raushni hai wo

By

raushni hai wo
wo dhup hai khilti hui
jalti hui ek lohe
apni raushni se
khud rah mein ujala karti
aandhiyon se
andheron se
use khauf nahin
kanpti lau ko
tharthara ke
sambhalne ka hunar
aata hai
is lau ne
har samt mashal ban kar
dikhaya hai apna jauhar
kitne kamal kar ke
dekhna ek din ye bad-guman duniya
manegi us ki ahmiyat
salam kar ke use

zahr

By

chhapak ki
aawaz ke sath
zehn ke paniyon mein
girta hai
lafzon ka patthar
bante bigadte
ehsashon ke
ghere
mit jaenge
bina koi nishan chhode
magar ye zahr-aluda patthar
pade rahenge yun hi
zehn ki
talhatiyon mein
rengte
apni hi tarah
zahr-aluda

yaad

By

raat tak
khayalon mein
yaadon ka qafila
kabhi jagata raha
kabhi thapki de kar
sulata raha
aakhir dhadkanon ka saz
khwabida aaghosh mein
dubta chala gaya

ummid

By

zindagi ajab hai
phir bhi apne pas
maut ko
phatakne nahin deti
jab ki hath mahrum hain
rozgar se
pet dane se
aur sar aasare se
sakht-jaan zindagi
hazar bar
mar kar bhi
zinda rahti hai
ummid ke ujalon mein
unchi udanon mein
apne aap se
jhunjhti hui
ki haqiqat mein
jise kahte hain zindagi
hamein bhi
hasil ho gai kabhi to
bas ye jazba
na kabhi marne pae

tishnagi

By

dil ki tapish
sine ki khalish
josh-e-jigar
hosh-e-nazar
husn-o-ishq
mal-o-rizq
labon pe jab bhi
un ka zikr aaya
ai tishnagi nam tera
phir un ke sath zarur aaya

talash

By

hasraton ki pyas
le jaegi kahan kahan
sahraon mein
samundar mein
nile khule ambar mein
chhan mari khak
zamin se aasman tak
jism se jaan tak
yahi talash
qaem rakhegi
wajud duniya ka
ta-qayamat
safar hayat ka
haiwan se insan tak