kyun andheron mein rahen raat basar hone tak

By

kyun andheron mein rahen raat basar hone tak
khud hi khurshid na ban jaen sahar hone tak
kitna achchha ho ki is bar mariz-e-shab-e-gham
achchha ho jae masiha ko khabar hone tak
kitni hi bar khayalon mein tere pas gae
ham-safar karte rahe waqt-e-safar hone tak
hai ye tashhir-e-mohabbat to kahin baad ki chiz
aap mil sakte hain duniya ko khabar hone tak
dagh-e-dil apni hi sozish se bana hai khurshid
aur kya guzregi qatre pe guhar hone tak
ai dil-e-wada-talab phir koi tajwiz-e-wafa
ek nazar aur bhi taid-e-nazar hone tak
tere sath apne bhi jine ki duaen mangin
ham-safar sath rahe khatm-e-safar hone tak
had bhi hoti hai koi tishna-labi ki 'nuri'
khud hi pi lete hain saqi ki nazar hone tak

kuchh soch ke izhaar-e-KHayalat na karna

By

kuchh soch ke izhaar-e-khayalat na karna
har baat ko sunna wo tera baat na karna
aisa na ho dar-asl tumhein apna samajh len
is darja gharibon ki mudaraat na karna
hai farq maraatib ke liye sara zamana
maikhane mein tauhin-e-musawat na karna
ek farz hai tazim-e-rawayat ba-har-taur
ek farz hai tarmim-e-riwayat na karna
paimana-ba-kaf jab ho jawani ki hikayat
is bab mein sanjida sawalat na karna
ek bar tawajjoh se koi baat to sun lo
phir chahe kabhi hum se mulaqat na karna
aasan hai jaan dena kisi baat pe 'nuri'
dushwar hai izhaar-e-khayalat na karna

karb hai karb ki aawaz barabar hai yahi

By

karb hai karb ki aawaz barabar hai yahi
teri qimat hai yahi tera muqaddar hai yahi
ji mein hai ab kisi darwaze pe dastak de dun
aur phir puchhun ki ai shakhs mera ghar hai yahi
kaun samjhega agar main ne kahi bhi rudad
chup hi ho jaun mere waste behtar hai yahi
ab to jo zarra bhi daman se lipat jata hai
main samajhta hun mera mehr-e-munawwar hai yahi
chandni-raat mein khud apne hi sae se milun
mera munis hai yahi ab mera rahbar hai yahi
ab to har lahza har ek mod pe hota hai guman
jis ke bare mein suna hum ne wo mahshar hai yahi
sher kahne ko to hum ne bhi kahe hain 'nuri'
ye jo khamosh sa baitha hai sukhnawar hai yahi

karb hai karb ki aawaz barabar hai yahi

By

karb hai karb ki aawaz barabar hai yahi
teri qimat hai yahi tera muqaddar hai yahi
ji mein aata hai kisi ghar pe bhi dastak de dun
aur phir puchho ki ai shakhs mera ghar hai yahi
kaun samjhega agar main ne kahi bhi rudad
chup hi ho jaun mare waste behtar hai yahi
ab to jo zarra bhi daman se lipat jata hai
main samajhta hun mera mehr-e-munawwar hai yahi
chandni raat mein khud apne hi sae se milun
mera monis hai yahi ab mera rahbar hai yahi
ab to har lakht har ek mod pe hota hai guman
jis ke bare mein suna hum ne wo mahshar hai yahi
sher kahne ko bahut hum ne kahe hain 'nuri'
ye jo khamosh sa baitha hai sukhnawar hai yahi

fikr-o-izhaar mein KHud aane lagi pa-mardi

By

fikr-o-izhaar mein khud aane lagi pa-mardi
bhuk ki aag ne lahje mein tamazat bhar di
kuchh to hai zist jo waqf-e-mai-o-saghar kar di
warna kis ko hai pasand apne liye bedardi
ishq-e-awara-o-badnam ne izzat rakh li
hum se be-ghar bhi kiya karte hain kucha-gardi
baat to jab hai ki tum kahne lago us ko basant
gul-o-gulzar pe jo aane lagi hai zardi
aap ke jism pe kya khub hai mausam ka libas
hae jo alag samajhte nahin garmi-sardi

fan ki aur zat ki paikar ne sone na diya

By

fan ki aur zat ki paikar ne sone na diya
dil mein jage hue fankar ne sone na diya
har taraf tapti hui dhup mere sath gai
zer-e-saya kisi diwar ne sone na diya
ek masum si surat ko kahin dekha tha
phir kabhi chashm-e-gunahgar ne sone na diya
mere ham-sae mein shayad hai koi mujh jaisa
hai jo charcha kisi bimar ne sone na diya
kal mere shahr mein ek zulm kuchh aisa bhi hua
raat bhar ghairat-e-fankar ne sone na diya
kal kuchh aisi hi sar-e-bazm meri baat giri
kisi pahlu mere pindar ne sone na diya
ek dhadka sa laga tha ki sahar-dam kya ho
sar pe latakti hui talwar ne sone na diya