zarb-e-paiham

By

ye kya zarb-e-paiham si
har dam hai sine pe mere
kabhi zarb ulti lagi ya
meri pusht khud zarb-e-paiham se ulti
tu phir ridh ki haddiyan meri chtkhin
ki sarhad pe jun ek masum bachche ki haddi
mujahid ke buton ki zad mein padi charmaraati rahi ho
to kya zarb-e-paiham se pichha chhudana bhi mumkin nahin hai?
nahin hai to kya main bhi sikhun
wahi zarb-e-paiham ki sari adaen?
ki ye zarb-e-paiham muqabil kabhi zarb-e-paiham ke aae
ye mumkin hai ifham-o-tafhim ki koi surat bhi nikle
koi sur mohabbat ka phute, faza gungunae

wo ek aag

By

ek ajab aag si hai sine mein
jaise ho sina-e-shamshir ki aag
ek ajab aag si hai baatin mein
jaise ho nala-e-shabgir ki aag
jaise ek shoala-e-jawwala falak ko chhu le
sina-e-sard mein mere hai wahi aag abhi
toda-e-barf se jo bujh na sake
ban ke shoala ye badhi jati hai
su-e-aflak uthi jati hai
us ki zad mein hain
ye ashya-e-nizam-e-alam
bas ki ek khauf hai pahlu mein mere
apni hi aag se afkar na jal jaen kahin
sochta hun ki dua hi mangun
mere aatish-kada-e-sina ko
mera rab lutf-o-karam ka koi chashma kar de

ghair-marai taqat

By

koi ghair-marai si taqat to hogi
jilau mein jo le kar
har ek ruh-e-tifl-o-jawan ko
khamoshi se su-e-falak kuch karti hai akasr
koi bap masum bete ko thame
dawa de raha hai, har ek sans ke zer-o-bam par nazar hai
udhar us ki jaan jism se ja rahi hai
magar kuchh nazar bhi na aae, samajh mein na aae
abhi khelta tha, abhi dekhta tha
abhi to, abhi, han abhi band aankhen hui hain
ye dekho labon par,
ajab ek masum si muskurahat hai baqi
magar koi jumbish nahin hai
ramaq zindagi ki na baqi hai koi
koi ghair-marai si taqat to hogi,
jo aahistagi se chali aati hogi
khamoshi se aaghosh mein apni,
masum ruhon ko le kar chali jati hogi
yaqinan koi ghair-marai si taqat hai warna
agar koi marai si taqat jo hoti
to nadan insan bahut ghul machata
magar ye nizam-e-ilahi badalta nahin hai

dasht-e-taKHayyul ki nafi

By

mujhe dasht-e-takhayyul ka safar karna agar aata
tawaf-e-kaba karta, zindagi ko samt mil jati
sahife dil ke sab bikhre hue mere sanwar jate
gham-o-alam mere bhi,
ghubar-e-rah ban jate
mujhe dasht-e-takhayyul ka safar karna agar aata
tazadat ab jo paida hain, wo paida hi nahin hote
kahin kunj-e-sukun misl-e-madina mujh ko mil jata
mujhe dasht-e-takhayyul ka safar karna agar aata
jinhen dasht-e-takhayyul ka safar karna bhi aata hai
hawa ke dosh par udte hain misl-e-gard-e-awara
gidhon ka jhund ki mandla raha ho jaise murdon par
mujhe dasht-e-takhayyul ka safar karna nahin aata
nahin aata to achchha hai, nahin aae to achchha hai