ki KHwab tha bas tumhaara aana

By

tumhaari aankhen khushi ki khwahish liye hui thin
tumhaari sochon mein ahd-e-mazi ki silwaten thin
tumhaare gesu ghumarti ghirti ghataon ke kuchh ghanere baadal bane hue the
qadam badhae nazar jhukae badan badan churae aa rahi thi
hawaen bhi gunguna rahi thin
kali kali muskura rahi thi
khizan-rasida chaman mein jaise bahaar chupke se aa rahi thi
magar achanak
ye khwab tuta to main ne dekha
rida-e-shab pe koi sitara nahin tha baqi
jahan judai ke sare lamhe gale mile the wahan mohabbat ki mang bharne ko shabnam utri
khizan-rasida badan-darida wo shab-gazida udas lamhe!
ajib wahshat jaga rahe the
wajud se wo adam ki duniya mein ja rahe the
ki khwab tha bas tumhaara aana

dasht-e-ajnabiyat mein

By

dasht-e-ajnabiyat mein
aashnai ki chhanw
sath chhod jae to
har taraf bagulon ka
raqs gher leta hai
dasht-e-ajnabiyat mein
aashnai ki chhanw
sath chhod jae to
yas gher leti hai
aas ke jazire ko
aur is jazire ko
kab kisi ne dekha hai
dasht-e-ajnabiyat mein
aashnai ki chhanw
sath chhod jae to
baadalon ke sae bhi
sargiran se rahte hain
zindagi ke chehre se
rang ruth jate hain
rang ruth jaana to
maut ki alamat hai
dasht-e-ajnabiyat mein
aas ke jaziron par
jab kabhi utarna tum
aashnai ki chhanw
sath chhod jae to
aas ke jaziron ko
yas mein samo lena
aur dil ke daman ko
aansuon se dho lena

agar tum bechna chaho

By

agar tum bechna chaho
adaen bhi wafaen bhi
hasin khwabon ke rangon ki ridaen bhi
ye duniya hai
yahan aawaz bikti hai
yahan taswir bikti hai
yahan par harf ki hurmat
yahan tahrir bikti hai
ye bazar-e-jahan ek be-karan gahra samundar hai
yahan par kashtiyan sahil pe aa kar dub jati hain
musafir mar bhi jate hain
magar raunaq nahin jati
ye insanon ka jangal hai
aur is jangal ka saman har waqt rahta hai
agar tum bechna chaho
adaen bhi wafaen bhi
hasin khwabon ke rangon ki ridaen bhi
mere dil mein bhi ek bazar sajta hai
jahan par sham hote hi hujum-e-yas hota hai ghamon ki bhid lagti hai
kai yusuf sar-e-bazar bikte hain agar tum bechna chaho