hun mulawwis
main fatwe jin pe jari kar raha hun
falak wale to honge hi mukhalif
zamin walon se yari kar raha hun
kahan tum bhi ibaadat kar rahe ho
agar main duniya-dari kar raha hun
moattar hai badan khushbu se mera
gulon ki aabiyari kar raha hun
ye mana khak ka zarra hun 'adil'
hawaon par sawari kar raha hun

jo bahut be-ruKHi se milta hai

By

jo bahut be-rukhi se milta hai
kya karen dil usi se milta hai
sirf matlab ke waste ab to
aadmi aadmi se milta hai
wo likha hai kahan kitabon mein
jo sabaq zindagi se milta hai
martaba aaj bhi zamane mein
pyar se aajizi se milta hai
is ka darman nahin koi 'adil'
dard jo dosti se milta hai