yahi hua hai jo us rahguzar se guzre hain

By

yahi hua hai jo us rahguzar se guzre hain
hazar hashr ke manzar nazar se guzre hain
wo rahen aaj bhi naqsh-e-wafa se hain raushan
mizaj-dan-e-mohabbat jidhar se guzre hain
khuda kare na wo guzren kisi ki nazron se
jo sail-e-dard-o-bala mere sar se guzre hain
chhupae aankhon mein aansu dilon mein dard-o-fughan
wafa shanas yunhi tere dar se guzre hain
talash-e-yar mein hum kya daren musibat se
hazar bar rah-e-pur-khatar se guzre hain
khila gae hain mohabbat ke phul kanton mein
tumhaare chahne wale jidhar se guzre hain
dil-o-jigar mein ujala hai aaj tak jin ka
kuchh aise jalwe bhi 'kashfi' nazar se guzre hain

wo misl-e-mauj-e-bahaar apne shabab ki samt aa rahe hain

By

wo misl-e-mauj-e-bahaar apne shabab ki samt aa rahe hain
dilon ke ghunche khila rahe hain nazar ka daman saja rahe hain
har ek zarre mein har faza mein wo husn ban kar sama rahe hain
hamari tab-e-nigah ko wo har aaina aazma rahe hain
hamare aansu suna rahe hain shikasta dil ka fasana un ko
magar qayamat ki baat hai ye wo sun ke bhi muskura rahe hain
dil-o-jigar khun ho chuke hain hamare lab par magar hansi hai
hum apne afsana-e-wafa ko kuchh aur rangin bana rahe hain
jo mahw-e-zulm-o-sitam tha kal tak wo aaj shayad badal gaya ho
ye aarzu le ke hum dobara kisi ke kuche mein ja rahe hain
falak ka andaz kah raha hai hamare arman ka khun hoga
abhi to aaghaz-e-shab hai aakhir sitare kyun jhilmila rahe hain
hamari qismat ka pher dekho talash-e-manzil mein umr guzri
magar jahan se chale the kashfi wahin pe hum khud ko pa rahe hain

sahil pe ab charagh farozan hue to kya

By

sahil pe ab charagh farozan hue to kya
gharqab hum ko kar ke ye saman hue to kya
be-rang-o-bu hai daman-e-ahl-e-chaman abhi
qatre lahu ke sarf-e-bahaaran hue to kya
be-kar hai bahaar jo aae na waqt par
gar mere baad aish ke saman hue to kya
hum but-kade mein rah ke bhi iman-parast hain
waiz haram mein rah ke musalman hue to kya
gar la-ilaj ho gaya dard-e-dil-e-figar
phir chaarasaz mail-e-darman hue to kya
mathe pe to kalank ka tika hai aaj tak
hum ko mita ke log numayan hue to kya
khwabida ab bhi nazren hain be-his hai ab bhi dil
na aashna-e-soz ghazal-khwan hue to kya
daman se khun dil ko banana tha rashk-e-gul
minnat-kash-e-bahaar-e-gulistan hue to kya
'kashfi' mita sake na magar zulmat-e-nasib
aansu hamare zinat-e-mizhgan hue to kya

mera KHulus-e-mohabbat bhi kaamran na hua

By

mera khulus-e-mohabbat bhi kaamran na hua
wo zulm dhata raha mujh pe mehrban na hua
jabin-e-ishq jhuki hai na jhuk sakegi kabhi
bara-e-sajda agar tera aastan na hua
hai baat kya jo abhi tak khile na lala-o-gul
khizan ke baad bhi shadab gulistan na hua
teri hansi pe luta dete chand taron ko
hamare zer-e-asar aaj aasman na hua
wo aae mere tasawwur mein shukriya un ka
zahe-nasib mera jazb raegan na hua
kisi ke ishq ne wo hausla diya mujh ko
koi bhi gham mere dil par kabhi garan na hua
wo aashiyana ho gulshan ho ya qafas 'kashfi'
sitam zamane mein hum par kahan kahan na hua

mera darman hai na kabe mein na but-KHane mein

By

mera darman hai na kabe mein na but-khane mein
rind hun mujh ko pada rahne do mai-khane mein
us ko samjhi hai na samjhegi majazi duniya
hai haqiqat hi haqiqat mere afsane mein
liye phirti hai mujhe manzil-e-jaanan ki talash
chain hasil hai gulistan mein na virane mein
un ke kahne se use tod dun kaise aakhir
ilm jin ko nahin kya hai mere paimane mein
rabt-e-baham bhi ajab shai hai gale milte hi
shama ka nur nazar aata hai parwane mein
husn ru-posh hai to did ke qabil kya hai
ab kise dekhun bhala dahr ke gham-khane mein
sinche jao ise tum apne lahu se kashfi
phul khil jaenge ek din isi virane mein

mausam-e-gul mein koi kab hosh-mandana chala

By

mausam-e-gul mein koi kab hosh-mandana chala
phul dekhe jis ne kanton mein wo diwana chala
ek hi manzil pe har rahi ko jaana tha magar
zoam-e-baatil mein chala jo bhi judagana chala
us ke har ek gam par thi kaamrani sath sath
kargah-e-dahr mein jo sarfaroshana chala
waizan-e-kam-nazar hain dushman-e-tamkin-e-hosh
mit gaya wo in ki baaton par jo diwana chala
mai-kade mein ranj-o-gham kaisa kahan ki mushkilen
har khalish jati rahi jab daur-e-paimana chala
aafrin sad aafrin ye himmat zauq-e-talab
shama ke jalte hi jal marne ko parwana chala
koi asrar mashiyyat ho na paya aashkar
be-khabar aaya tha 'kashfi' aur begana chala