yun na pine mein basar umr ki har sham karo

yun na pine mein basar umr ki har sham karo
shauq-e-rindi hai to saqi se nazar aam karo
phir na aaenge nazar aise muqaddas chehre
jo baqa bakhshen unhen duniya mein wo kaam karo
hai kudurat se to phir bhik se thokar achchhi
apni badnami se achchha hai mera nam karo
but hain das bis magar chahne wala dil ek
ek ek kar ke mohabbat se unhen ram karo
chhed do zikr kisi nargis-e-mastana ka
samne mere na tum zikr-e-mai-o-jam karo
tum ko fursat ho agar banne-sanwarne se nadim
ishq farmane se behtar hai ki aaram karo
jaisa gum-sum hai 'kanwal' chot hai gahri khai
aaj tum us ko rula do to bada kaam karo

ubhar aaya ruKH par haya ka nagina

ubhar aaya rukh par haya ka nagina
jabin par na dekha tha aisa pasina
chali aa rahi hai hasinon ki toli
zamin par hai qaus-e-quzah ka qarina
mere hath aa hi chala tha kinara
laga dubne mere dil ka safina
kasak soi rahti hai barson kabhi to
jo jage to jage mahina mahina
bhala kaun jaane wo aaen na aaen
mere pas rahne hi do jam-o-mina
kabhi tum ne dekhi hain pur-khar rahen
jo kahte ho ulfat ko phulon ka zina
uda li jo chori se galon ki chutki
to bole 'kanwal' bhi hai kitna kamina

shama ki lau se khelte dekhe hain maine parwane do

shama ki lau se khelte dekhe hain main ne parwane do
ek to maut se khel raha hai ek kahta hai jaane do
mere badan par tum barsao pyar ki shabnam husn ki aag
yun ghul-mil kar ek nazar se hum padh len afsane do
jin par jaan luta di main ne wo hi mujh se barham hain
rone par pabandi hai to qahqaha ek lagane do
tum ne pilai jitni pilai dekho hain pyase rind abhi
saqi-gari se hath na khincho sab ki dua lo aane do
mai se main tauba kar lunga ye lo meri tauba hai
pahle mere hathon mein apni aankhon ke mai-khane do
us ka kaam hai kahta rahna apna kaam hai sun lena
waiz bhi apna hai 'kanwal' tum waz use farmane do