likhna jo chahta tha

By

likhna jo chahta tha wo likkha nahin gaya
nindon mein khwab mit gae
alfaz kho gae
ek khamoshi ka ped mere dil mein bo gae
barish mein bad-hawasi ke
sare nuqush harfon ke dhundla ke bah gae
aansu ne jo bhi dekha tha us ko mita diya
dil ne hawas ki aag ko sari jala diya
koi na rang-o-rup
dil-e-dard ke qarib
aasha bhi mit gai hai nirasha bhi mit gai
dil mein koi bhi zauq-e-tamasha nahin rahe
apne liye to koi bhi achchha nahin rahe
manzar nahin rahe hain to aankhen nahin rahin
khamosh hai zaban ki baaten nahin rahin
sab para-para ho gaya kis iftiraq mein
khali makan sa hai kahan darmiyan mein
kuchh zehn mein nahin hai main likkhun to kya likhun
sare nuqush ghire hain qadam main kahan rakhun
koi rasta nahin hai main kis samt mein chalun
manzil dikhai de to main us ki taraf badhun
aawaz kho gai ki izhaar main karun
ji chahta hai chullu bhar pani mein hi marun
koi rasta nahin hai
batao main kya karun
likhna jo chahta tha wo likkha nahin gaya
kya qabr mein sunaunga unhen main dastan
munkir-nakir ko main
bulaun na kyun yahan
wo lafz sath le ke aaen
to main likkhun
ek aisi nazm jo ho hikayat nai nai
ban jae jis se meri bhi qismat nai nai
aaina-e-jamal-e-huwaida ko kya hua
dida ki raushni ko nazara ko kya hua
sab kho gae hain danish o binish kahan chalen
ab waqt hi nahin hai ki dil ko samet len
sab kuchh udhaar khaya tha kaise ada karen
is nafs kar swad mein ji kar bhi kiya karen
dariya kinare jaen wahan dub maro hain
phir is ke baad hoga kya
magar fan hum ko kuchh nahin
han jaante hain
dur ki ganw ke kanar
uglegi rasta ho ke bahut yaad-e-be-karan
hathon mein apni pas se kami laegi bahaar
ghabra ke sare ganw ke basi pukarenge
julusi jalao nak ke kide sidhaarenge
phir chalo chalo
lakdiyon ke dher par hamein
karenge sawar wo
ki ban ke phir
aag ke nisar
jab rakh apni dariya mein phir se bahaenge
sahil ki mitti mein nae gul muskuraenge
kheton mein taza bute
nae paude
phir se ubhar aaenge
shayad ki khatm ho na kabhi bhi ye silsila
kitna bhi tum pukaro use der der tak
kitni hi kar lo baith kar tum nai dua
gar aasan hota wo sunna
tumhaari nida
karta koi dawa
hota na saneha
har har qadam pe karte
sajda har kahin
is zindagi ka hota
har ek lamha jaan-fiza
har pal mein nur hota
sunsan wadiyon mein
chamakta ye qafila
aur phailti zamin par
is nur ki naha
har samt chand hota
har ek samt aaftab
phir paikaron mein dhal ke har ek khwab
aate hi mere ru-ba-ru
naya sa qalam koi
chalte hum is ke sath bahut dur par kahin
phir likhte dastan-e-wajud-o-adam kahin
rukta na phir kahin bhi
hamara qalam kahin
likhna jo chahta tha wo likha nahin gaya

