tabib kahte hain juz wahm-e-KHwab kuchh bhi nahin

By

tabib kahte hain juz wahm-e-khwab kuchh bhi nahin
to kya jo hum ne sahe wo azab kuchh bhi nahin
hamari dasht-nawardi tumhaare kaam aai
tumhein ye kaun batata sarab kuchh bhi nahin
nazir us ki main kya dun ki samne us ke
charagh mah sitara gulab kuchh bhi nahin
tamam umr kiya main ne kar-e-la-hasil
ki madh-e-husn-e-butan ka sawab kuchh bhi nahin
koi latif si shai ho to hum piyen saqi
hum ahl-e-dil ki nazar mein sharab kuchh bhi nahin
agar mein jazb na kar panw raushni 'kashif'
to mah kuchh bhi nahin aaftab kuchh bhi nahin

mayusi ki kaifiyyat jab dil par tari ho jati hai

By

mayusi ki kaifiyyat jab dil par tari ho jati hai
rafta rafta din-o-duniya se be-zari ho jati hai
awwal awwal khush aata hai pariyon ke khwabon mein rahna
baad mein lekin ye haalat zehni bimari ho jati hai
aql pe parda pad jata hai duniya hum se kho jati hai
jab koi shakhsiyyat hum ko had se pyari ho jati hai
rizq muqaddar mein likha hai phir ye karobar-e-jahan kya
ek ek dana kamane mein kis darja khwari ho jati hai
baz maqam aise hote hain jin se aage badh jaen to
un tak wapas aane mein behad dushwari ho jati hai
hum to sheari canwas par bas dil ka haal raqam karte hain
sachche jazbon se is par khud naqsh-nigari ho jati hai
aksar mujh se mahinon 'kashif' koi sher nahin ho pata
taza zakhm magar lagte hi taza-kari ho jati hai

main udas-raat ka chand hun ghane baadalon mein ghira hua

By

main udas-raat ka chand hun ghane baadalon mein ghira hua
meri tab ki ho khabar kise main rida-e-gham mein chhupa hua
nahin phul main ki meri taraf kisi khush-nazar ki nigah ho
main to ek zard sa pat hun kahin raste mein pada hua
mujhe dar tha jis ka wahi hua meri aankh khulte hi jhad gaya
teri palkon par mere wasl ka tha jo ek khwab saja hua
meri dhadkanen thin badhi hui mere hont jaise sile hue
main bayan haal na kar saka tere samne mujhe kya hua
ye adawaton ki subuk hawa use sah sakun kahan hausla
main wo ped hun ki mohabbaton ki faza mein phula-phala hua
ye dayar-e-dil ye khandar sahi magar is ki raunaqen kam nahin
yahan rang rang ke zakhmon ka shab-o-roz mela laga hua

kuchh bhi kar lijiye wo waza badalne ke nahin

By

kuchh bhi kar lijiye wo waza badalne ke nahin
yani hum karb-o-aziyyat se nikalne ke nahin
hum bhale kucha-e-viran mein akele bhatken
is zamane ki rawish par kabhi chalne ke nahin
aaina hai hamein jab tak teri khandan surat
hum kisi ranj ki taswir mein dhalne ke nahin
han kabhi soz-e-darun un ko ghula de shayad
warna nalon se hamare wo pighalne ke nahin
ho chuke khak jo jal kar wo patange ai shama
dusri bar tere shoale se jalne ke nahin
sehn-e-dil mein jo lagae the tamanna ke shajar
aisa lagta hai wo imsal bhi phalne ke nahin
jab talak manzil-e-ulfat pe nazar hai 'kashif'
panw apne kisi tile se phisalne ke nahin

KHwabon ki tarah goya bikhar jaenge hum bhi

By

khwabon ki tarah goya bikhar jaenge hum bhi
chup-chap kisi rose guzar jaenge hum bhi
hum jaise kai log chale jate hain har rose
kya hoga kisi rose jo mar jaenge hum bhi
hum log nahin kuchh bhi magar lauh-e-zama par
ek naqsh koi apna sa dhar jaenge hum bhi
odhe hue hain ruh pe hum daghon bhari khak
jab utregi ye khak nikhar jaenge hum bhi
ek aaina aisa ki jo baatin bhi dikha de
aaega muqabil to sanwar jaenge hum bhi
rahna hai kise khwab si duniya mein hamesha
'kashif' kisi din laut ke ghar jaenge hum bhi

KHwabon ki kaenat mein khone nahin diya

By

khwabon ki kaenat mein khone nahin diya
tere khayal ne mujhe sone nahin diya
gardish mein rakkha teri kashish ne mujhe sada
ab tak kisi thikane ka hone nahin diya
har marke se zist ke nikla hun surkh-ru
bas ye ki dil mein khauf samone nahin diya
zakhmon se tha nidhaal magar mauj-e-waqt ko
chahat ka naqsh sine se dhone nahin diya
ek hadse ki yaad ne dil ki zamin mein
khwahish ka tukhm phir kabhi bone nahin diya
'kashif' kamal-e-zabt ne rakkha mera bharam
zalim ke samne mujhe rone nahin diya