pahla jashn-e-azadi

By

ai hind ke bashindo aao ujda gulzar saja dalen
ab daur-e-ghulami khatm hua ek taza jahan ki bina dalen
ab hind ki asli id hui jo aazadi ki did hui
padh padh ke namaz-e-azadi ab ruthe huon ko mana dalen
kashti bhi nai dariya bhi naya sahil bhi naya mallah bhi nae
ab kar ke bharosa himmat par tufan mein rah bana dalen
hain ranj-o-khusumat ek roda rah-e-azadi mein ab bhi
hum ranj purane dur karen bichhdon ko gale se laga dalen
jo mulk tha sone ki chidiya bandhan ne use pamal kiya
ghurbat ko yahan se dur karen phir dudh ki nahren bana dalen
phir bos se yodhdha paida hon jo hind ki qismat jag uthe
ek bar zamane par sikka phir madar-e-hind bitha dalen
is budhe himala parbat se phir nur ka chashma-e-ahl uthe
is mel-o-mohabbat ke jal se har bashi ko nahla dalen
ye hind ki aazadi goya kul mashriq ki aazadi hai
phir mashriq mashriq ban jae jo zulm ke daur mita dalen
'anwar' ki dua hai ai maula phir hind ki qismat jag uthe
bichhde aapas mein mil jaen hum ruthe hue ko mana dalen

hae bapu teri duhai hai

By

khu-e-azad jis ne pai hai
us ke qabze mein kul khudai hai
un se main bhi ye baat kahta hun
jin ki taqdir mein burai hai
apne mazi pe dal lo nazren
kis qadar kis ne ki bhalai hai
baat aai zaban pe kahta hun
ye to bandon hi ki khudai hai
rok kar gala kar rahe hain black
qaht ki har taraf dahai hai
kitne theke mein ab ki bar bache
kitni rishwat ki daulat aai hai
apne apnon ko puchhta hai har ek
ahl-e-taqat hi ki ban aai hai
gar minister hai aap ka sala
to collector bana jamai hai
hai jo engineer sifarish se
phir to theke mein is ka bhai hai
khauf hai kis ka raj hai apna
apna hi sara aana-pai hai
rozi aur rozgar hain un ke
hum gharibon ka haq gadai hai
in ka zariya hai ye kamane ka
dekhne hi ki parsai hai
kis se ja kar 'kanwal' kare fariyaad
hae bapu teri duhai hai
aaj phir se august aaya hai
sab ke ghar mein khushi hi chhai hai
sal-e-ainda ke kamane ko
tum ne scheme kya banai hai

gandhi-jayanti par

By

uthi chaaron taraf se jab ki zulm-o-jabr ki aandhi
payam-e-amn le kar aa gae ruh-e-zaman gandhi
bane hindostan ke waste wo rahbar-e-kaamil
tawassul se unhi ke pai hum ne apni khud manzil
hui raushan ujale se dayar-e-hind ki wadi
jalai is tarah ki aap ne ek sham-e-azadi
unhi ne jabr se angrez ke hum ko chhudaya tha
sadaqat ka sharafat ka hamein rasta bataya tha
dikhai rah wo hum ko jo gautam ne dikhai thi
batai baat wo phir se jo isa ne batai thi
ukhuwwat ke wo dariya the mohabbat ke wo sahil the
ahinsa ke wo dai the wo yak-jehti ke qail the
sabaq phir se padhaya tha jahan-bhar ko bhalai ka
zamana aaj bhi mashkur hai us haq ke dai ka
gharibon ki nahifon ki hamesha dast-giri ki
na parwa ki musibat ki na parwa ki asiri ki
hamare dil munawwar kar diye nur-e-mohabbat se
hue aagah ahl-e-dahr ramz-e-adamiyat se
watan ke aasman par ek rakhshanda sitare the
hamein ye fakhr hai ahl-e-jahan gandhi hamare the

tarana-e-watan

By

rashk-e-firdaus hai tera rangin chaman
tujh pe gul-bash karte hain koh-o-daman
tere mathe ki rekha hain gang-o-jaman
teri mitti mein khwabida hain fikr-o-fan
fakhr-e-yunan thi teri bazm-e-kuhan
mere hindustan mere pyare watan
dewtaon ki rishiyon ki ye sarzamin
zarra zarra teri khak ka hai hasin
chumta hai qamar roz teri jabin
tere jalwe na hon kis liye dil-nashin
tere zarre mein khurshid ki hai kiran
mere hindustan mere pyare watan
tere qadmon ki zinat hai godawari
hai himala ka parbat tera santari
hai haqiqat mein kashmir jannat teri
zarre zarre mein tere hai ek zindagi
desh ki shan hai taj ka bankpan
mere hindustan mere pyare watan
kis bala ki kashish tere kharon mein hai
auj firdaus pinhan bahaaron mein hai
ek naya bankpan kohsaron mein hai
dilkashi kis qadar chand taron mein hai
hai zamane se aala teri anjuman
mere hindustan mere pyare watan
mera mandir hai tu mera kaba hai tu
mera malja hai tu mera mawa hai tu
meri uqba hai tu meri duniya hai tu
mera hai saz-e-dil mera naghma hai tu
meri har sans tere liye naghma-zan
mere hindustan mere pyare watan
sab ko ulfat ke markaz pe launga main
ekta ka diya phir jalaunga main
apne hathon watan ko sajaunga main
prem ke git har waqt gaunga main
is tarah ka banaunga main sangthan
mere hindustan mere pyare watan
khun se apne dunga tujhe zindagi
tere phulon ko dunga nirali khushi
zarre zarre ko bakhshunga main raushni
sab ko aisi sunaunga main ragni
shanti ki bahaunga gang-o-jaman
mere hindustan mere pyare watan

