zaKHm hi zaKHm hain dil par kabhi aisa to na tha

By

zakhm hi zakhm hain dil par kabhi aisa to na tha
karam-e-yar ka nashtar kabhi aisa to na tha
phul jo mujh ko diye ban gae wo angare
waqt ayyar-o-sitamgar kabhi aisa to na tha
bastiyan raaz ki ashkon mein bahi jati hain
maujzan gham ka samundar kabhi aisa to na tha
aaj dast-e-talab utthe to qalam ho jae
daur-e-mahrumi-e-saghar kabhi aisa to na tha
aane wale nahin jab wo to ye raunaq kaisi
aaj jaisa hai mera ghar kabhi aisa to na tha
chhin gai ho na tajalli kahin diwaron se
shor maikhane ke bahar kabhi aisa to na tha
panw rakkha tha jahan sarw mein kham hai ab tak
jada-e-ishq mein patthar kabhi aisa to na tha

suno to zara ye aaKHir-e-shab nafir-e-dua ajib si hai

By

suno to zara ye aakhir-e-shab nafir-e-dua ajib si hai
zaman-o-makan pe chhai hui junun ki nawa ajib si hai
nizam naya shuur naya misal-e-ata ajib si hai
sawal pe hath katte hain talab ki saza ajib si hai
jigar pe har ek sinan-e-nazar jo sahte hue guzar gae hum
jawab mein ab harifon ki shikast-e-ana ajib si hai
ye pas-e-bahaar ashk piye jo dard badha to sher kahe
bataen kise hamari tabahiyon ki ada ajib si hai
utar gae chehre gardishon ke laraz gai jaan faslon ki
shikasta dilon ke qafile mein fughan-e-dara ajib si hai
zamane ke sard-o-garm se kab mili hai aman mujhe 'kausar'
wajud-e-nafas ko bakhshi hui karam ki qaba ajib si hai

kitab-e-zindagi ki jadwalon mein rang humse hai

By

kitab-e-zindagi ki jadwalon mein rang hum se hai
sahifa aarzu ka sar-ba-sar arzhang hum se hai
dil-e-shabnam pe rakkha hai hamin ne dast-e-gham-khwari
darun-bini harif-e-afsar-o-aurang hum se hai
hamare hauslon se nur le le gulsitan jab tak
sahar ka qafila pichhe kai farsang hum se hai
ulajhta hai ba-zahir har chaman se har kharabe se
magar dar-parda tufan-e-bala ki jang hum se hai
tasadum ki bhi jurat tutne ki bhi hamein himmat
waqar-e-shisha hum se hai ayar-e-sang hum se hai
khizan mein bhi raha 'kausar' shagufta hausla apna
bahaar-e-naghma saz-e-dard ka aahang hum se hai

karte hain wahi log jahan taza-tar aabaad

By

karte hain wahi log jahan taza-tar aabaad
har daur mein rakhte hain jo sina sharer-abaad
pur-shor gulistan hain na ab dasht-o-dar aabaad
kya jaane kahan ho gae ahl-e-nazar aabaad
thahraw kisi shai ke muqaddar mein nahin hai
duniya hai wo jada jise kahiye safar-abaad
khwabon ke sanam-khane salamat hain to yunhi
fitnon se rahega kham-e-zulf-o-kamar aabaad
hamsaegi-o-rabt ki khushbu bhi kahin hai
karti hain bahaaren to nagar par nagar aabaad
naghmon se jahan raushni-e-dard thi kal tak
sannate se hai aaj wo shakh-e-shajar aabaad
'kausar' hai sukhan-tab mera shahr-e-takhayyul
is shahr mein hain aaj bhi aaina-gar aabaad