humse kis ka kaam banega koi kya le jaega

By

hum se kis ka kaam banega koi kya le jaega
apna chhappar phunkne wala pas hamare aaega
hum hain nigode hum hain bhagode hum hain nikamme hum kahil
jis dam mahfil rang pe hogi hum se raha na jaega
ghuncha ghuncha zahr-aluda buta buta saghar-e-sam
is gulshan mein ishq ka naghma chhed to mana jaega
wae qayamat sar hai salamat sune pade hain dar-o-rasan
hum ko baghi kaun kahega rahbar kaun banega
'soz' hamare baad jahan ko yaad hamari aaegi
khasta dilon ki aah-o-buka ko bijli kaun banega

aankh kholi hai to ye dekh ke pachhtae hain

By

aankh kholi hai to ye dekh ke pachhtae hain
log ghazlon se bahut dur nikal aae hain
wo jo dukh sahte the uf tak bhi nahin karte the
aaj saf bandh ke maidan mein utar aae hain
khun hi khun nazar aata hai ta-hadd-e-nazar
kis ke naqsh-e-kaf-e-pa arsh pe lahrae hain
aaj ye soch ke larzan hai jafa-ju ka ghurur
qumqume kis liye dharti pe utar aae hain
kaamran hone ka ushshaq ko dete hain payam
ye khat-o-khal jo kohre se ubhar aae hain
kal talak shaikh gurezan bhi the bezar bhi the
aaj kuchh baat hai jo 'soz' ke ghar aae hain

a zist hamein tang na kar is se ziyaada

By

a zist hamein tang na kar is se ziyaada
itna to saha hum ne magar is se ziyaada
hum khud bhi kamar bandh ke tayyar hain qasid
kya hogi tere pas khabar is se ziyaada
ye dil ki dua hai ise kuchh kam na samajhiye
hoga abhi kuchh aur asar is se ziyaada
ye soch ke kal raat hamein nind na aai
kal hogi giran aur sahar is se ziyaada
mumkin hai ye hangama abhi bas na samajh 'soz'
karni ho tujhe umr basar is se ziyaada