ye marhala hai mere aazmae jaane ka

By

ye marhala hai mere aazmae jaane ka
mila hai hukm mujhe kashtiyan jalane ka
bahana dhund rahe hain tamam ahl-e-sitam
fasil-e-shahr-e-wafa mein naqab lagane ka
bade sukun se soi hai aaj khilqat-e-shahr
mana ke jashn charaghon ki lau bujhane ka
hawa-e-shahr hi jab ho gai khilaf mere
use bhi aa gaya fan ungliyan uthane ka
mere wajud mein zinda hai shaukat-e-mazi
main ek sutun hun guzre hue zamane ka
ruki hui hai lab-e-khushk par hayat ki bund
phir us ke baad to manzar hai dub jaane ka
safar ki sham meri zindagi ke mathe par
bas ek sitara tere nur aastane ka

jab ek bar kisi intiha pe ja Thahre

By

jab ek bar kisi intiha pe ja thahre
phir us ke baad nazar raston mein kya thahre
safar pe nikle the jab zindagi giraft mein thi
maal-e-kar bas ek mauja-e-hawa thahre
ajab nahin hai ki barson ke ghup andhere mein
diya jalaen to manzar hi dusra thahre
chamak uthe kabhi aa kar meri hatheli par
wahi sitara kabhi aasman pe ja thahre
mufahamat ki nikalti nahin hai rah koi
jab apne apne usulon pe baat aa thahre
hum ek aise dorahe pe aa chuke hain ki ab
qadam badhae to raste juda juda thahre
main apne sans ki gathri utar lun sar se
hayat-e-tez-safar se kaho zara thahre

ek qatra-e-mani se afkar ka dariya ho

By

ek qatra-e-mani se afkar ka dariya ho
ai zarra-e-agahi ab phail ke sahra ho
rafta rahe wabasta har haal dariche se
farda ke jharokon mein mazi ka ujala ho
ai bichhdi hui naddi kis dasht mein bahti hai
phir jaanib-e-dariya aa aur shamil-e-dariya ho
aafaq-e-bulandi se aawaz ye aati hai
ek asr mein shamil ho ek pal se alahada ho
lamhe ki haqiqat kya sadiyon ke tanazur mein
lekin jise tu chahe wo rashk-e-zamana ho
is dhup ke rahi ko anjam se kuchh pahle
ek aisi masafat de jis par tera saya ho
aisa na ho wo mange tasdiq ka ek lamha
aur hum ne wahi lamha mahfuz na rakkha ho

charagh-e-shauq jala raat ke asar se nikal

By

charagh-e-shauq jala raat ke asar se nikal
safar na rok tilismat-e-rahguzar se nikal
kabhi to dast-e-hinai se likh visal ki rut
kabhi to shisha-e-jaan tutne ke dar se nikal
jawaz dhund na apni sada bikharne ka
hayat mohr-ba-lab dast-e-chaara-gar se nikal
zara si wusat-e-idrak mein na gum ho ja
is imtihan se guzar hairat-e-khabar se nikal
tere khayal mein hun shahr-e-raftagan tu bhi
kisi khandar se ubhar aks-e-baam-o-dar se nikal
zakat-e-khwab mein de di hain main ne aankhen bhi
ab ai jahan-e-digar hita-e-nazar se nikal
nigah-e-zard mein ug sabz khwab ki konpal
gulab-e-shakh phir ujde hue shajar se nikal
bandhe hain sham sutunon se subh ke tare
jamal-e-yar kisi naqsh-e-motabar se nikal
fasil-e-shahr pe aks-e-shab-e-tassuf hai
najat-e-gham ki kiran khema-e-sahar se nikal