zindagi kitna aazmaegi

zindagi kitna aazmaegi
aakhirash wo bhi haar jaegi
kis qadar pyas hai samundar ko
meri tishna-labi bataegi
kya khabar thi shab-e-firaq ke baad
zindagi khud bhi ruth jaegi
kya hua lab ko si diya bhi agar
khamushi dastan sunaegi
main use kaise bhul paunga
wo mujhe kaise bhul paegi
baad tark-e-talluqat 'saba'
aur bhi us ki yaad aaegi

tumhein bataun ki kis mashghale se aai hai

tumhein bataun ki kis mashghale se aai hai
meri nazar mein chamak ratjage se aai hai
khayal jaise hi aaya zara sa dam le lun
to ek sada-e-jaras qafile se aai hai
chamak rahi hai jabin naqsh-e-pa ki barakat se
wo bil-yaqin tere raste se aai hai
ye kya ajab hai ki mujh ko hi kuchh nahin malum
jo meri baat tere waste se aai hai
tum apne jism ki khushbu sambhaal kar rakhna
ye bahki bahki sada aaine se aai hai
bas itni zid thi musalla bichha ke pina hai
palat ke meri ana mai-kade se aai hai
jise bhulae zamana guzar chuka tha 'saba'
usi ki yaad bade walwale se aai hai

ilzam-e-tirgi ke sada us pe aae hain

ilzam-e-tirgi ke sada us pe aae hain
jis ne charagh apne lahu se jalae hain
shayad use hamari ana ka guman na tha
hum tishnagi patak ke samundar se aae hain
ye dilkashi subut hai ai jaan-e-shairi
phulon ne rang tere labon se churae hain
hairan hai wo bhi wusat-e-parwaz dekh kar
jis ne hamari fikr par pahre bithae hain
tark-e-talluqat pe wo bhi the gham-zada
aur hum bhi apni zat se jang haar aae hain
ab nam kya bataun ki gham kis ka hai 'saba'
aankhen meri zarur hain aansu parae hain

hota agar dabiz junun-e-safar ka rang

hota agar dabiz junun-e-safar ka rang
khud hi utarne lagta rah-e-pur-khatar ka rang
suraj ghurub hote hue mujh se kah gaya
kuchh to bata ki kaisa hai khun-e-jigar ka rang
ai ahliyan-e-amn-o-akhuwat main kya kahun
kis darja surkh hai tere diwar-o-dar ka rang
mana ki lab khamosh the aankhen to chup na thin
sab raaz fash kar gaya teri nazar ka rang
han ai amir-e-shahr zara aankh to mila
tujh ko bataun kya hai rukh-e-mo'atabar ka rang
main aasman odh ke soya raha 'saba'
ghurbat pe meri hansta raha shab qamar ka rang