hum kis shab-e-siyah ke daman mein bas gae

By

hum kis shab-e-siyah ke daman mein bas gae
teri ziya-e-rukh ko dil-o-jaan taras gae
murjha rahi hain apni umangon ki konplen
baadal na jaane kaun si jaanib baras gae
ujde the dil so ujde hue hain kuchh aur bhi
kya kya na warna kucha-o-bazar bas gae
aawargan-e-shauq ne manzil na ki qubul
gulshan ka dar khula to wo su-e-qafas gae
hai hijr-e-dostan bhi karam dard-e-jaan-faza
aankhon mein jo base the wo ab dil mein bas gae

dil mein tufan uThate hue jazbaat bhi hain

By

dil mein tufan uthate hue jazbaat bhi hain
hum hain khamosh ki kuchh apni riwayat bhi hain
mohtasib hi se nahin nala-ba-lab jam-o-subu
sang uthae hue khud ahl-e-kharabaat bhi hain
mastiyon mein kabhi mil jate hain insan ab bhi
jaise sahraon mein shadab maqamat bhi hain
dekhiye mujh se wo kab aa ke gale milta hai
the jo mere wahi ab ghair ke haalat bhi hain
ashk hi ashk nahin ghaur se dekhoge agar
in sulagti hui aankhon mein hikayat bhi hain
un ke daman pe lahu kis ko yaqin aaega
jin ke chehron pe taqaddus ki alamat bhi hain
kya kahin kaun si rahon mein hain pamal 'karam'
hum ki zinda hain magar kushta-haalat bhi hain

ba-qadr-e-shauq nahin lutf-e-mahfil-arai

By

ba-qadr-e-shauq nahin lutf-e-mahfil-arai
shadid-tar hai sar-e-bazm apni tanhai
kahan wo shoala-nawai kahan ye khamoshi
badal gae hain zamane ki tere saudai
meri fughan ko to samjhenge log mera junun
tera sukut na ban jae wajh-e-ruswai
sadaf sadaf hai shikar-e-talatum-e-dariya
kisi guhar mein to paida ho shan-e-yaktai
na fikr-o-hosh na qalb-o-nazar na zarf-o-zamir
naya jahan hai nai khusrawi-o-darai
charagh-e-rah-e-mohabbat thi khak-e-ahl-e-wafa
qadam qadam pe 'karam' raushni nazar aai