ye raat

By

ye raat hai ya hayat hai pul-e-siraat hai
andhere mein lamhon ki tez dhaar par chale hue
halki aankh malte hue
lahuluhan qadam
lekin kat kar girte hain nahin
karte bhi nahin
zakhmi pair liye abhi aur kitni dur chalna hai
malum nahin
is raste ki sarhad
hamesha nazdik dikhai deti hai
lekin nazdik pahunchte hi madum ho jati hai
aur hum ek aur rasta
ek aur rahguzar ubhar aati hai
shayad yahi manzil bhi hai aur yahi rasta bhi hai
shayad yahi is zindagi ka sahil bhi hai
ki hum chalte rahen
khamosh ya phir chillate ya gate hue
khud apne aap ko koi git koi naghma
sunate hue
gane wale bhi hum sunne wale bhi hum
hamari duaen bhi thi
hamari zaban se nikal kar hamare
dil tak hi jati hain
dil agar sun le to duaon mein asar aa jata hai
na sune to hum hath upar utha kar niche giraate rahte hain
aur rote rahte hain
is raat ke andhiyare mein
khile hue zakhmon ke phul bhi hamare
hamari aahon ke kante bhi hamare
hum tumhaare tum bhi hamare
khushiyan bhi apni gham bhi hamare
is phul aur dhul se nikal jaane ke baad
pul-e-siraat se phisal jaane ke baad
taqdir sambhal jaane ke baad
jab aankh khulegi
to koi phulon ki bich hamari muntazir na hogi
hamari nindon mein
koi hansta hua khwab nahin aaega
hamare hathon mein koi gulab nahin aaega
hamare samne koi baam-e-sharab
aur banhon mein koi shahab nahin aaega
aaega to
ek muhib sannata
ek lambi khamoshi
ek na sunai dene wali aawaz
ek na dikhai dene wala khala
jis mein na hum hain
na hamara saya hoga
na hone ka ilm
na hone ka ehsas
ek aisa lamba pul
jis ki kahani hum apne dusre shahr mein bhi
suna na paenge
hum wahan se laut kar
dobara yahan aa na paenge

shaeri mat karo

By

kanton ke taj chuno
ya
jab sach ki rah chalo
lafzon ke pech-o-tab mein ullu na bano
shaeri mat karo!
mote-jhote yajmanon ki jhidkiyan hon
ya kahil riya-kar afsaron ka phatkaren
ya phir
dubli-patli diq-zada biwiyon ke tane hon
ya tota-chashm ayyar rut badli
mahbubaon ki jhuti muskurahaten
khamosh raho
har shai ko
qudarat ka karishma samjho
par khuda ke liye
bhagwan ke liye
shaitan ke liye
shaeri mat karo
manzar pas-manzar
khamosh hota hai
ped sakit khade rahte hain
patte hilte hain
par na udte hain
kahin dur se rail ki sitiyan ubharti hain
aur nazdik ke race-kors se
bhagte tezabi ghodon ki tapon se ziyaada
nau-dolatiye gadhon ki chikh-o-pukar se
kan phatne lagte hain
har kahin kanon ko
rui mayassar nahin aati hai
kam-az-kam
aankhen mund lo
(ye tumhaare bas mein hai)
andhiyare mein aawazen zail ho jaengi
zehn ke kale parde par
koi taswir nahin ubhregi
kanon mein
koi aawaz nahin aaegi
gunge bahre andhe ho jao
shaeri mat karo
aur andhiyare mein dur talak dekhte jao
der talak
be-subh-o-sham
be-jism-o-jaan
aakash aasman
dekhte jao
shayad isi lamhe
ya kal parson
ya sadiyan guzar jaane ke baad
zamin ud jaane
aasman bikhar jaane ke baad
har shai ke mar jaane ke baad
dhul simat jaegi
dhund mitegi
andhiyare mein chaaron jaanib
aaina ubhrega
kanon mein nuqrai ghantiyon ke maddham naghmon
ki sharabon ka nashsha gunjega
chaaron samt sunahri safed moti
sa chamakta chehra ubhrega
chaaron jaanib sar-sugandh ki malaen
lahraengi
nit-naweli sada ki doshiza
shaeri ki palki par sawar aaegi
mujh ko
dur bides le jaegi