holi khelne ki farmaish par

By

hai ye ahbab ko israr ki holi khelun
tod dun aaj to main zohd-o-taqaddus ka fusun
mast ho kar main piyun jam-e-sharab-e-hasti
hama-tan baada-e-ishrat ke nashe mein jhumun
apni sanjida rawish aur udasi chhodun
gham ke asnam ko but-khana-e-dil mein todun
jal uthen gham ke shabistan mein masarrat ke charagh
barbat-e-dil ke har ek tar ko phir se jodun
mujh ko bahlaenge kya ahl-e-tarab ke naghme
aur tyauhaar ki rangin khushi ke lamhe
main ne har naqsh-e-masarrat ko daba rakkha hai
aur dekhe hain hasin daur ke sundar sapne
suni suni nazar aati hai bisat-e-hasti
na kahin shisha-o-saghar na surur-o-masti
chashm-e-muflis mein larazte hue ashkon ke charagh
qalb-e-nadar hai jaise koi ujdi basti
aaj insan ka insan lahu pita hai
aaj tahzib ka sultan yunhi jita hai
dewta jabr pe rawan ke hirasan jaise
daman-e-arman ko nadar yunhi sita hai
aaj insan hua makr-o-dagha ka daftar
qalb-e-zardar hai ehsas-e-khudi ka khugar
be-khabar ho ke gharibon ki dabi aahon se
aadmi kibr-o-raunat ka bana hai paikar
holiyan khelte hain khun-e-bashar se munim
apne aamal pe hota nahin insan nadim
aah aflas se thukrai jawani ka shabab
fikr ki dhup se larzan hai misal-e-mujrim
qalb-e-mahkum hai is daur mein sunsan dayar
ho gaya hai dil-e-majbur dukhon se bezar
kya na aaega kabhi dahr mein parhalad ka daur
aag holi ki kisi roz banegi gulzar
mutmain aaj na duniya ka makin hai koi
dahr mein kibr se khali na jabin hai koi
aaj zardar bana baitha hai hiranyakashyap
aah is daur mein dam-saz nahin hai koi
har taraf kibr-o-raunat ke sulagte hain alaw
har taraf zist ke gulshan mein hai shoalon ka jamaw
aaj phir holika parhalad ko le baithi hai
phir se is jalti hui aag ko gulzar banao
phir badalne hain mujhe bekas-o-majbur ke bhag
aaj bhi daste hain nadar ko zardar ke nag
jazb-e-ehsas ke shoalon ki tapish se ek din
zar ki lanka mein laga dena hai ek bar phir aag

diwali aai

By

chaar jaanib hai yahi shor diwali aai
sal-e-mazi ki tarah lai hai khushiyan imsal
yun to har shakhs masarrat se khila jata hai
phir bhi bachche hue jate hain khushi se behaal
har bashar mahw hai is jashn ki tayyari mein
taki khushiyon ka qamar aur ziya-bakhsh hai
kar rahe hain sabhi mil-jul ke safai ghar ki
un ki koshish hai ki tabinda har ek naqsh bane
utar aae hain zamin par bhi falak se tare
daman-e-charkh mein ai dosto kya rakkha hai
rashk-aflak nazar aati hai har ek basti
aaj dharti ko bhi aakash bana rakkha hai
saf-shaffaf chamakte hue pur-nur makan
sehn-e-gulshan mein khile jaise hon rangin gulab
jhil mein tairte hon nur se mamur kanwal
ya utar aae hon gardun se hazaron mahtab
mujh ko bhati nahin wallah main sach kahta hun
zahiri aur dikhawe ki sajawat yaro
jab ki aazad hain sab mulk bhi apna aazad
mujh ko achchhi nahin lagti hai banawat ab to
hum ne ajdad ki aadat bhula rakkhi hain
un ki nazron mein to har qaum barabar thi kanwal
wo samajhte the har ek qaum ko apna bhai
un ki is baat ke shahid hain abhi dasht-o-jabal
dasht mein ram ne shabri ki ziyafat khai
bhilni ke yahan khane mein bhi inkar na tha
kya bataenge ye arbab-e-khirad ab mujh ko
ghair sugriw shri-ram ka kya yar na tha
ram ki fauj mein har qaum ke afrad na the
kya hanuman na the fauj ki un ki salar
main karun us ki shikayat to nahin hai beja
kya tumhein aaj haqiqat mein hai ajdad se pyar
kya tumhein chhut ka ye dars buzurgon ne diya
kya tumhein firqa-parasti ki ijazat di thi
ram ke manne walo kabhi itna socha
kya buzurgon ne kisi qaum se nafrat ki thi
mera kahna hai yahi hind ke bashindon se
qalb ki apne safai karo pahle yaro
dil mein nafrat ki siyahi ki jo aamezish hai
aab-e-ulfat se dhulai karo pahle yaro
ab to ulfat ke charaghon ko jala kar pahle
ghar mein har ek ke nai jot jagana hai tumhein
nur-e-ulfat se sajaana hai nae bhaarat ko
mil ke tyauhaar diwali ka manana hai tumhein
mujh ko khwahish hai usi shan ki diwali ki
laxmi desh mein ulfat ki shab-o-roz rahe
desh ko pyar se mehnat se sanwaren mil kar
ahl-e-bhaarat ke dilon mein ye 'kanwal' soz rahe