mile hain log zamane mein be-usul mujhe

mile hain log zamane mein be-usul mujhe
kiya hai surat-e-haalat ne malul mujhe
jahan se sahab-e-kirdar koi guzra hai
bahut aziz hai us raste ki dhul mujhe
jo haq ki rah mein khud ko mitana jaanta ho
pasand aate hain us shakhs ke usul mujhe
mili hain mujh ko wirasat mein kuchh ajab qadren
samaj ne diye hain kaghzi se phul mujhe
sada-e-haq meri duniya mein dab gai hai magar
nahin shikast kisi taur bhi qubul mujhe
hai jo bhi dil mein mere us pe ho sake zahir
har ek baat ko dena pada hai tul mujhe
main sochta tha mera us se koi rishta nahin
kisi ki yaad magar kar gai malul mujhe

koi Thokar isne jab khai na thi

koi thokar is ne jab khai na thi
zindagi ye rah par aai na thi
aap ki baaten thin baaten hi faqat
aap ki baaton mein gahrai na thi
har qadam par ranj-o-gham the muntazir
kis jagah meri pazirai na thi
zindagi thi ek sukut-e-mustaqil
mushkilon se jab shanasai na thi
aap ki yaaden thin dil ke aas pas
zindagi mein koi tanhai na thi
ek bhi puri na ho pai 'karan'
kaun si us ne qasam khai na thi

kisi shai par bhi iKHtiyar nahin

kisi shai par bhi ikhtiyar nahin
zist mein kuchh bhi paedar nahin
ye bhi hai moajiza mohabbat ka
gham kai koi gham-gusar nahin
main ne duniya nisar ki jis par
mujh pe us ko hi eatibar nahin
sare matlab ke rishte-nate hain
koi rishta bhi ustuwar nahin
har ghadi be-qarar rahta hai
dil ko hasil kabhi qarar nahin
rahaton ka to zikr hi kya hai
gham bhi duniya mein paedar nahin
log duniya ke khud-gharaz hain 'karan'
ye kisi ke bhi gham-gusar nahin

khoya kya paya kya hisab na kar

khoya kya paya kya hisab na kar
to abas waqt ko kharab na kar
chhod hargiz na rah-e-haq-goi
apni manzil ko yun kharab na kar
saf rakh apna daman-e-kirdar
tu use ashkon se pur-ab na kar
gham na kar dusron pe kya guzre
tu kabhi haq se ijtinab na kar
gham bhi hain zindagi ka ek hissa
dusron ko tu intisab na kar
jo faraez hain bhul jaen 'karan'
is qadar khud ko mahw-e-khwab na kar

hui hai mehrban unki nazar aahista aahista

hui hai mehrban un ki nazar aahista aahista
hua tai ye mohabbat ka safar aahista aahista
hua rangin mausam ka asar aahista aahista
machalte hain mere qalb-o-nazar aahista aahista
idhar mere dil-e-betab ki badhti hai betabi
udhar kali ghataon ka asar aahista aahista
bahut mohtat ho kar bhi guzar jaenge hum lekin
utar jaegi dil mein wo nazar aahista aahista
'karan' ek rose mere dil ko diwana bana dega
kisi ki mast aankhon ka asar aahista aahista

hasin subh hasin sham chahta hun main

hasin subh hasin sham chahta hun main
ki zindagi ko khush-anjam chahta hun main
zara sa muskura ke meri taraf dekh to lo
hun tishna baada-e-gulfam chahta hun main
nahin hai shak koi is mein to nek-sirat hai
zamane bhar mein tera nam chahta hun main
wo jis ke waste khain hain thokaren kitni
usi ko ham-safar har gam chahta hun main
tera khayal ho dil mein labon pe zikr tera
ki phir se yun sahar-o-sham chahta hun main
'karan' ye kaun kahe badh ke mere saqi ko
ki us ke hathon se ek jam chahta hun main