la-intiha abhi

na jaane wo log gum kahan hain
chhalak rahi thi
falak ke saghar se rahmat-e-haq ki tund sahba
faza-e-ayyam mein mohabbat ki fakhtaen bhi
pankh phailae ud rahi thin
dayar-e-jarman mein jhankti thin
ummid-e-farda ki narm kirnen
magar ye aashob-e-waqt ka hai asar ki jis se
jhulas gae hain tasawwuron ke hasin chehre
faza bhi khamosh ruh betab
dur mandir ke dewta chup
dhadakte dil ki ye sansanahat
khisakte patton ki sarsarahat
pade hain khamosh khokhle mandiron ke naqus
bujhe pade hain tamaddunon ke hasin fanus
yahan ajanta ka aur konark ka
fann-e-takhliq hichkiyan le raha hai paiham
yahan to ab saumon mein aur masjidon mein
ghar kar chuke hain takhrib ke ababil
nafas nafas mein ghutan ka jazba
ragon mein talkhi hai zahr-e-gham ki
bhatakte rahne ko ab khala ke siwa nahin kuchh
gae the jo log us taraf se
unhin ka hai intizar hum ko
wo aaenge kab wo aaenge kab
yahan ahinsa ko ghun laga hai
yahan mohabbat ki wadiyon mein ugi hai kai
payam-e-insaniyat ko goya lagi hai dimak
wo dard-e-dil ki lawen
jo misl-e-charagh jalti rahi thin sadiyon
na jaane kyun aaj bujh chuki hain
nazar ko dhundla rahi hai kyun dur ki siyahi
gae the kuchh log jo udhar se
unhin ka hai intizar hum ko
falak ke la-intiha abhi main
na jaane wo log gum kahan hain

jo lamhe TuT chuke un ko joDte kyun ho

jo lamhe tut chuke un ko jodte kyun ho
ye jud gae to unhen phir se todte kyun ho
mizaj-e-shams badal jaega to kya hoga
jo zarre soe hain un ko jhinjhodte kyun ho
kab aansuon se mita hai shigaf-e-aina
jo shisha tut chuka us ko jodte kyun ho
ye ret hai yahan mit jaenge tamam nuqush
tum apna naqsh-e-qadam us pe chhodte kyun ho
tumhaari samt zamana bil-akhir aaega
tum apni fikr ki samton ko modte kyun ho
tumhaari aankhon ne bakhshi hai gul ko namkini
tum apni aankhon mein jalwe nichodte kyun ho
'karamat' aise mein sanson ka haal kya hoga
sisakte lamhon ki gardan marodte kyun ho

hath aa gaya hai jab se shuur-e-KHudi ka sanp

hath aa gaya hai jab se shuur-e-khudi ka sanp
sine pe lotta hai gham-e-zindagi ka sanp
apne badan se khol ana ka utar kar
phunkarta hai sham-o-sahar aagahi ka sanp
main khelta hun us se magar jaanta hun ye
ek din mujhe dasega nai raushni ka sanp
kyun man ka mor pankh na apne samet le
aangan mein khelta hai gham-e-ashiqi ka sanp
mauj-e-sarab ka bhi pata dur tak nahin
shiddat se das raha hai mujhe tishnagi ka sanp
tahzib ka khandar hai nigahon ke samne
wo rengta hai dekhiye ek khamushi ka sanp
kyun nilkanth ban ke na pi jaun us ko main
jo zahr ugal raha hai gham-e-agahi ka sanp

dil ka har ek zaKHm gahra hai

dil ka har ek zakhm gahra hai
is se har waqt khun rista hai
dam liya hum ne gham ke sae mein
warna har samt khushk sahra hai
us ko kis tarah main bhula deta
jis ka har dam khayal aata hai
bujh gaya jab se apne dil ka charagh
chandni ka bhi rang phika hai
ek sahaara mila hai gham ka hamein
warna duniya mein kaun kis ka hai
yun to kaunain mere samne hain
kaun meri nazar mein tujh sa hai
ye batae koi 'karamat' se
mukhtalif sab se us ka lahja hai