nasha baqi hai

By

karunga fath koi sham to main utrunga ulajhti sans ke kikar se aur
khwabon se raft-o-bud ke us par
abad ke husn-e-hariri ke safed se phul apni palkon pe chun sakunga main
main ban sakunga khud apna libas khud apna tar-e-nafas
na sun sakunga koi lafz koi nazm aur koi aawaz
sukut-e-zat mein lamhon ki chap tak na aaegi
chamakte hosh-o-hawas thak chuken to sawad-e-sham mein
soe hue shajar ke tale padaw dalte hain
purani yaadon ke rangin parinde shajar se niche utarte hain
udas aankhon ke purane ghar mein khayal-o-khwab
ka malbus pahne aate hain
main nanhe tifl ke manind unhen pakadne khuli nim ujli
wadiyon mein daudta hun
kahin pe pair phisalta hai aur dhadam se niche kali khaiyon
mein dubta hun
aankh khulti hai
chahaar-samt andhera hai andhere mein sapedi
koi rang koi libas nahin
koi khushbu koi bas nahin
badi hi der talak ghurte andhere mein
rafta rafta ghule hain siyahi mujh mein aur main
siyahi mein
athah nind ke sahil pe sari umr ke dagh
tamam nasl ke sare gunah dhulte hain
magar hawas kahan chhodte hain jism ke rog
sawere pahli kiran raushni ki jaise hi jhilmilati hai
khwabida aankh kulbulati hai
athah nind ke sahil pe dhup phailti hai
dagh ujalon mein phir chamakne lagte hain
sare gunah andheri ruh ke taqon pe
phir charagh ki manind jalne lagte hain
na sham fath hui aur na subh fath hui
raat fath hui aur na baat fath hui
wahi hun main wahi din raat aur wahi man-o-tu
wahi zamana wahi yaaden aur wahi khwab
nasha utarne pe wahi makhluq aur wahi duniya
wahin hain motaren wahi raste wahi shahr aur wahi ganw
wahi hai biwi wahi bachche wahi ghar aur wahi chhanw
karunga fath koi sham to main utrunga
tere kinare (mere ru-ba-ru) ki jahan
na koi subh na sham aur na koi nind na khwab
na koi rasta na manzil na koi ghar hai na ghat!

mujhe abhi bahut dur jaana hai

By

kya pairon ki thakan is safar ko rok sakti hai
kya raste ke rode mere irade ko tod sakte hain
kya main yahan se wapas laut jaunga
kya main aur aage chal nahin paunga
nahin nahin
shayad mujhe jaana hai bahut dur
go hun main thakan se chur
aur be-zar har manzar se
jo bar bar laut kar nazar ki uktahat ban jata hai
wahi aasman
wahi zamin
wahi chand wahi sitare
chandni mein chamakte aur mahakte wahi phul
hathon mein chubhte wahi babul
wahi mere man ko salakhon mein lahu karne wale aqwal
lekin shayad uktahat bhi mane na ho
qadmon ki
shayad zindagi qaidi na bane lamhon ki
ye to hawa-e-barg-o-bar ki tarah hai
jo kabhi na kabhi guzar jaegi
mere zehn ke khazane ki upri sath ko bhi
kabhi na chhu paegi
shayad abhi aage bahut dur jaana hai
aur in bar bar aate lamhon
har bar aankh ke samne ubharte manzaron
dariyaon sahraon jangalon
ganw aur shahron
ke bhid se mujhe koi naya rang
nikalna hoga
apne paraganda zehn ko qabr mein dafn kar ke
naya but naya mandir banana hoga
purane lafzon se naya lafz
purane maani se nae maani
khalq karne honge
yahi nahin
mujhe parina kanon mein
samaaton ke nae paimane
aankhon ke liye
nae manzar-name se tartib dene honge
chalte chalte mere jute bhi ghis gae hain
mujhe uff juton ko hi badalna hoga
aur aankhon par nai ainak lagani hogi
taki purane shishe mein nae rang
purane na dikhai den
shayad ye thakan mujhe rok na pae
shayad main in roadon ko phalang dun
shayad apne hathon se babulon ko noch
phenkun
shayad main sin ki salakhon ko tod kar
bahar aa jaun
aur malgaji chandni ke aks ghar
apne lahu se surkh-ru kar dun
aur qadam badhate aage nigal jaun
shayad mujhe abhi bahut dur jaana hai

jila-watan shahzad-gan ka jashn

By

qabr ki mitti chura kar bhagne walon mein hum afzal nahin
hum koi qatil nahin
bismil nahin
munjamid khunin chatanon par do-zanu baith kar
ghumti sui ke raste ki salibon se tapakte
qatra qatra surkh-ru sayyal ko
ungliyon par gin rahe hain
chun rahe hain
manzar-e-neelofari ki jhil mein
girta hua ek aasman-e-nur ka zakhkhar shor
hum ki apni tishnagi ke sab zaruf
apni apni past-qad dahliz par tod aae the
nariyal ke aasman andokhta sayon tale
ladkhada kar
aatishin sahil ki jalti ret par aundhe pade hain
aatishin sayyal jab jab
jism ki sarhad pe ghash khae sipahi ki ragon ko chhedta hai
hosh aata hai
to chaaron samt raushan dekhte hain
ek alaw be-karan
jis mein tamam aasmanon ki ridaen jal rahi hain
aur phir
jalte gulabon se ubharti zafrani raushni
hum ko salami de rahi hai