safar ke sath safar ki kahaniyan hongi

By

safar ke sath safar ki kahaniyan hongi
har ek mod pe jadu-bayaniyan hongi
gharib-e-shahr sukhan-ashna ko tarsenge
hum ahl-e-gham ke liye gham ki wadiyan hongi
tamam rasta kanton bhara hai soch bhi le
qadam qadam pe yahan bad-gumaniyan hongi
bane banae hue raston ko dhundenge
wo jin ke sath mein murda nishaniyan hongi
ragon se dard ka rishta bhi chhut jaega
phir is ke baad sulagti khamoshiyan hongi

bahut fasad chhupa tha lahu ki gardish mein

By

bahut fasad chhupa tha lahu ki gardish mein
bikhar ke khak hue ek zara si laghzish mein
parind shakh pe tanha udas baitha hai
udan bhul gaya muddaton ki bandish mein
wo hath kya hue tamir raegan nikli
makan gir gae mausam ki pahli barish mein
jo qatl-o-khun ki aandhi chali to thamti kya
sabhi sharik the basti ke log sazish mein
kitab kholi to lafzon ke sath bahne lage
ajab tilism tha us shakhs ki nigarish mein

ye kya tilism hai

By

main apne aap se aksar sawal karta hun
ye kya tilism hai kaisa ajab tamasha hai
ki bar bar sarabon ki samt jata hun
wo kaun hai jo mujhe rasta dikhata hai
main zulmaton ke bayaban se laut aata hun

tishnagi

By

zindagi tishnagi ka safar hai
jis ke daman mein
karodon mah-o-sal ke naqsh khwabida hain
wo pyas ki aag thi jis ki khatir ye insan
ghane jangalon mein khalaon ki nilahaton mein
gahre samundar ki pahnaiyon mein bhatakta raha hai
wo jism aur ruh ki pyas hai jo ab tak
khalaon ka rup dhaare
pattharon ke sine mein dard ban kar
kaghzi paikaron mein rang bhar kar
git, sangit mein bikhar kar
machalti rahi hai
aur agar tishnagi bujh gai to
khalaon ke narm sote
andhere ke sahra mein kho jaenge

raushni kho chuke hain

By

agar main apni khwahishon ko
be-libas kar dun
to wo mujh se nafrat karne lagenge
main ye jaanta hun ki
un ke dil ka zahr
siyah parchhaiyan ban kar
ubhar aata hai
jise dekhna un ke bas mein nahin
wo apni aankhon ki raushni kho chuke hain