masham-e-bulubul mein rashk-e-gul ki hunuz bu bhi nahin gai hai

masham-e-bulubul mein rashk-e-gul ki hunuz bu bhi nahin gai hai
abhi wo nam-e-khuda hai ghuncha nasim chhu bhi nahin gai hai
na ishq surme ka ne misi ka na shauq ghamze ka ne hansi ka
guman ho gar tum ko aarsi ka so ru-ba-ru bhi nahin gai hai
bala ko us ki khabar hai kahte hain kis ko mashuq kya hai aashiq
hunuz kanon mein us pari ke ye guftugu bhi nahin gai hai
yaqin nahin mujh ko qais-e-giryan ke haal se us ko aagahi ho
nikal ke matlab se apne laila kinar-e-ju bhi nahin gai hai
'shahidi' itni guman-parasti nashe mein sab bhul baithe hasti
hui hai us se hi tum ko masti jo ta-gulu bhi nahin gai hai

manzil safar-e-ishq ki zinhaar na TuTe

manzil safar-e-ishq ki zinhaar na tute
jab tak kamar-e-qafila-e-salar na tute
is pand se dil naseh-e-din-dar na tute
but todne mein kabe ki diwar na tute
be-fikr rahe banda-e-naqab-e-rukh-e-jaanan
hum se kabhi qufl-e-dar-e-gulzar na tute
jab tak na gawara ho tujhe naza ki talkhi
parhez tera ai dil-e-bimar na tute
har rose ho jab saikdon ushshaq ka chaurang
ai shokh kahan tak teri talwar na tute
sar patkun jo diwar se kahta hai wo zalim
bas bas mere ghar ki kahin diwar na tute
beja hai teri garmi-e-bazar ka shikwa
kyun jins nai pa ke kharidar na tute
qismat mein ho go manzil-e-maqsad ka pahunchna
par aabla-e-pa mein sar-e-khar na tute
aasan hai 'shahidi' ki agar dil-shikani ho
par shart ye hai khatir-e-aghyar na tute

dar-parda sitam hum pe wo kar jate hain kaise

dar-parda sitam hum pe wo kar jate hain kaise
gar kije gila saf mukar jate hain kaise
aane mein to sau tarah ki sohbat thi shab-e-wasl
dekhenge par ab uth ke sahar jate hain kaise
ranjish ka meri pas nahin aap ko mutlaq
barham tujhe hum dekh ke dar jate hain kaise
ghusse mein naya rang nikale hain pari-ru
jun-jun ye bigadte hain sanwar jate hain kaise
is sahib-e-ismat ko yahi soch hai har subh
be-wajh mere baal bikhar jate hain kaise
ayyam musibat ke to kate nahin katte
din aish ke ghadiyon mein guzar jate hain kaise
wo waqt to aane de bata denge 'shahidi'
bin aae kisi shakhs pe mar jate hain kaise