wafa ka zikr nahin hai karam ki baat nahin

By

wafa ka zikr nahin hai karam ki baat nahin
tere suluk mein phir bhi sitam ki baat nahin
tujhe main chahun ye mera nasib hai lekin
agar tu mujh ko na chahe to gham ki baat nahin
hasin sham jo guzri wo yaadgar bani
ye baat waise bhi sach hai bharam ki baat nahin
har ek baat ka meri khuda rahega gawah
har ek janam ki hai ye ek janam ki baat nahin
ghazal wo kaisi wo naghma hi kya rahega 'kiran'
tere kalam mein jab tak sanam ki baat nahin

aate jate log hamein kyun dost purane lagte hain

By

aate jate log hamein kyun dost purane lagte hain
chahat ki is had par yarab hum to diwane lagte hai
sunne wala koi agar hota kahte dil ki baaton ko
us ke bina to aaj adhure apne fasane lagte hain
phir se bahaaren le kar aai mahki hui si yaadon ko
aa bhi jao ab milne ke achchhe bahane lagte hain
dil karta hai phir se dekhun khoe hue us manzar ko
pyasi aankho ko wo nazare kitne suhane lagte hain
khushbu wahi hai rang wahi hai aaj wafa ke phulon ka
aap kya aae phir se chaman mein din wo purane lagte hain
tuti hui si ek 'kiran' hai kafi andhere walon ko
ghar mein ujala dhundhne wale ghar ko sajaane lagte hai

aaina dekhta rahta hai sanwarne wala

By

aaina dekhta rahta hai sanwarne wala
kaun ab hoga yahan pyar pe marne wala
kis ki chahat ka bharam rakhta hai dil mein apne
teri khatir nahin koi bhi marne wala
bazm se uthne se pahle ye zara soch bhi le
khwab ban jaega nazron se guzarne wala
har ghadi wo bhi to logon ki tarah hain rahta
pahle simta tha kaha khud se bikharne wala
hum nahin kahte ye haalat batate hain hamein
kab sukun pata hai haalat se darne wala
gardishen waqt se kahta hai koi ja ke 'kiran'
ek lamha bhi nahin pas thaharne wala

hum ahl-e-zarf hain yun hi KHafa nahin hote

By

hum ahl-e-zarf hain yun hi khafa nahin hote
wafa-shiar kabhi bewafa nahin hote
kuchh aise aansu bhi rahte hain meri palkon par
juda to hote hain phir bhi juda nahin hote
jo zakhm tum ne nawaze hain be-sabab hum ko
kisi bhi dard ka wo masala nahin hote
kaha ye kis ne kahan se ye sun ke aae ho
jo be-sahaara hain wo aasra nahin hote
har ek gam pe jo ladkhadae rahte hain
ghubar-e-rah mein wo rasta nahin hote
charagh to hain magar itne dhundle dhundle kyun
'kiran' tumhaare to ye naqsh-e-pa nahin hote

gham-zada hum hain ye kahna chhoD do

By

gham-zada hum hain ye kahna chhod do
ya hamare sath rahna chhod do
chahiye gar zindagani ka maza
waqt ki lahron mein bahna chhod do
shak karenge log ashkon par mere
is tarah aankhon mein rahna chhod do
zabt-e-gham achchhi alamat hai magar
phir bhi tanhai mein rahna chhod do
jitni mil jae khushi lete raho
gham agar mushkil hai sahna chhod do
dushmanon se kar lo samjhauta 'kiran'
doston ka zulm sahna chhod do

dard dil se kabhi juda na hua

By

dard dil se kabhi juda na hua
koi hamdard aap sa na hua
un ke hamrah tha tamam safar
tai magar phir bhi rasta na hua
hum bhanwar mein the dubte hi gae
nakhuda to kabhi khuda na hua
aap ka gham hai aap se behtar
wo kabhi hum se be-wafa na hua
hain sabhi log shahr ke achchhe
hum se badh kar koi bura na hua
hum se ruthi rahi 'kiran' lekin
dil to dil se kabhi juda na hua