wo jo ek fart-e-shadmani hai

By

wo jo ek fart-e-shadmani hai
hijr se wasl ki kahani hai
wasl us ka karan se ta-ba-karan
be-karani si be-karani hai
koi aatish-kada hai us ka badan
aag hai aur jawedani hai
us ki aankhen ki khwab-e-hairat hain
kaifiyat un mein dastani hai
hont us ke hain chashma-e-haiwan
un se pi lo to jawedani hai
us ki qamat hai rashk-e-sarw-e-iram
chaal bas khwab ki rawani hai
jis jagah par khila hai naf ka phul
wo to ek bagh-e-la-makani hai
koi jadu hai tu ki jaan-e-'nadim'
hawas-angez si kahani hai

wahi sar hai wahi sauda wahi wahshat hai miyan

By

wahi sar hai wahi sauda wahi wahshat hai miyan
ab bhi aa jao ki dil ki wahi khalwat hai miyan
wusat-e-did simatne hi nahin pati hai
chashm-e-ahu se hamein aaj bhi nisbat hai miyan
umr jab hijr-e-musalsal ki masafat mein kati
ye bhi kat jaegi ek din shab-e-furqat hai miyan
ku-e-dildar mein baqi nahin shorida-saran
shahr daryuza-gar-e-kucha-e-shohrat hai miyan
kyun na hum mauja-e-hairat se lipat kar sowen
wasl ab tere liye bhi to mashaqqat hai miyan
tum ne kya dekhe nahin shams-o-qamar nezon par
jashn-e-zulmat pe ab kaun si hairat hai miyan
farq-e-taban hai tera matla-e-khurshid magar
tere kakul mein chhupi sham-e-qayamat hai miyan
dasht-e-hasti mein bahut aabla-pai hai 'nadim'
sarhad-e-marg-e-musalsal to aziyyat hai miyan

supurdagi ka walwala jamal mein nahin mila

By

supurdagi ka walwala jamal mein nahin mila
mujhe fusun-e-be-khudi visal mein nahin mila
jo aaine se kirchiyon ke darmiyan ka tha safar
shikast-e-zat ki kisi misal mein nahin mila
alam-nasib sham mein hai mehr-e-jaan bujha bujha
nashat-e-ranj bhi mujhe maal mein nahin mila
hazar yasmin mushk-bu hun tere qurb mein
chaman ka aks tere khadd-o-khal mein nahin mila
wo sar-burida chand bhi ghurub ho gaya magar
sitara-e-sahar shab-e-zawal mein nahin mila
'nadim' har qadam pe dard-e-be-aman ka dar khula
sukun is jahan-e-be-misal mein nahin mila

rida-e-jaan pe dohra azab bunta hun

By

rida-e-jaan pe dohra azab bunta hun
main rose jagti aankhon mein khwab bunta hun
khayal-e-husn ki makhmal pe tar-e-imkan se
kabhi gulab kabhi mahtab bunta hun
ghubar-e-khatir-e-paiham se bujh bhi jaun agar
shab-e-siyah mein koi aaftab bunta hun
libas-e-shauq to muddat ka tar-tar hua
qaba-e-dard pe ab pech-o-tab bunta hun
tilism-e-zulf ki lahren dubo hi deti hain
kanar-e-sham jab mauj-e-sharab bunta hun
kabhi main baam-e-mah-e-nau pe dalta hun kamand
kabhi main khema-e-shahr-e-hijab bunta hun
sulag uthe hai jo sahra bhi pa-e-wahshat se
to kar-gah-e-junun par sahab bunta hun
jab ek khwab ka makhmal ho tar-tar 'nadim'
main dasht-e-wahm mein phir ek sarab bunta hun

raat ko pahlu mein ek taswir raushan ho gai

By

raat ko pahlu mein ek taswir raushan ho gai
khwab to dekha nahin tabir raushan ho gai
us but-e-kafir ko jo dekha bahut nazdik se
naqsh-gar ki shokhi-e-tahrir raushan ho gai
dasht-e-wahshat mein ghubar-e-naqa-e-laila to hai
hasrat ai pa-e-junun zanjir raushan ho gai
zakhm-e-naumidi charaghan kar rahe hain zist mein
dagh kya raushan hue taqdir raushan ho gai
us ki aankhon mein umad aaya sitaron ka hujum
gul-kade mein shauq ki tanwir raushan ho gai
aarzuen sab shikasta khwab sare munhadim
mere ghar mein raunaq-e-tamir raushan ho gai
saz-e-dil-dari pe naghma-zan hui sham-e-visal
mauj-e-gul ki khubi-e-taqrir raushan ho gai
raqs farmane lage sab ranj-o-gham soz-o-alam
sham-e-mina jal uthi tasir raushan ho gai
umr-e-zindan mein guzari par 'nadim' itna to hai
mashal-e-khurshid se zanjir raushan ho gai

phir chhalakta hai jam wahshat ka

By

phir chhalakta hai jam wahshat ka
shah-e-khuban salam wahshat ka
ek chashm-e-ghazal karti hai
chaar-su ehtimam wahshat ka
wo giran-gosh ho hama-tan-gosh
to sunaun kalam wahshat ka
chaak hai ab tera gareban bhi
dekh le intiqam wahshat ka
mauj-e-hairat safar mein rakhti hai
dhundhta hun qayam wahshat ka
aaj to baghban ne gulshan mein
ek bichhaya hai dam wahshat ka
ek taraf mauja-e-sukun hai 'nadim'
ek jaanib khiram wahshat ka